أڭّْ ؤُڒْ نّكْ خْ ثِيغِيثْ
4
1 سْڒمْ، كنِّيوْ إِحنْجِيرنْ، غَارْ تَّارْبِييّثْ ن بَابَاثْومْ، حكَّارمْ مْلِيحْ مَاحنْذْ أَذْ ثكْسِيمْ ثُوسّْنَا س ڒفْهَامثْ،
2 مَاغَارْ نشّْ أَذْ أَومْ وْشغْ ثَاغُورِي إِصبْحنْ،
وَارْ سمّْحمْ ذِي ثْغُورِي إِنُو.
3 مَاغَارْ نشّْ ثُوغَا أَيِي ذ مِّيسْ إِ بَابَا،
أَرقَّاغْ ذ ؤُينِّي ن مِّيسْ زَّاثْ إِ وُوذمْ ن يمَّا، ▪
4 ؤُشَا نتَّا إِسّڒْمذْ أَيِي، إِنَّا أَيِي:
”أجّْ ؤُڒْ نّكْ أَذْ إِطّفْ ذڭْ وَاوَاڒنْ إِنُو،
حْضَا ثِيوصَّا إِنُو، خنِّي أَذْ ثدَّارذْ!“ ▪
5 جْبذْ-د غَاركْ ثِيغِيثْ، جْبذْ-د غَاركْ ڒعْقڒْ،
وَارْ ثتُّو ؤُ وَارْ ثْحيِّيذْ خْ وَاوَاڒنْ ن ؤُقمُّومْ إِنُو.
6 وَارْ سمّحْ ذِي ثِيغِيثْ، خنِّي نتَّاثْ أَذْ شكْ ثحْضَا،
سْعِيزّْ إِ-ت ؤُ نتَّاثْ أَذْ شكْ ثسَّارْ. ▫
7 بدُّو ن ثِيغِيثْ ذ ؤُضُوفْ ن ثِيغِيثْ،
أَقَا أَذْ ثطّْفذْ ڒفْهَامثْ س مَارَّا مِينْ غَاركْ. ▪
8 سْڭعّذْ إِ-ت-إِ-د، خنِّي نتَّاثْ أَذْ شكْ ثسّْڭعّذْ،
نتَّاثْ أَذْ أَشْ ثڭّْ شَّانْ مَاڒَا ثْذَارّْعذْ أَسْ.
9 نتَّاثْ أَذْ أَشْ ثوْشْ إِشْثْ ن ثمْرِيسْثْ ثشْنَا خْ ؤُزدْجِيفْ نّكْ،
أَذْ أَشْ ثوْشْ إِجّْ ن تَّاجْ إِزوّْقنْ. ▪
10 سڒْ، أَ مِّي إِنُو، ؤُ كْسِي أَوَاڒنْ إِنُو،
خنِّي أَذْ مَّارْنِينْ إِسڭّْوُوسَا ن ثُوذَارْثْ نّكْ.
11 سّْڒمْذغْ أَشْ أَبْرِيذْ ن ثِيغِيثْ،
نذْهغْ شكْ ذِي ڒَاثَارَاثْ إِسڭّْمنْ.
12 مَاڒَا ثُويُورذْ، أَصُورِيفْ نّكْ وَارْ إِتّْنحْصَّارْ،
مَاڒَا ثَازّْڒذْ، وَارْ تّْنقْرِيضذْ.▪
13 شبَّارْ ذِي تَّارْبِييّثْ، وَارْ خَاسْ ثمّْسبْضَا،
حْضَا ت، مَاغَارْ نتَّاثْ ذ ثُوذَارْثْ نّكْ.
14 وَارْ ڭُّورْ خْ ؤُمسْرُوقْ ن إِعفَّاننْ،
وَارْ تِّيذِيفْ أَبْرِيذْ ن يِينِّي إِتّڭّنْ ڒْغَارْ، ▪
15 حيّذْ خَاسْ، وَارْ خَاسْ ڭُّورْ،
فّغْ زَّايسْ ؤُ ڭّْوجْ خَاسْ.
16 مَاغَارْ نِيثْنِي وَارْ تّطّْسنْ أَمْ وَارْ زمَّارنْ أَذْ ڭّنْ ثُوعفّْنَا،
إِتّْرَاحْ أَسنْ إِضسْ نْسنْ مَاڒَا وَارْ سّْنقْرِيضنْ حذْ عَاذْ،
17 مَاغَارْ نِيثْنِي تّتّنْ أَغْرُومْ ن ڒْغشّْ،
ؤُ سسّنْ بِينُو زِي ثْمڭَّا ن ڒخْشُونشْثْ.
18 أَمسْرُوقْ ن إِمْسڭَّاذنْ أَمْ ثْفَاوْثْ إِتِّيسِّيقنْ ن ثفُّوثْ،
ثنِّي ثَارنِّي ذڭْ ؤُسقْسقْ غَارسْ أَڒْ إِمْغَارْ وَاسّْ قَاعْ.
19 أَبْرِيذْ ن إِعفَّاننْ أَمْ ثَادْجسْثْ،
نِيثْنِي وَارْ سِّيننْ مِينْ ذِي إِ غَا نْقَارْضنْ.
20 مِّي إِنُو، أوْشْ ثَايْنِيثْ إِ وَاوَاڒنْ إِنُو،
أوْشْ أَمزُّوغْ نّكْ إِ وَاوَاڒنْ إِنُو،
21 وَارْ ثنْ تّجَّا أَذْ غفْڒنْ زِي ثِيطَّاوِينْ نّكْ،
خمّڒْ إِ-ثنْ ذَاخڒْ ذڭْ وُوڒْ نّكْ،
22 مَاغَارْ نِيثْنِي ذ ثُوذَارْثْ إِ ونِّي ثنْ إِ غَا يَافنْ،
ؤُڒَا ذ أَڭنْفُو إِ أَرِّيمثْ نّسْ مَارَّا. ▪
23 حْضَا ؤُڒْ نّكْ خْ مَارَّا مِينْ إِزمَّارْ أَذْ إِتّْوَاحْضَا،
مَاغَارْ زَّايسْ فّْغنْ إِژوْرَانْ ن ثُوذَارْثْ.
24 كّسْ إِخَارِّيقنْ ن ؤُقمُّومْ نّكْ،
سْبعّذْ خَاكْ أَفَارْيضْ ن إِينْشِيشنْ نّكْ.
25 أجّْ ثِيطَّاوِينْ نّكْ أَذْ خْزَارنْثْ غَارْ زَّاثْ،
أجّْ أَبْڒِيونْ نّكْ أَذْ خْزَارنْ غَارْ مِينْ إِدْجَانْ أَرنْذَاذْ نّكْ.
26 وَاطَا ڒَاثَارْ ن ؤُضَارْ نّكْ،
أجّْ أَذْ إِڒِينْ مَارَّا إِبْرِيذنْ نّكْ سَارّْحنْ.
27 وَارْ فَارّغْ غَارْ يفُّوسْ ؤُڒَا غَارْ ؤُزڒْمَاضْ،
سْبعّذْ أَضَارْ نّكْ زِي ثُوعفّْنَا. ▪