‏1 ذڭْ إِجّْ ن وَاسّْ ؤُسِينْ-د أَرَّاوْ ن أَربِّي حِيمَا أَذْ بدّنْ زَّاثْ إِ سِيذِي، ؤُشَا يُوسَا-د ؤُڒَا ذ شِّيطَانْ ذِي ڒْوسْثْ نْسنْ مَاحنْذْ أَذْ إِسّْبدّْ إِخفْ نّسْ زَّاثْ إِ سِيذِي. ‏2 إِنَّا سِيذِي إِ شِّيطَانْ: ”مَانِيسْ إِ د-ثُوسِيذْ شكْ؟ شِّيطَانْ يَارَّا-د خْ سِيذِي، إِنَّا: ”ؤُسِيغْ-د زڭْ وثْلَاعْ خْ ثمُّورْثْ، كِّيغْ ت مَارَّا.“ ‏3 إِنَّا سِيذِي إِ شِّيطَانْ: ”مَا ثحْضِيذْ أَمْسخَّارْ إِنُو أَيُوبْ؟ أَمشْنَاوْ نتَّا وَارْ إِدْجِي خْ ثمُّورْثْ: ذ أَرْيَازْ إِكْمڒْ، إِڭُّورْ نِيشَانْ، إِتّڭّْوذْ أَربِّي ؤُ إِتّْحيَّاذْ خْ مِينْ إِدْجَانْ ذ أَعفَّانْ! عَاذْ يَارْنِي إِتّطّفْ ذِي ڒصْفَايثْ نّسْ، خْ مِينِّي شكْ ذ أَيِي ثْعَارّْنذْ حِيمَا أَذْ ث صَارْضغْ خْ وَالُو.“

‏4 يَارَّا-د شِّيطَانْ خْ سِيذِي، إِنَّا: ”ثِيڒْمشْثْ س ثڒْمشْثْ ذ مَارَّا مِينْ غَارسْ غَارْ بْنَاذمْ، أَذْ ث إِوْشْ إِ ثُوذَارْثْ نّسْ. ‏5 سْوِيژّضْ مْغِيرْ أَفُوسْ نّكْ غَارسْ ؤُشَا حَاذَا إِغْسَانْ نّسْ ذ ويْسُومْ نّسْ، مَا خنِّي نتَّا س ثِيذتّْ وَارْ ذَايكْ إِتّْشقَّافْ ذڭْ وُوذمْ نّكْ؟“

‏6 خنِّي إِنَّا سِيذِي إِ شِّيطَانْ: ”خْزَارْ، نتَّا ذڭْ ؤُفُوسْ نّكْ، مَاشَا أجّْ إِ-ث أَذْ إِدَّارْ!“

‏7 خَاسْ ؤُشَا يُويُورْ شِّيطَانْ زِي زَّاثْ ن وُوذمْ ن سِيذِي ؤُشَا إِوْثَا أَيُوبْ س ثْحبَّا ثِيعفَّانِينْ، زِي ثْڒقَّا ن إِضَارنْ نّسْ غَارسْ أَڒْ ثْقِيشّثْ ن ؤُشقُّوفْ ن ؤُزدْجِيفْ نّسْ. ‏8 نتَّا إِكْسِي أَشدْجِيقْ ن ثْقدُّوحْثْ، حِيمَا أَذْ زَّايسْ إِحكّْ إِخفْ نّسْ، ؤُشَا إِقِّيمْ ذِي ڒْوسْثْ ن يِيغّضْ. ‏9 ثنَّا أَسْ ثمْغَارْثْ نّسْ: ”مَا عَاذْ ثتّطّْفذْ ذِي ڒصْفَايثْ نّكْ؟ إِنِي أَسْ إِ أَربِّي: ’ذ ونِّي نتَّا!‘، ؤُشَا مّثْ!“

‏10 نتَّا مَاشَا إِنَّا أَسْ: ”أَمْ مَامّشْ سَّاوَاڒنْثْ ثمْغَارِينْ ثِيپُوهَاڒِييِّينْ ثسَّاوَاڒذْ ؤُڒَا ذ شمْ أَمْ إِشْثنْ زَّايْسنْثْ. مَا نشِّينْ نْكسِّي ڒْخَارْ زِي أَربِّي، مَاشَا وَارْ نْكسِّي خنِّي ؤُڒَا ذ ڒْغَارْ؟“ س مَارَّا مَانْ أَيَا أَيُوبْ وَارْ إِخْضِي شَا س إِينْشِيشنْ نّسْ.

‏11 سْڒِينْ ثْڒَاثَا ن إِمدُّوكَّاڒْ ن أَيُوبْ مَارَّا مِينْ خَاسْ إِكِّينْ ذ ڒْغَارْ ؤُ نِيثْنِي ؤُسِينْ-د كُوڒْ إِجّْ زِي ثمُّورْثْ نّسْ: إِلِيفَازْ زِي ثَايْمَانْ، بِيلْذَاذْ زِي شُوحَا ؤُ صُوفَارْ زِي نَاعْمَاثْ. ڭِّينْ أَذْ ذِينْ ؤُيُورنْ حِيمَا أَذْ كِيذسْ سّْحِيسّْفنْ ؤُ حِيمَا أَذْ ذَايسْ ڭّنْ ؤُڒْ.

‏12 زِي ڒَاڭّْوَاجْ سّْڭعّْذنْ ثَامُوغْڒِي نْسنْ، مَاشَا وَارْ ت عْقِيڒنْ شَا. نِيثْنِي سّْڭعّْذنْ ثْمِيجَّا نْسنْ ؤُشَا رُونْ. كُوڒْ إِجّْ إِشَارّڭْ أَسڒْهَامْ نّسْ ؤُشَا سُّويْسنْ إِغّضْ غَارْ ؤُجنَّا ثِيوَا إِ إِزدْجِيفنْ نْسنْ.

‏13 قِّيمنْ غَارسْ خْ ثمُّورْثْ، سبْعَا ن وُوسَّانْ ذ سبْعَا ن دْجِييَاڒِي. ؤُڒَا ذ إِجّنْ وَارْ إِسِّيوڒْ ؤُڒَا ذ إِجّْ ن وَاوَاڒْ غَارسْ، مَاغَارْ ژْرِينْ، أَقَا ڒحْرِيقْ نّسْ ثُوغَا ذ أَمقّْرَانْ أَطَّاسْ.