‏1 ثُوغَا ذِينْ إِجّْ ن ورْيَازْ ذِي ثمُّورْثْ ن عُوصْ قَّارنْ أَسْ أَيُوبْ. أَرْيَازْ-أَ ثُوغَا إِكْمڒْ ذ أَمْسڭّذْ، إِتّڭّْوذْ زِي أَربِّي ؤُ إِتّْحيَّاذْ خْ مِينْ إِدْجَانْ ذ أَعفَّانْ. ^▪   ‏2 تّْوَارْونْ أَسْ-د سبْعَا ن إِحنْجِيرنْ ذ ثْڒَاثَا ن ثْحنْجِيرِينْ. ‏3 ثَاحِيمَارْثْ ن ڒْمَاڒْ نّسْ ذَايسْ سبْعَا-أَڒَافْ ن وُودْجِي ؤُ ثڒْثْ-أَڒَافْ ن إِڒغْمَانْ ذ خمْسَا-مْيَا ن إِفُونَاسنْ ن ثغْنَاشْثْ ذ خمْسَا-مْيَا ن ثغْيَاڒْ، أَرْنِي غَارسْ أَبَارُّو ن إِسمْغَانْ. أَرْيَازْ-أَ ثُوغَا ذ أَمقّْرَانْ خْ مَارَّا أَرَّاوْ ن شَّارْقْ.

‏4 إِحنْجِيرنْ نّسْ نُّومنْ تّڭّنْ إِجّْ ن ؤُمنْسِي، كُوڒْ  إِجّْ زَّايْسنْ س نُّوبثْ نّسْ ذڭْ وَاسّْ نّسْ ذِي ثَادَّارْثْ نّسْ. سّكَّانْ، عَارْضنْ ؤُڒَا خْ ثْڒَاثَا ن يسّْمَاثْسنْ أَذْ كِيذْسنْ شّنْثْ ؤُ أَذْ كِيذْسنْ سْونْثْ. ‏5 ڒَامِي عْذُونْ وُوسَّانْ ن ؤُمنْسِي، إِسّكّْ أَيُوبْ حِيمَا أَذْ ثنْ إِسّْقدّسْ. زِيشْ غَارْ ثُوفُّوثْ إِكَّارْ ؤُشَا يِيوِي ذِينْ ثِيغَارْصِي ن وشْمَاضْ أَنشْثْ لْعَاذَاذْ ن مَارَّا إِحنْجِيرنْ نّسْ. مَاغَارْ أَيُوبْ إِنَّا: ”أَذْ ثَاغْ خْضَانْ إِحنْجِيرنْ إِنُو ؤُ حيّْذنْ خْ أَربِّي ذڭْ وُوڒْ نْسنْ.“ أَمُّو إِ إِتّڭّْ أَيُوبْ ڒبْذَا.

‏6 ذڭْ إِجّْ ن وَاسّْ ؤُسِينْ-د أَرَّاوْ ن أَربِّي حِيمَا أَذْ بدّنْ زَّاثْ إِ سِيذِي، ؤُشَا يُوسَا-د ؤُڒَا ذ شِّيطَانْ ذِي ڒْوسْثْ نْسنْ. ‏7 إِنَّا سِيذِي إِ شِّيطَانْ: ”مَانِيسْ إِ د-ثُوسِيذْ شكْ؟“ يَارَّا-د شِّيطَانْ خْ سِيذِي، إِنَّا: ”ؤُسِيغْ-د زڭْ وثْلَاعْ خْ ثمُّورْثْ، كِّيغْ ت مَارَّا.“ ^▪   ‏8 إِنَّا سِيذِي إِ شِّيطَانْ: ”مَا ثحْضِيذْ أَمْسخَّارْ إِنُو أَيُوبْ؟ أَمشْنَاوْ نتَّا وَارْ إِدْجِي خْ ثمُّورْثْ: ذ أَرْيَازْ إِكْمڒْ، إِڭُّورْ نِيشَانْ، إِتّڭّْوذْ أَربِّي ؤُ إِتّْحيَّاذْ خْ مِينْ إِدْجَانْ ذ أَعفَّانْ!“

‏9 يَارَّا-د شِّيطَانْ خْ سِيذِي، إِنَّا: ”مَا أَمنِّي وَاهَا إِتّڭّْوذْ أَيُوبْ أَربِّي؟

‏10 مَا وَارْ إِدْجِي ذ شكْ ونِّي إِڭِّينْ إِجّْ ن وفْرَايْ ن شْبَارْقْ أَكْ-ذ إِسنَّاننْ إِ نتَّا ذ ثَادَّارْثْ نّسْ ذ مَارَّا مِينْ غَارسْ؟ أَقَا ثْبَارْكذْ ثِيمڭَّا ن إِفَاسّنْ نّسْ ؤُشَا ڒْمَاڒْ نّسْ إِمْغَارْ أَطَّاسْ ذِي ثمُّورْثْ.

‏11 سْوِيژّضْ مْغِيرْ أَفُوسْ نّكْ غَارسْ، حَاذَا مَارَّا مِينْ إِدْجَانْ نّسْ، مَا خنِّي س ثِيذتّْ أَذْ إِبعّذْ خْ وُوذمْ نّكْ؟“

‏12 خنِّي إِنَّا سِيذِي إِ شِّيطَانْ: ”خْزَارْ، مَارَّا مِينْ غَارسْ أَقَا-ث ذڭْ ؤُفُوسْ نّكْ. مْغِيرْ وَارْ ذ أَسْ سْوِيژِّيضْ أَفُوسْ نّكْ وَاهَا!“ خَاسْ ؤُشَا يُويُورْ شِّيطَانْ زِي زَّاثْ ن وُوذمْ ن سِيذِي.

‏13 ذڭْ وَاسّْ مِينْ ذِي ثُوغَا إِحنْجِيرنْ نّسْ ذ يسِّيسْ تّتّنْ ؤُ سسّنْ بِينُو ذِي ثَادَّارْثْ ن ؤُمَاثْسنْ أَمنْزُو، إِمْسَارْ،

‏14 أَقَا يُوسَا-د ؤُرقَّاسْ غَارْ أَيُوبْ، إِنَّا: ”إِفُونَاسنْ ثُوغَا شَارّْزنْ ؤُ ثِيغْيَاڒْ هدَّانْثْ خْ ؤُغزْذِيسْ نْسنْ.

‏15 خنِّي هجْمنْ أَيْثْ ن سَابَا، كْسِينْ ثنْ ؤُشَا نْغِينْ إِحُوذْرِييّنْ س ڒقْضعْ ن سِّيفْ. مْغِيرْ نشّْ وَاهَا إِنجْمنْ، حِيمَا أَذْ أَشْ ث عَاوْذغْ.“

‏16 ؤُمِي ثُوغَا وَا عَاذْ إِسَّاوَاڒْ، يُوسَا-د إِجّْ نّغْنِي، إِنَّا: ”ثِيمسِّي ن أَربِّي ثوْضَا-د زڭْ ؤُجنَّا ؤُشَا ثَارْغَا ذڭْ وُودْجِي ذ إِحُوذْرِييّنْ ؤُشَا ثشَّا إِ-ثنْ. مْغِيرْ نشّْ وَاهَا إِنجْمنْ، حِيمَا أَذْ أَشْ ث عَاوْذغْ.“

‏17 ؤُمِي ثُوغَا وَا عَاذْ إِسَّاوَاڒْ، يُوسَا-د إِجّْ نّغْنِي، إِنَّا: ”أَيْثْ ن إِكَالْذَانِييّنْ سّْبدّنْ ثْڒَاثَا ن بَانْذِييَّاثْ، هجْمنْ خْ إِڒغْمَانْ، كْسِينْ ثنْ ؤُشَا نْغِينْ إِحُوذْرِييّنْ س ڒقْضعْ ن سِّيفْ. مْغِيرْ نشّْ وَاهَا إِنجْمنْ، حِيمَا أَذْ أَشْ ث عَاوْذغْ.“

‏18 ؤُمِي ثُوغَا وَا عَاذْ إِسَّاوَاڒْ، يُوسَا-د إِجّْ نّغْنِي، إِنَّا: ”إِحنْجِيرنْ نّكْ ذ يسِّيشْ شِّينْ ؤُ سْوِينْ بِينُو ذِي ثَادَّارْثْ ن ؤُمَاثْسنْ، أَمنْزُو.

‏19 ؤُشَا خْزَارْ، يُوسَا-د إِجّْ ن ؤُصمِّيضْ إِوْعَارْ خْ ثِيوَا ن ڒخْڒَا، إِڒْقفْ أَربْعَا ن ثْغمُّورَا ن ثَادَّارْثْ ؤُشَا ثوْضَا ثَادَّارْثْ خْ إِحُوذْرِييّنْ ذ ثْحُوذْرِييِّينْ ؤُشَا مُّوثنْ نِيثْنِي. مْغِيرْ نشّْ وَاهَا إِنجْمنْ، حِيمَا أَذْ أَشْ ث عَاوْذغْ.“

‏20 خنِّي إِكَّارْ أَيُوبْ، إِشَارّڭْ أَسڒْهَامْ نّسْ، إِحفّْ أَزدْجِيفْ نّسْ، إِوْضَا خْ ثمُّورْثْ ؤُشَا يُوضَارْ، ‏21 إِنَّا: ”ذ أَعَارْيَانْ إِ د-ؤُسِيغْ زڭْ ؤُعذِّيسْ ن يمَّا ؤُ ذ أَعَارْيَانْ إِ ذِينْ إِ غَا ذوْڒغْ. سِيذِي إِوْشَا، سِيذِي إِكّسْ، أَذْ إِتّْوَابَاركْ إِسمْ ن سِيذِي.“ ^▪   ‏22 ذِي مَانْ أَيَا مَارَّا وَارْ إِخْضِي أَيُوبْ شَا ؤُ وَارْ إِنِّي مِينْ وَارْ إِعدّْڒنْ خْ أَربِّي.