‏1 وَا ذ أَوَاڒْ ذَايسْ ڒَامَانْ: مَاڒَا حذْ إِخْسْ أَذْ إِذْوڒْ ذ أَمْغَارْ، أَقَا إِتّْمژْرِي ذڭْ إِشْثْ ن ڒْخذْمثْ ثشْنَا. ‏2 مَاشَا إِتّْخصَّا إِ ؤُمْغَارْ أَذْ يِيڒِي بْڒَا ڒْعِيبْ، أَذْ يِيڒِي ذ أَرْيَازْ ن إِشْثْ ن ثمْغَارْثْ، غَارسْ أَمكّنْ ن نّفْسْ، أَذْ يِيڒِي ذ أَسخَّايْ، أَذْ إِڭّْ س ؤُستّفْ، أَذْ يَارحّبْ س إِنوْجِيونْ، إِزمَّارْ أَذْ إِسّڒْمذْ، ^▪   ‏3 وَارْ إِتِّيڒِي ذ أَمسْشَارْ نِيغْ إِوّثْ ذغْيَا س إِفَاسّنْ، مَاشَا أَذْ يِيڒِي ذ أَمْوَاضعْ، وَارْ إِتّمْشُوبُّوشْ، وَارْ إِتِّيڒِي ذ أَقزَّازْ، ‏4 أَقَا نتَّا إِسّڭُّورْ ثَاوَاشُونْثْ نّسْ مْلِيحْ ؤُشَا إِحكّمْ خْ ثَارْوَا نّسْ س مَارَّا ڒصْفَايثْ. ‏5 مَاشَا مَاڒَا نتَّا وَارْ إِزمَّارْ أَذْ إِسُّويُورْ ثَاوَاشُونْثْ نّسْ، مَامّشْ إِ غَا إِڭّْ أَذْ إِحْضَا ثَامسْمُونْثْ ن أَربِّي؟ ‏6 وَارْ إِتّحْذِيجْ أَذْ يِيڒِي أَمحْضَارْ ذ جْذِيذْ ذِي لْ-إِيمَانْ، حِيمَا وَارْ إِتُّوفّْ س ڒفْيُوشْ ؤُشَا أَذْ إِوْضَا ذِي شّْرعْ ن شِّيطَانْ. ‏7 عَاوذْ إِتّْخصَّا أَذْ غَارسْ ثِيڒِي صُّومْعثْ ثشْنَا غَارْ ينِّي ذِي بَارَّا، حِيمَا وَارْ خَاسْ تّْعيِّيبنْ ؤُشَا وَارْ إِوطِّي شَا ذِي ثخْشفْثْ ن شِّيطَانْ.

‏8 إِتّْخصَّا عَاوذْ إِ إِمْسخَّارنْ ن ثْمسْمُونْثْ أَذْ إِڒِينْ سّكّْوَانْ، وَارْ سِّيوِيڒنْ شَا س ثْنَاينْ ن إِڒْسَاونْ، وَارْ خزَّارنْ شَا غَارْ بِينُو أَطَّاسْ، وَارْ ضمّْعنْ ذِي أَرْبحْ وَارْ إِحْڒِينْ، ^▪   ‏9 إِتّْخصَّا أَسنْ أَذْ طّْفنْ ذِي سِّيرّْ ن لْ-إِيمَانْ س ثْنفْسشْثْ ثصْفَا. ^▪  

‏10 أجّْ إِ-ثنْ أَذْ تّْوَاقدْجْبنْ ذ أَمزْوَارُو، ڒخْذنِّي، مَاڒَا إِبَانْ-د وَارْ ذَايْسنْ إِتِّيڒِي بُو ڒْعِيبْ، أَذْ سخَّارنْ.

‏11 أَمُّو إِتّْخصَّا ؤُڒَا إِ ثِيمْغَارِينْ أَذْ أَرْسِينْثْ، أَذْ حْضَانْثْ ذِي ڒعْقُوڒْ نْسنْثْ، أَذْ ذَايْسنْثْ ثِيڒِي ڒْمَانثْ ذِي مَارَّا، وَارْ ذ تِّيڒِينْثْ ذ ثِيمْشقَّافِينْ.

‏12 إِمْسخَّارنْ ن ثْمسْمُونْثْ أَذْ إِڒِينْ س إِشْثْ ن ثمْغَارْثْ وَاهَا، أَذْ سُّويُورنْ مْلِيحْ إِحنْجِيرنْ نْسنْ ذ ثَاوَاشُونْثْ نْسنْ.

‏13 مِينْزِي إِنِّي إِتّڭّنْ ثَاسيَّارْثْ نْسنْ مْلِيحْ، أَذْ طّْفنْ إِ يِيخفْ نْسنْ إِجّْ ن ومْشَانْ إِشْنَا ذ وَاطَّاسْ ن ثرْيَاسْثْ ذِي لْ-إِيمَانْ ن يشُّو لْمَاسِيحْ. ^▪  

‏14 ؤُرِيغْ أَشْ-د مَانْ أَيَا ؤُشَا سِّيثِيمغْ أَذْ غَاركْ د-أَسغْ ذغْيَا.

‏15 مَاشَا مَاڒَا عطَّاڒغْ خَاكْ، أَذْ ثسّْنذْ مَامّشْ إِتّْخصَّا أَذْ نُويُورْ ذِي ثَادَّارْثْ ن أَربِّي، ثنِّي إِدْجَانْ ذ ثَامسْمُونْثْ ن أَربِّي إِدَّارنْ، أَبِيلَارْ ذ ذْسَاسْ ن ثِيذتّْ.

‏16 سِّيرّْ وَانِيثَا ن ثْسڭْذَا ذ أَمقّْرَانْ س ثِيذتّْ!

”ذ ونِّي إِتّْوَاسَّارْڭْبنْ ذِي أَرِّيمثْ،

إِتّْوَاسڭّْذنْ ذِي أَرُّوحْ،

إِضْحَارنْ-د إِ لْمَالَاكَاثْ،

إِتّْوَابَارّْحنْ زَّايسْ جَارْ ڒڭْنُوسْ،

زَّايسْ يُومْننْ ذِي دُّونشْثْ،

إِمّكْسِينْ ذڭْ ؤُعُودْجِي.“ ^▪