‏1 مِّي إِنُو، أوْشْ ثَايْنِيثْ إِ ثِيغِيثْ إِنُو،

أوْشْ أَمزُّوغْ إِ ڒفْهَامثْ إِنُو،

‏2 مَاحنْذْ أَذْ ثوْشذْ حَاضُورْ،

ؤُ إِينْشِيشنْ نّكْ أَذْ حْضَانْ خْ ثُوسّْنَا.

‏3 مِينْزِي إِينْشِيشنْ ن ثمْغَارْثْ ثَابَارَّانِيثْ تُّوذُومنْ س ثَامّنْثْ ن ثغْرَاصْثْ ،

أَنغْ نّسْ ذ أَڒقَّاغْ خْ زّشْثْ، ^▪  

‏4 مَاشَا غَارْ ؤُنڭَّارْ أَقَا-ت ذ ثَامرْزَاڭْثْ أَمْ شِّيحْ،

ثقْضعْ أَمْ إِجّْ ن سِّيفْ س ثْنَاينْ ن وُوذْمَاونْ.

‏5 إِضَارنْ نّسْ تَّاوْينْ غَارْ ڒْموْثْ

ؤُ إِصُورَافْ نّسْ ندّْهنْ غَارْ ڒَاخَارْثْ. ^▪  

‏6 أَڒَامِي وَارْ ثطِّيفذْ عمَّارْصْ أَبْرِيذْ ن ثُوذَارْثْ،

ڭُّورنْ إِصُورَافْ نّسْ سَّا ذ سَّا بْڒَا مَا ثسّْنذْ شكْ.

‏7 خنِّي ڒخُّو، أَ إِحنْجِيرنْ، سْڒمْ-د غَارِي،

وَارْ ثْحيَّاذمْ شَا خْ وَاوَاڒنْ ن ؤُقمُّومْ إِنُو.

‏8 سِيڭّْوجْ أَبْرِيذْ نّكْ خَاسْ،

وَارْ تَّاذسْ ثَاوَّارْثْ ن ثَادَّارْثْ نّسْ،

‏9 حِيمَا وَارْ ثتِّيشذْ شَّانْ نّكْ إِ إِنّغْنِي،

إِسڭّْوُوسَا نّكْ إِ ونِّي إِتّقْسِيحنْ أَطَّاسْ، ^▪  

‏10 حِيمَا إِبَارَّانِييّنْ وَارْ تّْجَاوَاننْ ذڭْ وَاڭْڒَا نّكْ،

ؤُ مَارَّا ڒْغِيدْجثْ ن ؤُمَارّثْ نّكْ وَارْ د-ثتِّيسْ ذِي ثَادَّارْثْ ن ونِّي وَارْ إِتّْوِيسّْننْ

‏11 ؤُ أَذْ ثْزهَّارذْ غَارْ ؤُنڭَّارْ،

خْمِي إِ غَا ثتّْوَاشّْ أَرِّيمثْ نّكْ ذ ويْسُومْ نّكْ،

‏12 أَذْ ثِينِيذْ: ”مَامّشْ ڭِّيغْ نشّْ شَارْهغْ تَّارْبِييّثْ،

مَامّشْ إِنْضَارْ ؤُڒْ إِنُو أَوبّخْ؟

‏13 مَامّشْ وَارْ سْڒِيغْ غَارْ ثْمِيجَّا ن ونِّي ذ أَيِي إِذَارّْبنْ،

وَارْ وْشِيغْ أَمزُّوغْ إِنُو إِ إِمْسڒْمَاذنْ إِنُو؟

‏14 عْڒَاحَاڒْ ثُوغَا ؤُفِيغْ إِخفْ إِنُو ذِي عْڒَامْ كُوڒْ ڒْغَارْ،

ذِي ڒْوسْثْ ن وڭْرَاوْ ن ڒْڭنْسْ ؤُ ن ثْمسْمُونْثْ!“

‏15 سُووْ أَمَانْ زڭْ وَانُو نّكْ،

ؤُڒَا ذ أَمَانْ إِسِّيزّْڒنْ زِي ڒَادْجَاغْ ن ڒْعُونْصَارْ نّكْ.

‏16 إِڒِي أَذْ سّفْينْ وَامَانْ ن ڒْعُونْصَارْ نّكْ بَارَّا،

أَمْ ثَاڒَاوِينْ خْ وَازَّاينْ.

‏17 أجّْ إِ-ثنْ أَذْ إِڒِينْ إِ شكْ وحّْذكْ،

وَارْ إِدْجِي إِ إِبَارَّانِييّنْ إِ ذِينْ زَّاثكْ.

‏18 أَذْ إِتّْوَابَاركْ ڒْعُونْصَارْ نّكْ،

فَارْحْ إِ ثمْغَارْثْ زڭْ وُوسَّانْ ن ثمْژِي نّكْ.

‏19 ثُوذَاذْثْ إِعِيزّنْ ؤُڒَا ذ ثِيغيْذثْ ن وزْغَارْ إِشوَّارنْ نتَّاثْ!

أجّْ إِبَّاشْ نّسْ أَذْ شكْ سّْيِيوْينْ ذِي مَارَّا ؤُسَّانْ،

سلّمْ إِخفْ نّكْ ڒبْذَا غَارْ ثَايْرِي نّسْ!

‏20 مَايمِّي، أَ مِّي إِنُو، مَا ڭُّورْ أَذْ شكْ ثغْوَا ثمْغَارْثْ ثَابَارَّانشْثْ،

أَذْ ثْذَارّْعذْ إِ وحْسِينْ ن ثمْغَارْثْ وَارْ ثسِّينذْ؟

‏21 مَاغَارْ إِبْرِيذنْ ن بْنَاذمْ أَقَا أَثنْ ذِينْ زَّاثْ إِ ثِيطَّاوِينْ ن سِيذِي،

نتَّا يَارْزُو ذِي مَارَّا إِمسْرَاقْ نّسْ. ^▪  

‏22 ڒْمُوعْسِييّثْ ن يِيخفْ نّسْ أَذْ ثْحبّسْ أَعفَّانْ،

س إِسغْوَانْ ن دّْنُوبْ نّسْ أَذْ إِتّْوَاشدّْ.

‏23 نتَّا أَذْ إِمّثْ ؤُمِي وَارْ ذِينْ ثُوغِي تَّارْبِييّثْ،

أَذْ إِودَّارْ س ثُوبُّوهڒْيَا نّسْ ثَامقّْرَانْثْ.