‏1 مِّي إِنُو، حْضَا أَوَاڒنْ إِنُو،

خمّڒْ ثِيوصَّا إِنُو غَاركْ.

‏2 حْضَا ثِيوصَّا إِنُو ؤُ شكْ أَذْ ثقِّيمذْ ثدَّارذْ،

حْضَا ثَاغُورِي إِنُو أَمْ مُومُّو ن ثِيطّْ نّكْ. ^▪  

‏3 قّنْ إِ-ثنْثْ غَارْ إِضوْضَانْ نّكْ،

أَرِي ثنْثْ خْ ثڒْوِيحْثْ ن وُوڒْ نّكْ. ^▪  

‏4 إِنِي إِ ثِيغِيثْ: ’شمْ ذ ؤُتْشْمَا!‘،

ؤُ سمَّا ڒفْهَامثْ: ’أَمدُّوكّڒْ إِنُو!‘،

‏5 مَاحنْذْ نِيثنْثِي أَذْ شكْ حْضَانْ زِي ثمْغَارْثْ ثَابَارَّانشْثْ،

زِي ثمْغَارْثْ زِي بَارَّا إِ شكْ إِتّْغَارَّانْ س وَاوَاڒنْ نّسْ. ^▪  

‏6 مَاغَارْ زِي ڒْكَازِي ن ثَادَّارْثْ إِنُو،

جَارْ شّبَّاشْ ن ڒْكَازِي سوْضغْ غَارْ وَادَّايْ،

‏7 سوْضغْ غَارْ إِحَافِييّنْ إِنِّي وَارْ إِتّْحِيكِينْ،

جَارْ إِحْرَامنْ حكَّارغْ إِجّْ ن ؤُحُوذْرِي س وُوڒْ وَارْ إِمْثنْ.

‏8 نتَّا إِژْوَا أَبْرِيذْ غَارْ ثغْمَارْثْ نّسْ،

ؤُ إِطّفْ أَبْرِيذْ غَارْ ثَادَّارْثْ نّسْ.

‏9 غَارْ ثْبَامْبَاسْثْ، غَارْ ثْمذِّيثْ ن وَاسّْ،

ذِي ڒَادْجَاغْ نْ دْجِيڒثْ ذ ثُوبَّارْشنْثْ،

‏10 خْزَارْ، أَقَا إِشْثْ ن ثمْغَارْثْ ثُوسَا-د إِ ؤُمْسَاڭَارْ أَكِيذسْ،

ذڭْ وَارُّوضْ ن ثمْغَارْثْ ن فَارْقْ-شّْغڒْ ؤُ س ثحْرَايْمشْثْ ن وُوڒْ.

‏11 نتَّاثْ ثخْثِيخْ ؤُ ثْغوّغْ،

إِضَارنْ نّسْ وَارْ قِّيمنْ عَاذْ ذِي ثَادَّارْثْ. ^▪  

‏12 إِشْثْ ن ثْوَاڒَا ذِي بَارَّا، خنِّي عَاوذْ ذڭْ إِزُورَايْ،

غَارْ مَارَّا ثِيغمَّارْ ن إِبْرِيذنْ ثتّْحَامَا.

‏13 نتَّاثْ ثطّفْ إِ-ث ؤُ ثسُّوذمْ إِ-ث،

ثقْجَارْ ؤُذمْ نّسْ، ثنَّا أَسْ:

‏14 ”ثُوغَا خَافِي مَاحنْذْ أَذْ وْشغْ ثِيوْهِيبِينْ ن ڒهْنَا.

أَسّْ-أَ سّْقفْڒغْ لْوُوعُوذْ إِنُو.

‏15 س ؤُينِّي إِ د-فّْغغْ مَاحنْذْ أَذْ شكْ مّْسَاڭَارغْ،

مَاحنْذْ أَذْ خَاكْ أَرْزُوغْ ؤُ أَمُّو إِ شكْ ؤُفِيغْ.

‏16 نشّْ سُّوغْ مَالْثَاثْ خْ قَامَا إِنُو،

س ڒِيزَارَاثْ إِزوّْقنْ إِمُوذنْ س ڒقْثنْ أَزْذَاذْ زِي مِيصْرَا.

‏17 نشّْ رُوشّغْ ثَاسُّوثْ إِنُو

س مِيرُّو ذ وشْفِيڒْ ذ ڒْقَارْفَا. ^▪  

‏18 أَسْ-د، أجّْ أَنغْ أَذْ نجِّيونْ ثِيمخْسَا أَڒْ ثُوفُّوثْ،

أجّْ أَنغْ أَذْ نَارّْ مژْرِي إِ ثَايْرِي.

‏19 مَاغَارْ أَرْيَازْ وَارْ إِدْجِي ذِي ثَادَّارْثْ،

نتَّا إِسَافَارْ إِڭّْوجْ أَطَّاسْ.

‏20 إِكْسِي إِشْثْ ن ثْكمُّوسْثْ ن ثْمنْيَاثْ ن نُّوقَارْثْ أَكِيذسْ،

أَذْ يَارڭّْوحْ غَارْ وَاسّْ ن ثْزِيرِي إِقفْڒنْ.“

‏21 أَمُّو إِ ث ثطّفْ س وَاطَّاسْ ن ڒْهَارْذْ نّسْ،

ثغْوَا إِ-ث س ڒهْرُوذْ نّسْ إِزوّْقنْ ن إِينْشِيشنْ نّسْ.

‏22 ذغْيَا يتَّا يَارْذفْ إِ-ت، أَمْ إِجّْ ن ؤُفُونَاسْ إِڭُّورنْ غَارْ ڒْڭُورْنثْ،

أَمْ إِشْثْ ن سّْنسْڒثْ خْ إِضَارنْ إِڭُّورنْ غَارْ ؤُمَارّثْ ن ؤُپُوهَاڒِي،

‏23 أَڒَامِي د أَسْ ثْشَارّڭْ فْڒِيثْشَا ثْسَا،

أَمْ يِيجّْ ن وجْضِيضْ إِضْوِينْ ذڭْ إِجّْ ن ونْذَايْ،

ؤُ وَارْ إِسِّينْ أَقَا وَانِيثَا إِتّْوَاڭّْ ضِيدّْ إِ ثُوذَارْثْ نّسْ. ^▪  

‏24 خنِّي ڒخُّو، أَ إِحنْجِيرنْ، سْڒمْ-د غَارِي،

ؤُ سْڒمْ غَارْ وَاوَاڒنْ ن ؤُقمُّومْ إِنُو.

‏25 أجّْ ؤُڒْ نّكْ وَارْ إِتّْوذِّيرْ ذڭْ إِبْرِيذنْ نّسْ،

وَارْ تّْميِّيڒْ غَارْ إِمسْرَاقْ نّسْ.

‏26 مَاغَارْ ذڭْ وَاطَّاسْ إِتّْوَايزْمنْ إِنِّي ثغْضرْ،

إِمْغَارْ وَاطَّاسْ لْعَاذَاذْ ن مَارَّا إِنِّي ثنْغَا.

‏27 ثَادَّارْثْ نّسْ ثشُّورْ س إِبْرِيذنْ غَارْ ڒَاخَارْثْ،

إِنِّي إِهكّْوَانْ غَارْ إِخَّامنْ ن ذَاخڒْ ن ڒْموْثْ. ^▪