ثِيغِيثْ ذِي ثُوذَارْثْ ن كُوڒْ أَسّْ
3
1 مِّي إِنُو، وَارْ تّتُّو ثَاغُورِي إِنُو ن شَّارِيعَا، أجّْ ؤُڒْ نّكْ أَذْ إِحْضَا ثِيوصَّا إِنُو.
2 مَاغَارْ نِيثنْثِي أَذْ أَشْ د-أَوْينْ أَطَّاسْ ن وُوسَّانْ،
ؤُڒَا ذ إِسڭّْوُوسَا ن ثُوذَارْثْ ذ ڒهْنَا. ▪
3 ثَامخْسِيوْثْ إِشوَّارنْ ذ ڒَامَانْ وَارْ ثنْ ثجِّيذْ أَذْ زَّايكْ فّْغنْ.
قّنْ إِ-ثنْ غَارْ يِيرِي نّكْ، أَرِي ثنْ خْ ثڒْوِيحْثْ ن وُوڒْ نّكْ ▪
4 ؤُ أَفْ أَڒْضَا ؤُ سْشنْ ڒفْهَامثْ إِصبْحنْ،
ذِي ثِيطَّاوِينْ ن أَربِّي ؤُ ن بْنَاذمْ.
5 ثِيقّْ ذِي سِيذِي س وُوڒْ نّكْ كُوڒْشِي،
وَارْ تّْشَاڒَا خْ ڒفْهَامثْ ن يِيخفْ نّكْ.
6 سّنْ إِ-ث ذِي مَارَّا إِبْرِيذنْ نّكْ،
خنِّي نتَّا أَذْ إِسڭّمْ إِمسْرَاقْ نّكْ. ▪
7 وَارْ تّڭّْ إِخفْ نّكْ ذ أَمِيغِيسْ.
ڭّْوذْ سِيذِي ؤُ بعّذْ خْ مِينْ إِدْجَانْ ذ أَعفَّانْ. ▪
8 أَيَا أَذْ يِيڒِي ذ أَڭنْفُو إِ إِژوْرَانْ ن ثُوذَارْثْ نّكْ،
ذ ثِيسِّي إِ إِخْسَانْ نّكْ.
9 وقَّارْ سِيذِي س وَاڭْڒَا نّكْ،
س ثْمزْوَارُوثْ ن مَارَّا صَّابثْ نّكْ. ▪
10 خنِّي أَذْ تّْوَاشُّورنْ ڒهْرِيثْ نّكْ س ؤُفيّضْ،
ثِيسِيرِينْ ن ؤُضِيڒْ أَذْ سّفْينْثْ س بِينُو ن جْذِيذْ. ▪
11 مِّي إِنُو، وَارْ نطَّارْ تَّارْبِييّثْ ن سِيذِي،
وَارْ تَّارَّا أَعْرُورْ خْ ؤُوبّخْ نّسْ، ▪
12 مَاغَارْ ونِّي إِسّْعِيزَّا سِيذِي أَذْ ث إِعَاقبْ عَاوذْ،
أَمْ إِتّڭّْ بَابَاسْ أَكْ-ذ مِّيسْ ونِّي خْ يَارْضَا. ▪
13 سّعْذْ ن بْنَاذمْ نِّي إِتَّافنْ ثِيمسّْنَا،
ؤُڒَا ذ بْنَاذمْ نِّي إِتّْكسَّابنْ ڒفْهَامثْ،
14 مَاغَارْ ثَاسبَّابْثْ نّسْ ثحْڒَا خْ ثْسبَّابْثْ ذِي نُّوقَارْثْ،
ؤُ ڒْغِيدْجثْ نّسْ ثحْڒَا خْ وُورغْ إِتِّيسِّيقنْ، ▪
15 نتَّاثْ ثِيغْڒَا خْ ڒْمَارْجَانْ،
ؤُ مَارَّا مِينْ ذِي ثْزمَّارذْ أَذْ ثمّژْرذْ،
وَارْ إِزمَّارْ أَكِيذسْ إِمّْقُودَّا. ▪
16 ثُوزّڭَّارْثْ ن وُوسَّانْ غَارسْ ذڭْ ؤُفُوسْ نّسْ،
أَڭْڒَا ذ شَّانْ أَقَا أَثنْ خْ ؤُزڒْمَاضْ نّسْ،
17 إِبْرِيذنْ نّسْ ذ إِبْرِيذنْ ن ڒضْرَافثْ،
ؤُ مَارَّا إِمسْرَاقْ نّسْ أَقَا أَثنْ ذ ڒهْنَا.
18 نتَّاثْ ذ ثَاشجَّارْثْ ن ثُوذَارْثْ إِ ينِّي غَارسْ إِڒسْقنْ،
كُوڒْ إِجّنْ ونِّي ذَايسْ إِتّطّْفنْ، أَذْ يِيڒِي ذ أَمسْعُوذْ. ▫
19 سِيذِي إِڭَّا ذْسَاسْ ن ثمُّورْثْ س ثِيغِيثْ نّسْ،
س ڒفْهَامثْ نّسْ إِڭَّا إِجنْوَانْ.
20 زِي ثُوسّْنَا نّسْ دُّوقّْزنْ-د أَمَانْ يُودْجْغنْ،
تّْنشْنِيشنْ-د إِسيْنُوثنْ نّْذَا. ▪
21 مِّي إِنُو، وَارْ ثنْثْ ثجِّيذْ أَذْ فّْغنْثْ زِي ثِيطَّاوِينْ نّكْ،
حْضَا أَفْثَانْ ذ ؤُحَاضُورْ، ▫
22 مَاغَارْ أَذْ إِڒِينْ ذ ثُوذَارْثْ إِ ڒعْمَارْ نّكْ،
ؤُڒَا ذ أَرْضَا إِ يِيرِي نّكْ.
23 خنِّي أَذْ ثُويُورذْ أَبْرِيذْ نّكْ ذِي ڒَامَانْ،
ؤُ وَارْ ثتّْنقْرِيضذْ ذڭْ ؤُضَارْ نّكْ. ▪
24 مَاڒَا ثْرُوحذْ أَذْ ثزّْڒذْ، وَارْ ڭُّورْ أَذْ ثنْخڒْعذْ،
ؤُ خْمِي إِ غَا ثزّْڒذْ، ڭُّورْ أَذْ يِيژِيذْ يِيضسْ نّكْ. ▪
25 وَارْ تّڭّْوذْ زڭْ ؤُنخْڒِيعْ ن ذغْيَا،
ؤُڒَا زڭْ وَاريّبْ س ؤُفُوسْ ن إِعفَّاننْ خْمِي د غَا يَاسْ. ▪
26 مَاغَارْ سِيذِي أَذْ أَشْ يِيڒِي ذ أَسنّذْ نّكْ،
نتَّا أَذْ إِحْضَا أَفُوسْ نّكْ زِي ثْسَارِّيفْثْ.
27 وَارْ قطّعْ ڒْخَارْ خْ بَابْ نّسْ،
مَاڒَا أَقَا-ث ذڭْ ؤُفُوسْ نّكْ مَاحنْذْ أَذْ ث ثڭّذْ.
28 وَارْ قَّارْ إِ ؤُمْقَارّبْ نّكْ:
’رُوحْ ؤُشَا عْقبْ-د، ثِيوشَّا أَذْ أَشْ-ت وْشغْ!‘،
مَاڒَا ثَامسْڒَاشْثْ أَقَا-ت أَكِيذكْ.
29 وَارْ نكّْوِي ڒْغَارْ أَكْ-ذ ؤُمْقَارّبْ نّكْ،
ؤُمِي أَكِيذكْ إِزدّغْ ذِي ڒَامَانْ.
30 وَارْ ثمْشُوبُّوشْ أَكْ-ذ إِجّْ ن بْنَاذمْ بْڒَا سِّيبّثْ،
مَاڒَا نتَّا وَارْ ذ أَشْ إِڭِّي ڒْغَارْ.
31 وَارْ تَّاسمْ زڭْ إِجّْ ن بُو-ڒخْشُونثْ،
حْضَا مَاحنْذْ وَارْ ثتِّيخْضَارذْ ؤُڒَا ذ إِجّْ زِي مَارَّا إِبْرِيذنْ نّسْ. ▪
32 مَاغَارْ ونِّي إِتّفّْغنْ زڭْ وبْرِيذْ، أَقَا-ث ذ نّْعِي إِ سِيذِي،
مَاشَا نتَّا إِتّڭّْ ڒَامَانْ نّسْ ذڭْ إِنِّي إِڭُّورنْ نِيشَانْ. ▪
33 نّعْڒثْ ن سِيذِي أَقَا-ت خْ ثَادَّارْثْ ن ؤُعفَّانْ،
مَاشَا ثَازذِّيغْثْ ن إِمْسڭَّاذنْ أَذْ ت إِبَاركْ. ▪
34 مَاڒَا ذ إِمسْثهْزَاينْ، أَذْ زَّايْسنْ إِسّْثهْزَا نتَّا،
مَاشَا مَاڒَا ذ إِنِّي إِتّْوَاحْصَارنْ، أَذْ أَسنْ إِسْشنْ أَرْضَا نّسْ. ▪
35 إِمِيغِيسنْ أَذْ وَارْثنْ شَّانْ،
مَاشَا إِپُوهَاڒِييّنْ أَذْ سَّارْپُونْ ڒفْضِيحثْ خْ يِيخفْ نْسنْ.