أَشثْشِي ن أَيُوبْ
3
1 أَوَارْنِي مَانْ أَيَا يَارْزمْ أَيُوبْ أَقمُّومْ نّسْ، إِنْعڒْ أَسّْ ن وخْڒَاقْ نّسْ. ▪ 2 أَيُوبْ إِطّفْ ذڭْ وَاوَاڒْ، إِنَّا:
3 أَذْ إِفْنَا أَسّْ إِ ذِي د-تّْوَاخڒْقغْ،
ؤُڒَا ذ دْجِيڒثْ إِ ذِي نَّانْ: ’إِجّْ ن ورْيَازْ إِتّْوَاكْسِي.‘
4 أجّْ أَسّْ نِّي أَذْ إِذْوڒْ ذ ثَادْجسْثْ،
عمَّارْصْ وَارْ خَاسْ إِتّْسّقْسِي أَربِّي زڭْ ؤُجنَّا،
ؤُ وَارْ خَاسْ ثتّْشعْشِيعْ ثْفَاوْثْ ن ؤُزِيڒْ عَاذْ.
5 إِڒِي ثَادْجسْثْ ذ ثِيڒِي ن ڒْموْثْ أَذْ خَاسْ أَرْزُونْثْ،
ؤُ أجّْ إِسيْنُوثنْ أَذْ زذْغنْ ثِيوَا نّسْ.
إِڒِي أَذْ خَاسْ د-وْضَانْثْ ثْكبَّاسِينْ س ؤُزِيڒْ! ▫
6 أَذْ ثكّسْ ثْكبَّاسْثْ يُودْجْغنْ دْجِيڒثْ نِّي،
أجّْ دْجِيڒثْ نِّي وَارْ ثْفَارّحْ جَارْ وُوسَّانْ ن ؤُسڭّْوَاسْ،
أجّْ إِ-ت وَارْ د-ثتِّيسْ ذِي ڒحْسَابْ ن إِيُورنْ.
7 خْزَارْ، أجّْ دْجِيڒثْ نِّي عمَّارْصْ وَارْ د-ثتِّيرُووْ،
وَارْ ذَايسْ إِتِّيذفْ ؤُسْڒِيوْڒوْ.
8 أجّْ إِنِّي إِسّْفطّْحنْ، أَسّْ نِّي أَذْ ث نعْڒنْ،
إِنِّي إِتّْحَاكَانْ أَذْ سّكَّارنْ ’لِيبِييَاثَانْ‘. ▫
9 أجّْ أَذْ تّْوَاكبّْسنْ إِثْرَانْ ن ثُوفُّوثْ نّسْ،
أجّْ إِ-ث أَذْ إِرَاجَا ثَافَاوْثْ، ڒَامِي وَارْ ذِينْ ثدْجِي.
أجّْ أَبْڒِيونْ ن ثْفَاوْثْ نْ ڒفْجَارْ وَارْ ت ژَترّنْ! ▫
10 مَاغَارْ نتَّا وَارْ إِبلّعْ ثِيوُّورَا ن ؤُعذِّيسْ ن يمَّا،
ؤُ وَارْ إِفَّارْ ڒغْبنْ زَّاثْ إِ ثِيطَّاوِينْ إِنُو.
11 مَايمِّي وَارْ مُّوثغْ ڒَامِي ذ أَيِي ثُوغَا ذڭْ ؤُعذِّيسْ ن يمَّا،
مَايمِّي وَارْ سُّوفّْغغْ بُوحْبڒْ ڒَامِي د-فّْغغْ زڭْ ؤُعذِّيسْ ن يمَّا؟
12 مَايمِّي ذ أَيِي رَاجَانْ إِفَادّنْ،
ؤُ مَايمِّي إِبَّاشْ حِيمَا أَذْ ذَايْسنْ طّضغْ؟
13 خنِّي إِڒِي أَذْ زّْڒغْ ڒخُّو، أَذْ سّْقَارغْ.
إِڒِي أَذْ طّْصغْ. خنِّي بَالَاكْ أَذْ غَارِي ثِيڒِي ڒْهُوذْنثْ،
14 جْمِيعْ أَكْ-ذ إِجدْجِيذنْ ذ إِمْشَاوَارنْ ن ثمُّورْثْ،
إِنِّي إِبْنَانْ إِ يِيخفْ نْسنْ إِجّْ ن ؤُينِّي ن أَرّْوِينَاثْ،
15 نِيغْ جْمِيعْ أَكْ-ذ ڒْحُوكَّامْ نِّي غَارْ إِدْجْ وُورغْ،
إِنِّي إِشُّورنْ ثُوذْرِينْ نْسنْ س نُّوقَارْثْ،
16 نِيغْ نشّْ وَارْ تِّيڒِيغْ عَاذْ، أَمْ إِجّْ ن وغْرَايْ ن ثمْغَارْثْ سّْنُوفَّارنْ ث،
أَمشْنَاوْ إِسيْمَانْ نِّي عمَّارْصْ وَارْ إِژْرِينْ ثَافَاوْثْ.
17 ذِينِّي سّْبدّنْ إِعفَّاننْ زِي ضّْذعْ،
ؤُ ذِينِّي تَّاريَّاحنْ إِنِّي ؤُمِي إِفْنَا جّهْذْ نْسنْ.
18 ذِينِّي تَّاريَّاحنْ إِمحْبَاسْ مُوننْ،
وَارْ قِّيمنْ تّسْڒَانْ عَاذْ إِ ثْمِيجَّا ن إِمْزيَّارنْ ن إِسمْغَانْ.
19 أَقَا ذِينْ أَمژْيَانْ ذ ؤُمقّْرَانْ،
ؤُشَا إِسْمغْ إِنُّوفْسڒْ زِي بَابْ نّسْ.
20 مَايمِّي ثمّوْشْ ثْفَاوْثْ إِ ڒْمسْكِينْ،
ؤُ ثُوذَارْثْ ؤُمِي ينِّي ؤُمِي إِتّْوَاسَّارْزڭْ ڒعْمَارْ نْسنْ،
21 إِ ينِّي إِتّْمژْرنْ ذِي ڒْموْثْ، مَاشَا وَارْ ت ؤُفِينْ،
إِنِّي إِغزَّانْ خْ ڒْموْثْ كْثَارْ خْ ڒكْنُوزْ إِنُّوفَارنْ،
22 إِنِّي إِفَارّْحنْ أَطَّاسْ أَڒَامِي ذوْڒنْ نڭّْزنْ
ؤُ تّْغبَّانْ مژْرِي خْمِي تَّافنْ أَنْضڒْ؟
23 مَايمِّي ثمّوْشْ ثْفَاوْثْ إِ ورْيَازْ ونِّي ؤُمِي إِتّْوَاسْنُوفَّارْ وبْرِيذْ نّسْ،
ؤُ ونِّي خفْ إِبلّعْ أَربِّي زِي مَارَّا إِغزْذِيسنْ؟
24 مِينْزِي ذڭْ ومْشَانْ ن وغْرُومْ إِنُو إِتَّاسْ-د ؤُسْقِينفْ إِنُو،
إِغُويَّانْ إِنُو تّْوَازدْجْعنْ أَمْ وَامَانْ.
25 مِينْزِي ثُوغَا تّْنخْڒَاعغْ ؤُ أَمنِّي د-إِفّغْ،
ؤُ مِينْ زِي ثُوغَا تّڭّْوذغْ، وْضِيغْ ذَايسْ.
26 وَارْ غَارِي ڒْهُوذْنثْ، وَارْ أَرْسِيغْ شَا ؤُ وَارْ تَّاريِّيحغْ.
أَقَا ؤُسِينْ-د إِمْخُومْبَارْ.