إِمْسخَّارنْ ذ بَابْ نْسنْ
6
1 إِتّْخصَّا إِ مَارَّا إِنِّي إِدْجَانْ سَاذُو أَزَايْڒُو ن ثسْمُوغِي أَذْ وقَّارنْ أَيْثْبَابْ نْسنْ ذِي مَارَّا، حِيمَا وَارْ إِتّثْوَاشقَّافْ شَا إِسمْ ن أَربِّي ذ ثْغُورِي نّسْ. ▪ 2 أجّْ إِسمْغَانْ نِّي غَارْ إِدْجْ إِمَاسنْ يُومْننْ وَارْ ثنْ سّحْقِيرِينْ، ؤُمِي نِيثْنِي ذ أَوْمَاثنْ نْسنْ. مَاشَا س ڒْعكْسْ أجّْ إِ-ثنْ أَذْ أَسنْ سخَّارنْ مِينْزِي نِيثْنِي ؤُمْننْ ؤُ أَقَا أَثنْ ذ أَوْمَاثنْ إِعِيزّنْ. سڒْمذْ مَانْ أَيَا ؤُ زِييَّارْ خَاسنْ. لْخَاطَارْ ن وَاطَّاسْ ن وَاڭْڒَا
3 مَاشَا مَاڒَا ذِينْ حذْ إِسّڒْمذْ إِشْثْ ن ڒْحَاجّثْ نّغْنِي ؤُشَا وَارْ يَاردّفْ شَا أَوَاڒنْ إِصحّنْ ن سِيذِيثْنغْ يشُّو لْمَاسِيحْ ذ ثْغُورِي ن وعْبذْ إِ أَربِّي س ؤُوقَّارْ، 4 أَقَا نتَّا إِتُّوفّْ أَمْ وَارْ إِسِّينْ وَالُو، إِودَّارْ ذڭْ إِمْحَارْوَاضنْ ذ إِمْشُوبّشنْ إِ-د-إِتَّاوْينْ ڒحْسذْ ذ ؤُمنْغِي ذ ؤُشقّفْ، ڒَا ذ إِشْثْ ن نّيّثْ ذ ثَاعفَّانْثْ، ▪ 5 ؤُڒَا ذ ثَامَارَا إِ د-يكِّينْ زڭْ إِوْذَانْ إِنِّي إِتّْوَاغشّنْ ذِي ڒعْقڒْ نْسنْ، ثْودَّارْ أَسنْ تِّيذثْ، إِتّْغِيڒْ أَسنْ أَقَا ڒفْضڒْ ذ أَعْبَاذْ ن أَربِّي س ؤُوقَّارْ. بعّذْ خَاسنْ. ▪ 6 وَاخَّا أَمنِّي أَقَا ڒفْضڒْ نّغْ ذ أَمقّْرَانْ أَمْ نعْبذْ أَربِّي س ؤُوقَّارْ أَمْ نقْنعْ س مِينْ نهْذَاجْ أَطَّاسْ. ▪ 7 مِينْزِي وَارْ د-نِيوِي وَالُو غَارْ دُّونشْثْ ؤُشَا أَقَا نسّنْ وَارْ نْزمَّارْ أَكِيذْنغْ نكْسِي وَالُو زَّايسْ. ▪ 8 س ؤُينِّي، مَاڒَا غَارْنغْ ڒْمعْثقْ ذ دُّورِي، أَقَا نقْنعْ. ▪ 9 مَاشَا إِنِّي إِخْسنْ أَذْ سّْمُوننْ أَڭْڒَا، أَذْ وْضَانْ ذڭْ إِغكّْوَانْ ؤُ ذِي ثْخشْفِينْ ؤُ ذڭْ وَاطَّاسْ ن نّشْوَاثْ ثِيفْغَاڒْ إِتّْضَارَّانْ، ثِينِّي إِتّجَّانْ إِوْذَانْ أَذْ غَارْقنْ ذڭْ ؤُثحِّي ذ ڒكْحضْ. ▪
10 مِينْزِي أَژْوَارْ ن مَارَّا ثُوعفّْنَا أَقَا ت ذ طّْمعْ ن ثْمنْيَاثْ، إِنِّي إِتّخْسنْ مَانْ أَيَا، إِودَّارْ أَسنْ لْ-إِيمَانْ ؤُشَا غضْرنْ-د خَاسنْ أَطَّاسْ ن ثَامَارَا. ▪
11 مَاشَا شكْ، أَ بْنَاذمْ ن أَربِّي، أَرْوڒْ زِي مَانْ أَيَا ؤُشَا أَرْزُو خْ ثْسڭْذَا، خْ ثْنِيشَانْثْ، خْ لْ-إِيمَانْ، خْ ثَايْرِي، خْ ضّْبَارْ ؤُڒَا خْ ثمْهِينْثْ. ▪
12 مْنغْ أَمنْغِي أَصبْحَانْ ن لْ-إِيمَانْ، شبَّارْ ذِي ثُوذَارْثْ إِتّْذُومَانْ، غَارْ ثْمسْڒَايِينْ نِّي ؤُمِي غَارْ د-ثتّْوَاڒَاغِيذْ، ذ ينِّي ؤُمِي ثْشهّْذذْ شّْهَاذثْ ثَاصبْحَانْثْ زَّاثْ إِ وَاطَّاسْ ن ڒشْهُوذْ. ▪
13 شهّْذغْ إِ شكْ زَّاثْ إِ أَربِّي، ونِّي إِوْشِينْ ثُوذَارْثْ إِ مَارَّا، ؤُ زَّاثْ إِ يشُّو لْمَاسِيحْ، ونِّي ثُوغَا إِشهّْذنْ شّْهَاذثْ ثَاصبْحَانْثْ أَطَّاسْ زَّاثْ إِ بُونْطِييُوسْ بِيلَاطُوسْ، ▪
14 حِيمَا أَذْ ثحْضِيذْ تّوْصيّثْ بْڒَا سُّوسّْ نِيغْ ڒْعِيبْ أَڒْ د غَا إِبَانْ سِيذِيثْنغْ يشُّو لْمَاسِيحْ.
15 نتَّا أَذْ إِتّْوَاسّضْهَارْ ذِي ڒْوقْثْ نّسْ: أَربِّي إِبَارْكنْ، أَمْزمَّارْ كُوڒْشِي خْ مَارَّا مِينْ إِدْجَانْ، أَجدْجِيذْ خْ مَارَّا إِجدْجِيذنْ ذ سِيذِي ن إِسِيذِيثنْ، ▪
16 ونِّي وحّْذسْ وَاهَا وَارْ إِفنِّينْ، ونِّي إِزدّْغنْ ذِي ثْفَاوْثْ إِ وَارْ إِزمَّارْ أَذْ غَارسْ يَاذفْ حذْ، ونِّي وَارْ إِژْرِي بْنَاذمْ نِيغْ إِزمَّارْ عَاذْ أَذْ ث إِژَارْ. إِ نتَّا ؤُمِي غَا إِدْجْ شَّانْ ذ صُّولْطَا إِ ڒبْذَا قَاعْ. أَمِينْ. ▪
17 عْڒمْ إِ أَيْثْبَابْ ن وَاڭْڒَا ذِي دُّونشْثْ-أَ وَارْ تِّيڒِينْ ذ إِمْعفَّارنْ ؤُڒَا أَذْ ثشْڒنْ خْ وَاڭْڒَا وَارْ يَاركّْننْ، مَاشَا أَذْ ثشْڒنْ خْ أَربِّي إِدَّارنْ ونِّي ذ أَنغْ إِتِّيشنْ مَارَّا ثِيمسْڒَايِينْ س ؤُفيّضْ حِيمَا نتّْوَافوّجْ، ▪
18 ؤُشَا أجّْ إِ-ثنْ أَذْ ڭّنْ ڒخْذَايمْ إِصبْحنْ، أَذْ غَارْسنْ إِڒِينْثْ ثْمڭَّا ثِيصبْحَانِينْ، أَذْ وجْذنْ مَاحنْذْ أَذْ وْشنْ ؤُ أَذْ شَارْشنْ.
19 مَاحنْذْ أَذْ سَّارْسنْ ذْسَاسْ أَصبْحَانْ إِ يِيخفْ نْسنْ إِ ڒْوقْثْ إِ د غَا يَاسنْ مَاحنْذْ أَذْ غَارْسنْ ثِيڒِي ثُوذَارْثْ ذ ثِيذتّْ. ▪