144
1 ن ذَاوُوذْ. أَذْ إِتّْوَابَاركْ سِيذِي، ثَاصْضَارْثْ إِنُو،
ونِّي إِسّڒْمَاذنْ إِفَاسّنْ إِنُو إِ ؤُمنْغِي،
إِضوْضَانْ إِنُو إِ ڒْحَارْبْ. ▪
2 شكْ ذ ثَامخْسِيوْثْ إِنُو إِشوَّارنْ ذ لْپُورْجْ إِنُو،
لْپُورْجْ إِنُو يُوعْڒَانْ ذ أَمْسنْجمْ إِنُو،
ثَاسدَّارْثْ إِنُو إِ ؤُسڒْقِي ذ ونِّي خفْ تّشْڒغْ،
ذ ونِّي ذ أَيِي إِسّْوَاضْضْعنْ ڒْڭنْسْ إِنُو. ▪
3 أَ سِيذِي، مِينْ إِعْنَا بْنَاذمْ، أَقَا شكْ ثسّْنذْ ث،
مِّيسْ ن بْنَاذمْ، أَقَا شكْ ثْخَارِّيصذْ ذَايسْ؟ ▪
4 بْنَاذمْ ذ ڒفْوَارْ ذ إِجّنْ،
ؤُسَّانْ نّسْ أَذْ عْذُونْ أَمْ ثِيڒِي. ▪
5 ميّڒْ إِجنْوَانْ نّكْ، أَ سِيذِي، هْوَا-د.
حَاذَا إِذُورَارْ، خنِّي أَذْ ڭّنْ دّخَّانْ.▪
6 ژَترْيضْ أَسَّامنْ ؤُ زدْجعْ إِ-ثنْ،
سكّْ فْڒِيثْشَاثْ نّكْ ؤُ سْخَارْوضْ إِ-ثنْ. ▪
7 سْوِيژّضْ إِفَاسّنْ نّكْ زِي سنّجْ،
سُوفّغْ أَيِي-د ؤُ فكّْ أَيِي زِي ڒْحمْڒَاثْ ن وَامَانْ ثِيمقّْرَانِينْ،
زڭْ ؤُفُوسْ ن إِبَارَّانِييّنْ،
8 مَاغَارْ أَقمُّومْ نْسنْ إِقَّارْ إِخَارِّيقنْ،
أَفُوسْ نْسنْ أَفُوسِي ذ إِجّْ ن ؤُفُوسْ إِشُّورْ س ڒْغشّْ.
9 أَ أَربِّي، أَذْ أَشْ غنّْجغْ إِجّْ ن يزْڒِي ذ ن جْذِيذْ إِ شكْ،
س لْهَارْبَا ؤُ س لْعُوذْ س عشْرَا ن إِفِيڒَانْ أَذْ أَشْ زهّْذغْ.
10 شكْ ذ ونِّي إِسَّاوَاضنْ أَسنْجمْ إِ إِججْدْجِيذنْ،
ذ ونِّي إِفكّنْ أَمْسخَّارْ نّسْ ذَاوُوذْ زِي سِّيفْ أَعفَّانْ.
11 سُوفّغْ أَيِي-د ؤُ فكّْ أَيِي زڭْ ؤُفُوسْ ن ثَارْوَا ن ؤُبَارَّانِي،
زڭْ ونِّي غَارْ إِدْجْ ؤُقمُّومْ إِقَّارْ مْغِيرْ إِخَارِّيقنْ،
ؤُ زڭْ ونِّي غَارْ إِدْجْ ؤُفُوسْ أَفُوسِي إِشُّورْ س ڒْغشّْ،
12 حِيمَا إِحنْجِيرنْ نّغْ أَذْ إِڒِينْ أَمْ إِغذِّيونْ،
إِنِّي إِمْغَارنْ عَاذْ ذِي ثمْژِي نْسنْ،
يسِّيثْنغْ أَمْ ثْغمَّارْ إِ ڭِّينْ س ؤُكشُّوضْ س عْڒَامْ كُوڒْ أَرْشَامنْ،
ڭِّينْ ثنْ إِ يِيشْثْ ن زَّاوشْثْ إِقدّْسنْ.
13 مَاعْلِيكْ ڒهْرِيثْ نّغْ شُّورنْ،
أَذْ وْشنْ زَّاذْ أَوَارْنِي زَّاذْ،
أَذْ يَارْنِي وُودْجِي نّغْ س ڒُوڒُوفْ ن ثْسقَّارْ،
س عشْرَا ن ڒُوڒُوفْ ن ثْسقَّارْ ذِي دّْمَانِي ن ثَاروْسَا نّغْ.
14 أَذْ حمْڒنْ إِمْوَانْ نّغْ مْلِيحْ،
وَارْ إِطِّيڒِي عَاذْ ؤُهْجَامْ نِيغْ ذ ؤُفُّوغْ إِ ؤُمنْغِي
ؤُڒَا ذ إِغُويَّانْ ذڭْ إِمسْرَاقْ نّغْ.
15 سّعْذْ ن ڒْڭنْسْ نِّي إِدْجَانْ أَمْيَا.
سّعْذْ ن ڒْڭنْسْ نِّي زِي أَربِّي نْسنْ ذ سِيذِي.