‏1 مِّي إِنُو، مَاڒَا ثْقبْڒذْ أَوَاڒنْ إِنُو

ؤُ ثحْضِيذْ ثِيوصَّا إِنُو غَاركْ،

‏2 مَاحنْذْ أَمزُّوغْ نّكْ أَذْ إِوْشْ ثَايْنِيثْ إِ ثِيغِيثْ،

ؤُڒْ نّكْ أَذْ إِميّڒْ غَارْ ڒفْهَامثْ،

‏3 وَاهْ مَاڒَا ثتّْڒَاغِيذْ-د خْ ڒعْقڒْ،

أَذْ ثسّْخذْمذْ ثْمِيجَّا نّكْ مَاحنْذْ أَذْ ثَافذْ ڒفْهَامثْ،

‏4 مَاڒَا ثَارزُّوذْ خَاسْ أَمْ ثَارزُّوذْ خْ نُّوقَارْثْ،

مَاڒَا خَاسْ ثَارزُّوذْ أَمْ خْ ثْخُوبَايْ إِنُّوفَّارنْ، ^▫  ▪  

‏5 خنِّي أَذْ ثْفهْمذْ إِ ثِيڭّْوُوذِي ن سِيذِي،

ؤُ أَذْ ثَافذْ ثُوسّْنَا ن أَربِّي.

‏6 مَاغَارْ سِيذِي إِتِّيشْ ثِيغِيثْ،

زڭْ ؤُقمُّومْ نّسْ ثتّفّغْ-د ثُوسّْنَا ذ ڒفْهَامثْ. ^▪  

‏7 إِ ينِّي إِڭُّورنْ نِيشَانْ إِسّوْجذْ أَسنْ ثْوِيزَا،

إِ ينِّي إِڭُّورنْ ذِي ڒكْمَارثْ إِسّوْجذْ أَسنْ أَذُورِّي،

‏8 حِيمَا أَذْ قِّيمنْ تّطّْفنْ ذڭْ إِمسْرَاقْ نْ ڒْحقّْ،

ؤُ نتَّا أَذْ إِسَّارْ أَبْرِيذْ ن إِمدُّوكَّاڒْ نّسْ إِمْثِيقَّانْ.

‏9 خنِّي أَذْ ثْفهْمذْ ثَاسڭْذَا ذ ڒْحقّْ،

ؤُڒَا ذ ڒصْفَايثْ،

كُوڒْ ڒَاثَارْ إِصبْحنْ.

‏10 مَاغَارْ ثِيغِيثْ أَذْ ثَاذفْ غَارْ وُوڒْ نّكْ،

ؤُ ثُوسّْنَا أَذْ ثَارْضَا خْ ڒعْمَارْ نّكْ.

‏11 أَحَاذُورْ أَذْ خَاكْ إِحْضَا،

ڒفْهَامثْ أَذْ خَاكْ ثسَّارْ،

‏12 ... مَاحنْذْ أَذْ شكْ ثْفكّْ زڭْ وبْرِيذْ ن ؤُعفَّانْ،

زڭْ ورْيَازْ نِّي إِقدْجْبنْ أَوَاڒْ نّسْ.

‏13 زڭْ إِنِّي إِسمْحنْ ذڭْ إِمسْرَاقْ إِسڭّْمنْ،

مَاحنْذْ أَذْ ؤُيُورنْ إِبْرِيذنْ ن ثَادْجسْثْ،

‏14 إِنِّي إِفَارّْحنْ مَاحنْذْ أَذْ ڭّنْ ڒْغَارْ،

ؤُ سّْڒِيوْڒِيونْ خْ ڒخْذَاعَاثْ ن ڒْغَارْ،

‏15 ن يِينِّي إِدْجَانْ إِمسْرَاقْ نْسنْ فَارْغنْ،

ذ يِينِّي إِميّْڒنْ سَّا ذ سَّا ذِي ڒَاثَارَاثْ ن يِيخفْ نْسنْ.

‏16 ... مَاحنْذْ أَذْ شكْ ثْفكّْ زِي ثمْغَارْثْ ثْبَارَّانشْثْ،

زِي ثمْغَارْثْ زِي بَارَّا إِ إِتّْغَارَّانْ س وَاوَاڒنْ نّسْ، ^▪  

‏17 ثنِّي إِسمْحنْ ذڭْ ؤُمدُّوكّڒْ ن ثمْژِي نّسْ،

ؤُ ثتُّو ڒْعَاهْذْ ن أَربِّي نّسْ.

‏18 مِينْزِي ثْهكّْوَا غَارْ ڒْموْثْ جْمِيعْ أَكْ-ذ ثَادَّارْثْ نّسْ،

ؤُ ڒَاثَارَاثْ نّسْ هكّْوَانْثْ غَارْ ڒخْيَاڒَاثْ ن إِمتَّانْ.

‏19 مَارَّا إِنِّي غَارسْ غَا يَاذْفنْ، وَارْ د-إِتّْعِيقِّيبنْ عمَّارْصْ،

وَارْ تَّاكّْوَاضنْ عمَّارْصْ غَارْ إِمسْرَاقْ ن ثُوذَارْثْ.

‏20 ... حِيمَا أَذْ ثُويُورذْ أَبْرِيذْ ن إِصبْحَاننْ،

ؤُ أَذْ ثطّْفذْ ذڭْ إِمسْرَاقْ ن إِمْسڭَّاذنْ،

‏21 مَاغَارْ إِنِّي إِڭُّورنْ نِيشَانْ أَذْ زذْغنْ ذِي ثمُّورْثْ،

ؤُ إِنِّي إِڭُّورنْ س ڒكْمَارثْ أَذْ ذَايسْ قِّيمنْ. ^▪  

‏22 إِعفَّاننْ أَذْ تّْوَاقضْعنْ زِي ثمُّورْثْ،

إِغدَّارنْ أَذْ زَّايسْ تّْوَاقڒْعنْ. ^▪