‏1 إِزْڒِي ن ؤُصبّحْ ن ذَاوُوذْ.

أَلِيفْ. أَ، أَربِّي إِنُو، أَجدْجِيذْ، نشّْ أَذْ شكْ سّْعُودْجغْ،

أَذْ بَارْكغْ إِسمْ نّكْ إِ ڒبْذَا قَاعْ.

‏2 بِيثْ. كُوڒْ أَسّْ أَذْ شكْ بَارْكغْ،

أَذْ سّمْغَارغْ إِسمْ نّكْ إِ ڒبْذَا قَاعْ.

‏3 ڭِيملْ. سِيذِي ذ أَمقّْرَانْ ؤُ نتَّا إِسّْذِيهدْجْ أَسمْغَارْ أَطَّاسْ.

ڒمْغَارثْ نّسْ وَارْ ذَايسْ بُو ثَارزُّوثْ. ^▪  

‏4 ذَالِيثْ. جِّيڒْ أَوَارْنِي جِّيڒْ أَذْ إِسّمْغَارْ ڒخْذَايمْ نّكْ،

أَذْ بَارّْحنْ س ثْمڭَّا نّكْ ثِيمقّْرَانِينْ. ^▪  

‏5 هِي. نشّْ أَذْ سِّيوْڒغْ خْ ثسِّيقْثْ ن ؤُعُودْجِي ن لْعَاضَامَا نّكْ،

خْ ڒخْبَارْ ن لْمُوعْجِيزَاثْ نّكْ. ^▫  

‏6 وَاوْ. نِيثْنِي أَذْ سِّيوْڒنْ خْ جّْهذْ ن ثْمڭَّا نّكْ إِسَّاڭّْوَاذنْ،

ؤُ نشّْ أَذْ بَارّْحغْ س ڒمْغَارثْ نّكْ.

‏7 زَايِينْ. ڒِيذَارثْ ن ثْشُونِي نّكْ إِفيّْضنْ ڭِّينْ ت أَمْ إِجّْ ن ڒْعُونْصَارْ إِتّْشُورْشُورْ،

أَذْ سْڒِيوْڒِيونْ إِ ثْسڭْذَا نّكْ. ^▪  

‏8 خِيثْ. سِيذِي ذ أَرْحِيمْ ذ أَحْنِينْ،

غَارسْ تَّاسِيعْ ن ڒْخَاضَارْ ذ وَاطَّاسْ ن ثْمخْسِيوْثْ إِشوَّارنْ. ^▪  

‏9 ثِيث. سِيذِي ذ أَصبْحَانْ إِ مَارَّا،

أَرّحْمثْ نّسْ أَقَا-ت سنّجْ إِ مَارَّا ثِيمڭَّا نّسْ.

‏10 يُوذْ. مَارَّا ثِيمڭَّا نّكْ، أَ سِيذِي، أَذْ شكْ قَاذِينْ،

إِمْثِيقَّانْ نّكْ أَذْ شكْ بَارْكنْ.

‏11 كَافْ. نِيثْنِي أَذْ سِّيوْڒنْ خْ ؤُعُودْجِي ن ثْڭلْذِيثْ نّكْ،

ؤُ أَذْ إِذَارنْ ثِيمڭَّا نّكْ ثِيمقّْرَانِينْ،

‏12 لَامِيذْ. حِيمَا أَذْ بَارّْحنْ س ثْمڭَّا نّسْ ثِيمقّْرَانِينْ إِ ثَارْوَا ن بْنَاذمْ،

ؤُڒَا س ؤُعُودْجِي ن لْعَاضَامَا ن ثْڭلْذِيثْ نّسْ.

‏13 مِيمْ. ثَاڭلْذِيثْ نّكْ ذ إِشْثْ ن ثْڭلْذِيثْ إِ مَارَّا إِكُوذنْ،

ڒحْكَامثْ نّكْ أَذْ ثِيڒِي خْ كُوڒْ جِّيڒْ.

‏14 سَامِيخْ. سِيذِي إِتّْغمّذْ مَارَّا إِنِّي إِوْضَانْ،

إِتّْسڭّمْ مَارَّا إِنِّي إِقْوِيسنْ.

‏15 عَايِينْ. مَارَّا ثِيطَّاوِينْ تّْرَاجَانْثْ شكْ،

شكْ ثتِّيشذْ أَسنْ مَاشَّا ذِي ڒْوقْثْ نْسنْ نِيشَانْ. ^▪  

‏16 بِي. شكْ ثَارزّْمذْ أَفُوسْ نّكْ،

ثسّْيَاوَانذْ مَارَّا مِينْ إِدَّارنْ أَكْ-ذ مِينْ إِخْسْ ڒْخَاضَارْ نْسنْ.

‏17 ثْسَاذِي. سِيذِي أَقَا-ث نِيشَانْ ذِي مَارَّا إِبْرِيذنْ نّسْ،

إِتّڭّْ س ثْمخْسِيوْثْ إِشوَّارنْ ذِي مَارَّا ثِيمڭَّا نّسْ.

‏18 قُوفْ. سِيذِي يُوذسْ إِ مَارَّا إِنِّي خَاسْ إِتّْڒَاغَانْ،

مَارَّا إِنِّي خَاسْ إِتّْڒَاغَانْ ذِي ثِيذتّْ.

‏19 رِيخْ. نتَّا إِڭَّا س ڒْخَاضَارْ إِ مَارَّا إِنِّي ث إِتّڭّْوْذنْ،

إِتّسْڒَا إِغُويَّانْ نْسنْ ؤُ إِسّنْجَامْ إِ-ثنْ.

‏20 شِينْ. سِيذِي إِحطَّا خْ مَارَّا إِنِّي ث إِتّخْسنْ،

مَاشَا مَارَّا إِعفَّاننْ إِتّحَّا إِ-ثنْ.

‏21 ثَاوْ. أَقمُّومْ إِنُو أَذْ إِسِّيوڒْ خْ ؤُصبّحْ ن سِيذِي،

مَارَّا دَّاثْ أَذْ إِبَاركْ إِسمْ نّسْ إِقدّْسنْ،

إِ ڒبْذَا قَاعْ.