‏1 إِمْسَارْ ذڭْ وُوسَّانْ ن أَحَاشْوِيرُوشْ - نتَّا ذ أَحَاشْوِيرُوشْ ونِّي ثُوغَا إِحكّْمنْ زِي ثمُّورْثْ ن ڒْهنْذْ أَڒْ ثَامُّورْثْ ن كُوشْ خْ مْيَا ؤُ-سبْعَا ؤُ-عِيشْرِينْ ن لْعَامَالَاثْ - ‏2 وَاهْ ذڭْ وُوسَّانْ نِّي، ؤُمِي إِقِّيمْ ؤُجدْجِيذْ أَحَاشْوِيرُوشْ خْ ڒْعَارْشْ ن ثْڭلْذِيثْ نّسْ ذِي ڒقْصَارْ ن شُوشَانْ، ‏3 ذڭْ ؤُسڭّْوَاسْ وِيسّْ ثْڒَاثَا ن ڒحْكَامْ نّسْ، أَقَا إِڭَّا إِشْثْ ن زَّارْذثْ إِ مَارَّا ڒْحُوكَّامْ ذ إِمْسخَّارنْ نّسْ. ثُوغَا إِكُومَانْذَارنْ ن ڒْعسْكَارْ ذِي ثمُّورْثْ ن لْفُورْسْ ذ مَاذَايْ ؤُڒَا ذ ثَارْوَا ن ثَاصِيڒثْ ذ ڒْحُوكَّامْ ن لْعَامَالَاثْ تّْمُونَانْ زَّاثْ إِ وُوذمْ نّسْ، ‏4 ؤُمِي إِسّْشنْ أَڭْڒَا ن ؤُعُودْجِي ن ثْڭلْذِيثْ نّسْ ذ شَّانْ ذ ڒمْڒَاحثْ ن ڒمْغَارثْ نّسْ ذڭْ وَاطَّاسْ ن وُوسَّانْ، أَقَا ذِي مْيَا ؤُ-ثْمَانْيِينْ ن وُوسَّانْ. ‏5 ؤُمِي عْذُونْ وُوسَّانْ نِّي، خنِّي ثُوغَا إِسّوْجَاذْ ؤُجدْجِيذْ إِشْثْ ن زَّارْذثْ إِ مَارَّا ڒْڭنْسْ نِّي ثُوغَا ذِينْ ذِي لْقلْعَا ن شُوشَانْ، زڭْ ؤُمقّْرَانْ أَڒْ أَمژْيَانْ، سبْعَا ن وُوسَّانْ، ذڭْ وَازَّايْ ن وحْوِيشْ ن ڒقْصَارْ ن ؤُجدْجِيذْ. ‏6 أَقَا ذِينْ أَرْوَاقَاثْ ذ إِشمْڒَاڒنْ ذ إِزِيزَاونْ ذ إِذهْمَاننْ مُّوذنْ س إِفِيڒَانْ ن ڒقْطنْ أَزْذَاذْ ذ ؤُفِيڒُو أَرْجُووَانِي ڭِّينْ ثنْثْ ذِي ثخْڒَازِينْ ن نُّوقَارْثْ ؤُ غَارْ إِبِيلَارنْ ن ڒْمَارْمُورْ. ڒمْطَارْبَاثْ ن وُورغْ ذ نُّوقَارْثْ مَّارْسنْثْ خْ ثِيسِي ن زّلِّيجْ ذَايسْ أَژْرُو أَزِيزَا أَمْ سْمَارَاخْثْ ذ وژْرُو ذ أَشمْڒَاڒْ ذ وژْرُو أَمْ ثْيَاقُوثْ ذ وژْرُو ذ أَبَارْشَانْ. ‏7 ثمّوْشْ ثْسسِّي ذِي ڒقْشُوعْ ن وُورغْ ؤُ ثُوغَا ڒقْشُوعْ مْسبْضَانْ، ثَا وَارْ ثَارْوِيسْ ثَا، ؤُ ثُوغَا ذِينْ بِينُو إِڭلّْذنْ س وَاطَّاسْ، أَنشْثْ إِ ثُوغَا إِزمَّارْ ؤُفُوسْ ن ؤُجدْجِيذْ أَذْ ث إِوْشْ. ^▫   ‏8 ثُوغَا سْوِينْ عْلَاحْسَابْ ڒُومُورْ، وَارْ إِدْجِي س ؤُغِيڒْ، مِينْزِي أَمُّو إِ إِوصَّا ؤُجدْجِيذْ إِ مَارَّا إِمقّْرَاننْ ن ثَادَّارْثْ نّسْ، مَاحنْذْ أَذْ ڭّنْ ڒْخَاضَارْ إِ مَارَّا. ‏9 ثڭَّا ثْجدْجِيذْثْ وَاشْثِي ؤُڒَا ذ إِشْثْ ن زَّارْذثْ إِ ثمْغَارِينْ ذِي ثَادَّارْثْ إِڭلّْذنْ. ثنِّي ثُوغَا ن ؤُجدْجِيذْ أَحَاشْوِيرُوشْ.

‏10 ذڭْ وَاسّْ وِيسّْ سبْعَا، ؤُمِي إِذْوڒْ وُوڒْ ن ؤُجدْجِيذْ إِفَارْحْ س بِينُو، إِنَّا إِ مَاهُومَانْ، بِيزْثَا، حَارْپُونَا، بِيغْثَا ذ أَبَاغْثَا، زِيثَارْ ذ كَارْكَاسْ، أَقَا نِيثْنِي ذ سبْعَا ن إِمْسخَّارنْ إِشنْعنْ إِ ثُوغَا إِسخَّارنْ زَّاثْ إِ وُوذمْ ن ؤُجدْجِيذْ أَحَاشْوِيرُوشْ،

‏11 حِيمَا أَذْ أَوْينْ ثَاجدْجِيذْثْ وَاشْثِي زَّاثْ إِ وُوذمْ ن ؤُجدْجِيذْ س تَّاجْ إِڭلّْذنْ مَاحنْذْ أَذْ إِسّْشنْ أَژْرِي نّسْ إِ ڒڭْنُوسْ ؤُ إِ ڒْحُوكَّامْ مِينْزِي نتَّاثْ ثُوغَا ذَايسْ أَژْرِي.

‏12 مَاشَا ثَاجدْجِيذْثْ وَاشْثِي ثُوڭِي أَذْ د-ثَاسْ عْلَاحْسَابْ أَوَاڒْ ن ؤُجدْجِيذْ نِّي ذ أَسْ د-يُوسَا س ؤُفُوسْ ن إِمْسخَّارنْ إِشنْعنْ. إِفُّوڭمْ ؤُجدْجِيذْ أَطَّاسْ ؤُشَا إِكَّارْ ذَايسْ وسْعَارْ.

‏13 خنِّي إِنَّا ؤُجدْجِيذْ إِ إِمِيغِيسنْ إِنِّي إِفهّْمنْ إِكُوذنْ، - مِينْزِي أَمُّو إِ ثُوغَا ثتّْوَاڭّْ ثْمسْڒَاشْثْ ن ؤُجدْجِيذْ زَّاثْ إِ ينِّي إِسّْننْ أَزرْفْ ؤُ ڒحْكَامْ - ،

‏14 إِ كَارْشَانَا، شِيثَارْ، أَذْمَاثَا، ثَارْشِيشْ، مَارَاسْ، مَارْسَانَا ذ مَامُوكَانْ، سبْعَا ن ڒْحُوكَّامْ ن لْفُورْسْ ذ مَاذَايْ، إِنِّي ثُوغَا يُوذْسنْ أَطَّاسْ ؤُ زمَّارنْ أَذْ ژَترنْ ؤُذمْ ن ؤُجدْجِيذْ ؤُ كْسِينْ إِمُوشَانْ إِمزْوُورَا ذِي ثْڭلْذِيثْ:

‏15 ”مِينْ ذ أَنغْ إِتّْخصَّا أَذْ نڭّْ أَكْ-ذ ثْجدْجِيذْثْ وَاشْثِي عْلَاحْسَابْ ڒْقَانُونْ، مِينْزِي نتَّاثْ وَارْ ثڭِّي أَوَاڒْ ن ؤُجدْجِيذْ أَحَاشْوِيرُوشْ إِ د-إِسّكّْ س ؤُفُوسْ ن إِمْسخَّارنْ نّسْ إِشنْعنْ؟“

‏16 خنِّي إِنَّا مَامُوكَانْ زَّاثْ إِ وُوذمْ ن ؤُجدْجِيذْ ذ ڒْحُوكَّامْ: ”ثَاجدْجِيذْثْ وَاشْثِي وَارْ ثڭِّي شَا ڒْعِيبْ ذڭْ ؤُجدْجِيذْ ذ ڒْحُوكَّامْ وَاهَا، مَاشَا ؤُڒَا ذِي مَارَّا ڒْحُوكَّامْ ذ مَارَّا ڒڭْنُوسْ ذِي مَارَّا لْعَامَالَاثْ ن ؤُجدْجِيذْ أَحَاشْوِيرُوشْ.

‏17 مِينْزِي مِينْ ثڭَّا ثْجدْجِيذْثْ أَذْ إِفّغْ غَارْ مَارَّا ثمْغَارِينْ ؤُشَا أَذْ يَارّْ إِرْيَازنْ نْسنْثْ أَذْ تّْوَاسحْقَارنْ جَارْ ثِيطَّاوِينْ نْسنْثْ خْمِي قَّارنْثْ: ’أَجدْجِيذْ أَحَاشْوِيرُوشْ إِنَّا أَذْ سّكّنْ غَارْ ثْجدْجِيذْثْ وَاشْثِي مَاحنْذْ أَذْ د-ثَاسْ زَّاثْ إِ وُوذمْ نّسْ، مَاشَا نتَّاثْ وَارْ د-ثُوسِي شَا.‘

‏18 ؤُڒَا ذ ثِيمْغَارِينْ ن ڒْحُوكَّامْ ن لْفُورْسْ ذ مَاذَايْ، ثِينِّي إِسْڒَانْ إِ ثْوَارِّيثْ ن ثْجدْجِيذْثْ، أَذْ إِنِينْثْ أَمُّو أَسّْ-أَ إِ مَارَّا ڒْحُوكَّامْ ن ؤُجدْجِيذْ ؤُشَا أَمُّو إِ ذِينْ غَا يِيڒِي ؤُسحْقَارْ ذ ؤُذُوقّزْ ن وغْضَابْ أَطَّاسْ.

‏19 مَاڒَا إِعْجبْ أَسْ ڒْحَاڒْ إِ ؤُجدْجِيذْ، أجّْ إِ-ث خنِّي أَذْ إِسُّوفّغْ إِجّْ ن ڒُومُورْ، أَذْ ث إِزمّْ ذِي ڒْقَاوَانِينْ ن أَيْثْ ن لْفُورْسْ ذ مَاذَايْ مَاحنْذْ وَارْ ث تّْعدَّانْ، ؤُ وَارْ إِتّجِّي أَذْ د-ثَاسْ ثَاجدْجِيذْثْ وَاشْثِي عَاذْ زَّاثْ إِ وُوذمْ ن ؤُجدْجِيذْ أَحَاشْوِيرُوشْ ؤُشَا أجّْ أَجدْجِيذْ أَذْ إِوْشْ ثَاڭلْذَا نّسْ إِ حذْ نّغْنِي زَّاثسْ، أَذْ ثِيڒِي حْسنْ زَّايسْ. ‏20 خْمِي إِ غَا إِتّْوَاسڒْ ڒُومُورْ ن ؤُجدْجِيذْ نِّي إِ غَا يڭّْ ذِي مَارَّا ثَاڭلْذِيثْ نّسْ، ثنِّي ذ ثَامقّْرَانْثْ، خنِّي أَذْ ذوْڒنْثْ مَارَّا ثِيمْغَارِينْ أَذْ وقَّارنْثْ إِرْيَازنْ نْسنْثْ، زڭْ ؤُمژْيَانْ أَڒْ أَمقّْرَانْ.“ ‏21 ثُوغَا أَوَاڒْ-أَ ذ لمْلِيحْ ذِي ثِيطَّاوِينْ ن ؤُجدْجِيذْ ذ ڒْحُوكَّامْ ؤُشَا إِڭَّا ؤُجدْجِيذْ عْلَاحْسَابْ أَوَاڒْ ن مَامُوكَانْ. ‏22 إِسّكّْ ثِيبْرَاثِينْ غَارْ مَارَّا لْعَامَالَاثْ ن ؤُجدْجِيذْ، إِ كُوڒْ لْعَامَالَا س ثِيرَا نّسْ، ؤُ إِ كُوڒْ ڒْڭنْسْ س يِيڒسْ نّسْ، حِيمَا كُوڒْ أَرْيَازْ أَذْ يِيڒِي ذ بَابْ ن ثَادَّارْثْ نّسْ ؤُشَا أَذْ إِسِّيوڒْ س يِيڒسْ ن ڒْڭنْسْ نّسْ.