أَحطُّو ضِيدّْ إِ ثسْغُونِينْ ثِيعفَّانِينْ أَكْ-ذ إِوْذَانْ
6
1 مِّي إِنُو، مَاڒَا ثْذوْڒذْ ذ أَمَارْهُونْ إِ ؤُمْقَارّبْ نّكْ، ثوْشِيذْ ثِيشْثِي نّكْ ن ؤُفُوسْ إِ يِيجّْ ن ؤُبَارَّانِي،
2 مَاڒَا ثْذوْڒذْ ثقّْنذْ زڭْ وَاوَاڒنْ ن ؤُقمُّومْ نّكْ،
ثتّْوَاحبّْسذْ زڭْ وَاوَاڒنْ ن ؤُقمُّومْ نّكْ،
3 خنِّي أڭّْ ثَا، مِّي إِنُو، ؤُ سنْجمْ إِخفْ نّكْ زڭْ ؤُفُوسْ ن ؤُمْقَارّبْ نّكْ:
ؤُيُورْ، بنْذقْ خَاسْ ؤُ زيَّارْ خْ ونِّي شكْ يُوذْسنْ.
4 وَارْ تِّيشْ شَا إِضصْ إِ ثِيطَّاوِينْ نّكْ،
ؤُڒَا ذ أَنُوذمْ إِ وَابْڒِيونْ نّكْ. ▪
5 سنْجمْ إِخفْ نّكْ زڭْ ؤُفُوسْ نّسْ أَمْ ثْغيْضثْ ن وغْزَارْ،
أَمْ يِيجّْ ن وجْضِيضْ زڭْ ؤُفُوسْ ن ؤُنڭْمَارْ.
6 ؤُيُورْ غَارْ ثْكضْفثْ، شكْ، أَ أَمعْڭُوزْ ،
خْزَارْ مَامّشْ ثُويُورْ نتَّاثْ ؤُ ذْوڒْ ذ أَمِيغِيسْ.
7 وَاخَّا نتَّاثْ وَارْ غَارسْ بُو ؤُمْڭوّذْ،
نِيغْ أَوقَّافْ نِيغْ ڒْحَاكمْ،
8 وَاخَّا أَمنِّي نتَّاثْ ثسّوْجذْ أَغْرُومْ نّسْ ذڭْ ؤُنبْذُو،
ثيْرُو مَاشَّا نّسْ ذِي ڒْوقْثْ ن ثْميْرَا.
9 أَڒْ مڒْمِي إِ غَا ثقِّيمذْ ثزّْڒذْ، شكْ، أَ أَمعْڭُوزْ؟
مڒْمِي إِ غَا ثكَّارذْ زڭْ إِضسْ نّكْ؟ ▪
10 أَرْنِي شْوَايْثْ ن يِيضسْ، أَرْنِي شْوَايْثْ ن ؤُوَارّشْ،
أَرْنِي شْوَايْثْ ن ؤُپُوزّڒْ س إِفَاسّنْ إِمُوننْ،
11 أَقَا ذَا أَذْ خَاكْ د-إِوْضَا زّڒْضْ أَمْ إِجّْ ن ؤُخوَّانْ،
ڒغْبنْ نّكْ أَمْ يِيجّْ ن ورْيَازْ غَارْ إِدْجْ ڒسْنَاحْ.
12 بْنَاذمْ إِ وَارْ إِسكّْوِينْ، أَرْيَازْ ن ڒْغشّْ،
إِڭُّورْ س إِجّْ ن ؤُقمُّومْ إِشُّورنْ س مِينْ إِعوْجنْ.
13 إِغمّزْ س ثِيطَّاوِينْ نّسْ،
إِسَّاوَاڒْ س إِضَارنْ نّسْ،
إِتّْشيَّارْ س إِضوْضَانْ نّسْ.
14 ؤُڒْ نّسْ إِشُّورْ س ڒخْذَاعَاثْ،
إِنكّْوَا ڒبْذَا ڒْغَارْ، إِتّْسبَّابْ إِمنْغِييّنْ.
15 س ؤُينِّي ذغْيَا أَذْ د-يَاسْ ؤُضيّعْ نّسْ،
ذڭْ إِشْثْ ن ثشْثِي أَذْ إِتّْوَارْژْ أَمْ وَارْ ذِينْ إِتِّيڒِي ؤُڭنْفُو.
16 ستَّا ن ثْمسْڒَايِينْ-أَ إِشَارّهْ إِ-ثنْثْ سِيذِي،
وَاهْ سبْعَا أَقَا أَثنْثْ ذ نّْعِي إِ ڒعْمَارْ نّسْ:
17 ثِيطَّاوِينْ ن نّْفَاخثْ، إِجّْ ن يِيڒسْ إِسّْخَارِّيقنْ،
ؤُڒَا ذ إِفَاسّنْ إِسَّازَّاڒنْ إِذَامّنْ إِمزْذَاڭنْ، ▪
18 ؤُڒْ إِنكّْوَانْ ثِيمعْمَاتْشْ إِغشّنْ،
إِضَارنْ نِّي إِتّْقدْجِيقنْ مَاحنْذْ أَذْ أَزّْڒنْ غَارْ مِينْ إِدْجَانْ ذ أَعفَّانْ، ▪
19 أَشهَّاذْ بُو-إِخَارِّيقنْ نِّي د-إِذدْجْقنْ إِ إِخَارِّيقنْ،
ؤُڒَا ونِّي إِتّْسبَّابنْ إِمنْغِييّنْ جَارْ ثَاوْمَاثْ.
20 أَ مِّي، حْضَا ثَاوْصيّثْ ن بَابَاشْ،
ؤُ وَارْ منْضَارْ ثَاغُورِي ن يمَّاشْ. ▪
21 قّنْ إِ-ثنْثْ ڒبْذَا خْ وُوڒْ نّكْ،
شدّْ إِ-ثنْثْ غَارْ يِيرِي نّكْ. ▪
22 مَاڒَا ثڭُّورذْ ذڭْ وبْرِيذْ، أَيَا أَذْ شكْ إِڭوّذْ،
مَاڒَا ثزّْرذْ، أَيَا أَذْ شكْ إِحْضَا،
مَاڒَا ثْفَاقذْ أَقَا مَانْ أَيَا أَذْ كِيذكْ إِسِّيوڒْ. ▪
23 مِينْزِي ثَاوْصيّثْ ذ ڒفْنَارْ ذ ثْغُورِي ذ ثْفَاوْثْ،
إِوبَّاخْ ن تَّارْبِييّثْ أَقَا أَثنْ ذ أَبْرِيذْ ن ثُوذَارْثْ ▪
24 نِّي شكْ إِ غَا إِحْضَانْ زِي ثمْغَارْثْ ثَاعفَّانْثْ،
زِي ڒهْرُوذْ إِزوّْقنْ ن يِيڒسْ ن ثمْغَارْثْ زِي بَارَّا. ▪
25 وَارْ عشّقْ شَا أَژْرِي نّسْ ذڭْ وُوڒْ نّكْ،
حْضَا وَارْ شكْ ثحْصِيرْ س وَابْڒِيونْ نّسْ،
26 مِينْزِي زِي سِّيبّثْ ن إِشْثْ ن ثمْغَارْثْ ن فَارْقْ-شّْغڒْ،
بْنَاذمْ إِزمَّارْ أَذْ إِكْسِي مْغِيرْ إِشْثْ ن ثْخبَّازْثْ ن وغْرُومْ،
وَاهْ ثَامْغَارْثْ ن إِجّْ ن ورْيَازْ نّغْنِي أَقَا ثَارزُّو ڒعْمَارْ إِغْڒَانْ.
27 مَا إِزمَّارْ حذْ أَذْ يَارْپُو ثِيمسِّي ذڭْ وحْسِينْ ن وَارُّوضْ نّسْ،
بْڒَا مَا أَذْ يَارْغْ وَارُّوضْ نّسْ؟ ▫
28 مَا إِزمَّارْ حذْ أَذْ يُويُورْ خْ ڒفْحمْ إِتّحْذُوذُوقنْ،
بْڒَا مَا أَذْ شمْضنْ إِضَارنْ نّسْ؟
29 أَمُّو ؤُڒَا ذ ونِّي إِ غَا يَاذْفنْ غَارْ ثمْغَارْثْ ن ؤُمْقَارّبْ نّسْ،
وَاهْ كُوڒْ إِجّنْ ونِّي ت إِ غَا إِهَاذَانْ، وَارْ إِتّْوِيحْسِيبْ ذ أَمزْذَاڭْ.
30 أَشفَّارْ وَارْ ث تّجِّينْ مَاڒَا يُوشَارْ،
حِيمَا أَذْ إِسّْيِيونْ ڒعْمَارْ نّسْ مَاڒَا ذَايسْ ڒَاژْ.
31 مَاشَا مَاڒَا إِتّْوَافْ، أَمُّو خَاسْ إِ غَا إِخدْجصْ سبْعَا ن ثْسقَّارْ.
إِتّْخصَّا أَسْ أَذْ إِوْشْ مَارَّا مِينْ غَارسْ ذِي ثَادَّارْثْ.▪
32 مَاشَا ونِّي إِتّڭّنْ زِّينَا أَكْ-ذ إِشْثْ ن ثمْغَارْثْ، وَارْ غَارسْ بُو وُوڒْ إِمْثنْ.
ونِّي إِتّڭّنْ أَيَا، إِتّْضَارَّا ڒعْمَارْ نّسْ.
33 ذْرُوشْثْ ذ ڒفْضِيحثْ أَذْ ثنْ يَافْ،
ڒحْيَا نّسْ وَارْ إِمحِّي شَا.
34 مَاغَارْ ثُوسْمِي ثتَّاوِي-د أَسْعَارْ ن ورْيَازْ،
نتَّا وَارْ إِتّسّنْ أَحِينِّي ذڭْ وَاسّْ ن ونْثَاقمْ.
35 وَارْ إِحسّبْ دّيّثْ إِ وصْڒحْ، وَارْ ت إِقبّڒْ،
أَذْ يُوڭِي وَاخَّا ثسّمْغَارِيذْ ذِي ثرْزفْثْ عَاذْ س وَاطَّاسْ.