2 ثِيمُوثِييُو
أَسدْجمْ غَارْ ؤُمزْوَارُو
1
1 بُولُوسْ، رَّاسُولْ ن يشُّو لْمَاسِيحْ، عْلَاحْسَابْ ڒْخَاضَارْ ن أَربِّي، عْلَاحْسَابْ لْوَاعْذْ ن ثُوذَارْثْ إِ إِدْجَانْ ذِي يشُّو لْمَاسِيحْ. ▫ 2 إِ ثِيمُوثِييُو، مِّي إِعِيزّنْ: أَرْضَا ذ أَرّحْمثْ ذ ڒهْنَا زِي أَربِّي ثَابَابَاثْ ؤُ زِي يشُّو لْمَاسِيحْ، سِيذِيثْنغْ. ▪
أَشجّعْ إِ ثِيمُوثِييُو
3 نشّْ تّْقَاذِيغْ أَربِّي ونِّي ؤُمِي عبْذغْ زِي ڒجْذُوذْ إِنُو س ثْنفْسشْثْ ثزْذڭْ، أَمْ تِّيذَارغْ شكْ بْڒَا قطُّو ذِي ثْژَادْجِيثِينْ إِنُو دْجِيڒثْ ذ وَاسّْ. ▪ 4 وحّْشغْ أَذْ شكْ ژَترغْ، خْمِي تّْفكَّارغْ ذڭْ إِمطَّاونْ نّكْ، ؤُمِي غَا تّْوَاشُّورغْ س ڒفْرَاحثْ، 5 عْلَاحْسَابْ ڒِيذَارثْ إِ غَارِي ذَايكْ، س لْ-إِيمَانْ بْڒَا نِّيفَاقْ إِ ذَايكْ إِدْجَانْ، ونِّي ثُوغَا إِزدّْغنْ أَمزْوَارْ ذِي حنَّاشْ لُووِيسْ ؤُ ذڭْ يمَّاشْ إِوْنِيكِي ؤُشَا، أَقَا سّْنغْ نِيشَانْ بلِّي إِزْذغْ ذَايكْ عَاوذْ. 6 س ؤُينِّي سّْعقْڒغْ شكْ أَذْ ثسّكَّارذْ ثَاوْهِيبْثْ ن أَربِّي ثنِّي ذَايكْ س وبْرِيذْ ن وسْرُوسِي ن إِفَاسّنْ إِنُو خَاكْ. ▪
7 مِينْزِي أَربِّي وَارْ ذ أَنغْ إِوْشِي أَرُّوحْ ن ڒْعُورّثْ، مَاشَا أَرُّوحْ ن جّهْذْ ذ ثَايْرِي ذ ؤُثبّثْ. ▪ 8 س ؤُينِّي وَارْ تّْسضْحِي شَا حِيمَا أَذْ ثوْشذْ شّْهَاذثْ خْ سِيذِيثْنغْ، نِيغْ زَّايِي نشّْ، ونِّي ذ أَمحْپُوسْ نّسْ، مَاشَا كّْسِيمْ مَارَّا ڒْغَارْ ذِي طّْوعْ ن ڒخْبَارْ أَصبْحَانْ س جّهْذْ ن أَربِّي، ▪ 9 ونِّي أَقَا إِوْشَا أَنغْ ثُوذَارْثْ ؤُشَا إِڒَاغَا أَنغْ-د س ثْڒَاغِيثْ إِقدّْسنْ، وَارْ إِدْجِي عْلَاحْسَابْ ڒخْذَايمْ نّغْ، مَاشَا عْلَاحْسَابْ ڒْخَاضَارْ نّسْ ذ أَرْضَا نِّي إِ ذ أَنغْ إِمّوْشنْ ذِي يشُّو لْمَاسِيحْ قْبڒْ ڒْوقْثْ ن إِكُوذنْ، ▪
10 ڒْخَاضَارْ نِّي إِتّْوَاسّضْهَارنْ ڒخُّو س ؤُخشِّي ن ڒْعُونْصَارْ نّغْ ن ثُوذَارْثْ، يشُّو لْمَاسِيحْ ونِّي ثُوغَا إِبضْڒنْ ڒْموْثْ ؤُشَا إِسّضْهَارْ ثُوذَارْثْ وَارْ إِفنِّينْ س ڒخْبَارْ أَصبْحَانْ. ▪
11 زَّايسْ تّْوَاسْڭعّْذغْ نشّْ ذ أَمْبَارّحْ ذ رَّاسُولْ ذ ؤُمْسڒْمَاذْ ن ڒڭْنُوسْ. ▪
12 خْ سِّيبّثْ-أَ عَاوذْ كْسِيغْ أَرْمحْ ؤُ وَارْ تّْصضْحِيغْ شَا، مِينْزِي سّْنغْ مَانْ ونْ إِ زِي تَّامْنغْ ؤُشَا أَقَا تّْوَاسّْقنْعغْ بلِّي نتَّا أَقَا غَارسْ صُّولْطَا مَاحنْذْ أَذْ إِحْضَا مِينْ ذ أَيِي إِتّْوَاوكّْڒنْ أَڒْ أَسّْ نِّي.
13 أجّْ أَذْ غَاركْ إِقِّيمْ لْمَاثَالْ ن وَاوَاڒنْ إِصحّنْ إِ زَّايِي ثسْڒِيذْ س لْ-إِيمَانْ ذ ثَايْرِي إِ إِدْجَانْ ذِي يشُّو لْمَاسِيحْ. ▪
14 حْضَا ثَاصبْحَانْثْ إِ ذ أَشْ إِتّْوَاوكّْڒنْ س أَرُّوحْ إِقدّْسنْ نِّي ذَايْنغْ إِزدّْغنْ.
15 أَقَا ثسّْنذْ بلِّي مَارَّا إِنِّي إِدْجَانْ ذِي أَسِييَا جِّينْ أَيِي، زَّايْسنْ فِيخِيلُوسْ ذ هِيرْمُوخِينِيسْ. ▪
16 أَذْ يَارْزفْ سِيذِيثْنغْ س أَرّحْمثْ ذِي ثَادَّارْثْ ن ؤُنِيسِيفُورُوسْ، مِينْزِي ثُوغَا إِسَّاريّحْ أَيِي أَطَّاسْ ن ثْوَاڒَاوِينْ ؤُشَا وَارْ إِسضْحِي شَا زِي سْنَاسڒْ ن ثْمحْبَاسْثْ إِنُو. ▪
17 مَاغَارْ ڒَامِي د-يُوسَا غَارْ رُومَا، ثُوغَا يَارزُّو خَافِي س شْضَارثْ أَطَّاسْ ؤُشَا يُوفَا أَيِي.
18 أَذْ أَسْ إِوْشْ سِيذِيثْنغْ، أَقَا أَذْ يَافْ أَرّحْمثْ غَارْ سِيذِيثْنغْ ذڭْ وَاسّْ نِّي، ؤُشَا مشْحَاڒْ إِخْذمْ ذِي أَفَاسُوسْ، شكْ ثسّْنذْ كْثَارْ.