‏1 خنِّي يَارَّا-د إِلِيفَازْ، ونِّي د-يُوسِينْ زِي ثَايْمَانْ، إِنَّا:

‏2 مَاڒَا حذْ يَارْزُو مَاحنْذْ أَذْ كِيكْ إِسِّيوڒْ، مَا أَذْ ثتّْوَاشضْنذْ س مَانْ أَيَا؟

مَاشَا مَانْ ونْ إِزمَّارنْ أَذْ إِسّْبدّْ ڒْهَارْذْ نّسْ؟

‏3 خْزَارْ، ثسّْغَارذْ أَطَّاسْ ن إِوْذَانْ،

ؤُ إِفَاسّنْ يَارْخُونْ ثسّْمحْضذْ إِ-ثنْ.

‏4 ونِّي إِنْقَارْضنْ، ثسّْبدّذْ ث س وَاوَاڒْ نّكْ،

ؤُ إِفَادّنْ إِفشْڒنْ ثوْشِيذْ أَسنْ جّهْذْ عَاوذْ.

‏5 مَاشَا ڒخُّو إِمْسَارْ أَيَا إِ شكْ ؤُشَا ثتّْوَاشضْنذْ،

ڒخُّو إِڒْقفْ إِ شكْ أَيَا ؤُشَا ثَارجْفذْ.

‏6 مَا وَارْ ثدْجِي ثِيڭّْوُوذِي زِي أَربِّي ذ ڒَامَانْ نّكْ،

ؤُ ڒصْفَايثْ ن إِبْرِيذنْ نّكْ ذ ڒَايَاسْ نّكْ؟

‏7 خمّْ مَاشَا! مَانْ ونْ إِتّْوَاهلّْكنْ أَمْ إِدْجْ ذ أَمزْذَاڭْ،

ؤُ مَانِي تّْوَاثحَّانْ إِنِّي إِڭُّورنْ نِيشَانْ؟

‏8 ژْرِيغْ أَقَا إِنِّي إِشَارّْزنْ دّدْجْ ذ ينِّي إِزَارّْعنْ ڒغْبنْ

أَذْ ث مْجَارنْ عَاوذْ. ^▪  

‏9 أَذْ هلّْكنْ زڭْ ؤُسُوضِي ن نّفْسْ ن أَربِّي،

ؤُ أَذْ فْنَانْ س ؤُصُوضِي زڭْ ونْزَارنْ نّسْ. ^▪  

‏10 زّْهِيرْ ن ويْرَاذْ ذ ثْمِيجَّا ن يِيزمْ أَمژْيَانْ

ؤُڒَا ذ ثِيغْمَاسْ ن وَايْرَاذنْ إِمژْيَاننْ أَذْ تّْوَارْژَانْ.

‏11 أَذْ إِهلّكْ وَايْرَاذْ، مِينْزِي وَارْ ذِينْ يُوفِي زَّارْذثْ،

ؤُ أَذْ تّْوَابزّْعنْ ثَارْوَا ن ثَايْرَاذْثْ.

‏12 ذِي ثْنُوفّْرَا يِيوضْ أَيِي-د إِجّْ ن وَاوَاڒْ،

ؤُ أَمزُّوغْ إِنُو إِطّفْ زَّايسْ ڒحْمِيسْ،

‏13 أَمْ ثُوغَا غَارّْقغْ ذڭْ إِخَارِّيصنْ إِسّْخَارْوِيضنْ زِي ثْمژْرَا ن دْجِيڒثْ،

ڒَامِي د-إِوْضَا يِيضصْ يُودْجْغنْ خْ إِوْذَانْ.

‏14 ثڒْقفْ أَيِي ثِيڭّْوُوذِي ذ ثَارْجِيجِيثْ،

ؤُ مَارَّا إِخْسَانْ إِنُو نّْخڒْعنْ.

‏15 إِجّْ ن بُوحْبڒْ إِحَارَا خْ ؤُغمْپُوبْ إِنُو،

إِسّْبدّْ أَشوَّافْ ذِي أَرِّيمثْ إِنُو.

‏16 نتَّا إِبدّْ، مَاشَا وَارْ عْقِيڒغْ خْ ثفْرَاسْ نّسْ.

إِجّْ ن وَادُّوذْ إِبدّْ زَّاثْ إِ ثِيطَّاوِينْ إِنُو.

خنِّي سْڒِيغْ إِ ثْمِيجَّا ثتّمْثِيمْ، ثقَّارْ:

‏17 ’مَا إِزمَّارْ إِجّْ ن بْنَاذمْ أَذْ يِيڒِي إِسڭّذْ خْ أَربِّي؟

مَا إِزمَّارْ إِجّْ ن ورْيَازْ أَذْ يِيڒِي إِصْفَا خْ ونِّي ث إِڭِّينْ؟‘

‏18 خْزَارْ، وَارْ إِتّْشِيڒِي نتَّا ؤُڒَا خْ إِمْسخَّارنْ نّسْ،

ؤُشَا إِڭَّا ڒْعِيبْ أَكْ-ذ لْمَالَاكَاثْ نّسْ ؤُمِي ودَّارنْثْ. ^▪  

‏19 خنِّي أَمْ ؤُمزْوَارْ نِّي إِزدّْغنْ ذِي ثُوذْرِينْ ن ؤُشَاڒْ،

إِنِّي غَارْ ثدْجْ ثْعجَّاجْثْ ذ ذْسَاسْ.

أَقَا أَذْ تّْوَاڒبْزنْ أَمزْوَارْ خْ ثْشِينْذَا.

‏20 زِي ثُوفُّوثْ ن ضّْبحْ غَارسْ أَڒْ ثَامذِّيثْ أَذْ تّْوَافَارْثْكنْ.

بْڒَا مَا أَذْ إِوْشْ بْنَاذمْ ثَايْنِيثْ إِ مَانْ أَيَا، أَذْ فْنَانْ إِ ڒبْذَا.

‏21 مَا وَارْ د-ثتّْوَاقْڒعْ غَارْسنْ ثسْغُونْثْ ن ؤُقِيضُونْ نْسنْ؟

أَذْ مّْثنْ، مَاشَا وَارْ إِدْجِي ذِي ثِيغِيثْ.