أَوَاڒنْ إِوزْننْ
1
1 أَوَاڒنْ إِوزْننْ ن سُولِيمَانْ، مِّيسْ ن ذَاوُوذْ، أَجدْجِيذْ ن إِسْرَائِيل، 2 حِيمَا أَذْ إِسّنْ بْنَاذمْ ثِيغِيثْ ذ تَّارْبِييّثْ،
حِيمَا أَذْ إِفْهمْ أَوَاڒنْ شُّورنْ س ڒفْهَامثْ،
3 حِيمَا أَذْ إِقْبڒْ تَّارْبِييّثْ ذ ڒعْقڒْ،
ثَاسڭْذَا ذ ڒْحقّْ ذ ڒصْفَايثْ،
4 حِيمَا أَذْ إِوْشْ أَسْفَارْزْ إِ إِحَافِييّنْ،
ثُوسّْنَا ذ ؤُحَاذُورْ إِ ؤُحُوذْرِي.
5 أجّْ أَمِيغِيسْ أَذْ إِسڒْ ؤُ أَذْ يَارْنِي ذِي ڒفْهَامثْ نّسْ،
أجّْ ونِّي إِفهّْمنْ أَذْ إِكْسبْ ڒقْنَاعثْ،
6 حِيمَا أَذْ إِفْهمْ أَوَاڒْ إِوزْننْ ذ لْمَاثَالْ،
أَوَاڒنْ ن إِمِيغِيسنْ ذ ڒمْعَانِي إِنُّوفَارنْ نْسنْ.
7 ثِيڭّْوُوذِي ن سِيذِي ذ بدُّو ن ثُوسّْنَا،
مَاشَا إِپُوهَاڒِييّنْ سّحْقَارَانْ ثِيغِيثْ ذ تَّارْبِييّثْ. ▪
8 سڒْ، أَ مِّي، غَارْ تَّارْبِييّثْ ن بَابَاشْ،
وَارْ تَّاڭِي شَا ثَاغُورِي ن يمَّاشْ،
9 مَاغَارْ نِيثنْثِي أَذْ إِڒِينْثْ ذ تَّاجْ إِشْنَا خْ ؤُزدْجِيفْ نّكْ،
ذ ثْسدّْيِينْ إِزوّْقنْ إِ يِيرِي نّكْ.
10 أَ مِّي إِنُو، مَاڒَا خْسنْ إِمذْنَابْ أَذْ شكْ غْوَانْ،
وَارْ ذ أَسنْ تّڭّْ شَا أَرَّايْ.
11 مَاڒَا نِيثْنِي قَّارنْ:
”ؤُيُورْ أَكِيذْنغْ، أجّْ أَذْ نْحَامَا إِ ؤُسِيزّڒْ ن إِذَامّنْ،
أجّْ أَنغْ أَذْ نڭّْ إِشْثْ ن ثخْشفْثْ إِ ؤُمزْذَاڭْ، بْڒَا سِّيبّثْ.
12 أجّْ أَنغْ أَذْ ثنْ نْصَارْضْ أَمْ دَّارنْ، أَمْ مَامّشْ ثْصَارضْ ڒَاخَارْثْ،
أَمْ كمْڒمْ، أَمشْنَاوْ ينِّي إِهكّْوَانْ ذڭْ وحْفُورْ ن ونْضڒْ.
13 أَذْ نَافْ مَارَّا ڒحْوَايجْ يِيغْڒَانْ أَطَّاسْ،
ثُوذْرِينْ نّغْ أَذْ ثنْثْ نشُّورْ س ثْكشَّاضْثْ.
14 شكْ أَذْ ثنْضَارذْ ثَاقدُّوحْثْ نّكْ جَارْ أَنغْ،
أَذْ غَارْنغْ ثِيڒِي مَارَّا إِشْثْ ن ثشْيَارْثْ.“
15 أَ مِّي إِنُو، وَارْ كِيذْسنْ ڭُّورْ ذڭْ وبْرِيذْ،
سِيڭّْوجْ أَضَارْ نّكْ خْ ؤُمسْرُوقْ نْسنْ،
16 مَاغَارْ إِضَارنْ نْسنْ تَّازّْڒنْ غَارْ ڒْغَارْ،
ؤُ نِيثْنِي تّْقدْجِيقنْ مَاحنْذْ أَذْ سِّيزّْڒنْ إِذَامّنْ. ▪
17 مَاغَارْ س ڒْبَاطڒْ أَذْ ثتّْوَابزّعْ ثْرَاشَّا،
زَّاثْ إِ ثِيطَّاوِينْ ن مَارَّا مِينْ غَارْ إِدْجْ وَافْرِيونْ،
18 مَاغَارْ نِيثْنِي تّْحَامَانْ إِذَامّنْ ن يِيخفْ نْسنْ،
ؤُ تّڭّنْ ثَاخْشفْثْ إِ ڒعْمُورْ ن يِيخفْ نْسنْ.
19 أَمُّو إِ إِدْجَانْ إِبْرِيذنْ ن كُوڒْ إِجّْ ونِّي إِتَّازّْڒنْ غَارْ أَرْبحْ،
أَقَا أَيَا إِتّطّفْ ڒعْمَارْ ن سِيذِيسْ. ▪
20 ثِيغِيثْ ثْبَارّحْ س جّْهذْ ذِيهَا بَارَّا،
ثسّْڭعّذْ ثْمِيجَّا نّسْ ذڭْ وَازَّاينْ.
21 مَانِي إِبْذَا ڒْهَارَاجْ، ثتّْبَارَّاحْ نتَّاثْ،
غَارْ وَاذَافنْ ن ثوُّورَا ن ثنْذِينْثْ ثسَّاوَاڒْ أَوَاڒنْ نّسْ.
22 ”أَڒْ مڒْمِي إِ غَا قِّيمنْ إِحَافِييّنْ تّخْسنْ ثَاقُوبَّانشْثْ،
أَڒْ مڒْمِي إِ ذ أَسنْ إِ غَا إِعْجبْ ؤُحشِّي إِ إِمسْثهْزَاينْ،
ؤُ أَڒْ مڒْمِي إِ غَا شَارْهنْ إِپُوهَاڒِييّنْ ثُوسّْنَا؟
23 ذوْڒمْ غَارْ ؤُوبّخْ إِنُو!
خْزَارمْ، نشّْ أَذْ خَاومْ سّْفَارّْغغْ أَرُّوحْ إِنُو،
أَوَاڒنْ إِنُو أَذْ أَومْ ثنْ عڒْمغْ.“
24 ”أَقَا زعْمَا ڒَاغِيغْ ؤُ كنِّيوْ وَارْ ثخْسمْ،
سّْوِيژّْضغْ نشّْ أَفُوسْ إِنُو، مَاشَا ؤُڒَا ذ إِجّْ وَارْ ذ أَسْ إِحكَّارْ. ▪
25 ثنْضَارمْ شّْوَارْ إِنُو،
أَوبّخْ إِنُو وَارْ ث ثقْبِيڒمْ.
26 س ؤُينِّي ؤُڒَا ذ نشّْ أَذْ ضحْشغْ خْ ؤُضيّعْ نْومْ،
نشّْ أَذْ زَّايْومْ سْثهْزغْ خْمِي د غَا يَاسْ ؤُنخْڒِيعْ نْومْ،
27 خْمِي د غَا يَاسْ ؤُنخْڒِيعْ نْومْ أَمْ يِيجّْ ن ؤُردّدْجْ،
أَضيّعْ نْومْ أَمْ إِشْثْ ن ثْحَارْيَاضْثْ،
خْمِي خَاومْ د غَا ثوْضَا ڒحْصَارثْ ذ ثڭّْوُوذِي. ▪
28 خنِّي أَذْ خَافِي د-ڒَاغَانْ، مَاشَا نشّْ وَارْ د-تَّارِّيغْ،
أَذْ خَافِي أَرْزُونْ، مَاشَا وَارْ ذ أَيِي تِّيفنْ،
29 مِينْزِي نِيثْنِي شَارْهنْ ثُوسّْنَا،
ؤُ وَارْ إِخْضَارنْ أَذْ طّْفنْ ذِي ثِيڭّْوُوذِي ن سِيذِي.
30 نِيثْنِي وَارْ خْسنْ شَا ڒشْوَارْ إِنُو،
مَارَّا أَوبّخْ إِنُو نْضَارنْ ث.
31 نِيثْنِي أَذْ شّنْ زِي ڒْغِيدْجثْ ن وبْرِيذْ نْسنْ،
ؤُ أَذْ جِّيوْننْ س إِخَارِّيصنْ ن يِيخفْ نْسنْ،
32 مِينْزِي ؤُفُوغْ ن إِحَافيّنْ خْ وبْرِيذْ أَذْ ثنْ إِنغْ،
ؤُ أَفْڒَاحْ ن إِپُوهَاڒِييّنْ أَذْ ثنْ إِسّْهلّكْ.
33 وِي غَارِي إِ غَا إِسْڒنْ، أَذْ إِزْذغْ ذِي ڒَامَانْ،
أَذْ يَاريّحْ زڭْ ؤُنخْڒِيعْ ن ثُوعفّْنَا.“