5
1 ڒَاغَا مَاشَا! مَا ذِينْ شَا ن يِيجّنْ إِ خَاكْ د غَا يَارّنْ؟ غَارْ مَانْ زڭْ إِمْقدَّاسنْ إِ غَا ثْسوْضذْ؟
2 مِينْزِي أَخيّقْ إِنقّْ أَپُوهَاڒِي،
ؤُ ثُوسْمِي ثْنقّْ أَقُوبَّانِي.
3 ژْرِيغْ إِجّْ ن ؤُپُوهَاڒِي إِضْڒقْ إِ وژْوَارْ،
مَاشَا خْ إِشْثْ ن ڒْغفْڒثْ ثُوغَا إِتّْخصَّا أَذْ نعْڒغْ ثَازذِّيغْثْ نّسْ.
4 إِڭّْوجنْ إِحنْجِيرنْ نّسْ خْ ؤُسنْجمْ،
تّْوَادّْزنْ غَارْ ثوَّارْثْ ن ثنْذِينْثْ
ؤُشَا وَارْ ثُوغِي ذِينْ وِي ثنْ إِ غَا إِسّْنجْمنْ،
5 ؤُمِي إِشَّا ؤُمهْيُوفْ صَّابثْ نّسْ،
- إِسُّوفّغْ إِ-ث-إِ-د عَاذْ زڭْ إِسنَّاننْ -،
ؤُ إِصَارْضْ ؤُخوَّانْ أَڭْڒَا نْسنْ.
6 مَاغَارْ وَارْ إِدْجِي زِي ثْعجَّاجْثْ إِ زِي د-إِتّكّْ ڒْغَارْ،
ؤُ زِي ثمُّورْثْ وَارْ د-ثْغمِّي ثَامَارَا وَارْ إِنفّْعنْ،
7 مَاشَا بْنَاذمْ إِتّْوَاخْڒقْ-د إِ ثَامَارَا وَارْ إِنفّْعنْ،
أَمْ ثْشعَّاڒِينْ ن ثْمسِّي طَّاونْثْ غَارْ ؤُجنَّا.
8 نشّْ مَاشَا إِڒِي أَرْزُوغْ أَربِّي،
أَذْ سِّيوْضغْ ثَامسْڒَاشْثْ إِنُو غَارْ أَربِّي،
9 ونِّي إِتّڭّنْ ثِيمسْڒَايِينْ ثِيمقّْرَانِينْ،
وَارْ ذِينْ وِي ثنْثْ إِ غَا إِفهْمنْ،
إِتّڭّْ لْمُوعْجِيزَاثْ إِ وَارْ إِزمَّارْ أَذْ تّْوَاحسْبنْثْ. ▪
10 إِسَّاكّْوَاضْ-د أَنْژَارْ خْ وُوذمْ ن ثمُّورْثْ،
ؤُشَا إِسّكَّا أَمَانْ خْ وُوذمْ ن إِيَّارنْ،
11 حِيمَا أَذْ إِسّْڭعّذْ إِمْوَاضْعنْ،
ؤُشَا إِنِّي إِشضْننْ أَذْ ثنْ سُّوعْڒَانْ غَارْ ڒَامَانْ. ▪
12 نتَّا إِسّْبطّڒْ إِنْوَاينْ ن إِحْرَايْمِييّنْ،
أَڒَامِي إِفَاسّنْ نْسنْ وَارْ زمَّارنْ أَذْ ڭّنْ وَالُو. ▪
13 إِمِيغِيسنْ إِمنّعْ إِ-ثنْ ذِي ثحْرَايْمشْثْ نْسنْ،
ؤُشَا إِتّْوَاسْبطّڒْ شّْوَارْ ن إِحْرَايْمِييّنْ. ▪
14 ذڭْ ؤُزِيڒْ مّْسَاڭَارنْ أَكْ-ذ ثَادْجسْثْ،
ؤُشَا ذِي طّْحَا ن ؤُزِيڒْ تّْفَافَانْ أَمْ تّْفَافَانْ ذِي دْجِيڒثْ. ▪
15 نتَّا إِسّنْجَامْ زِي سِّيفْ إِ د-إِتّفّْغنْ زڭْ ؤُقمُّومْ نْسنْ،
ؤُڒَا ذ أَمزْڒُوضْ زڭْ ؤُفُوسْ ن ونِّي إِجهْذنْ.
16 أَمُّو إِ يدْجْ ڒَايَاسْ إِ ؤُمزْڒُوضْ،
ؤُشَا دّدْجْ أَذْ إِبلّعْ أَقمُّومْ نّسْ. ▪
17 خْزَارْ، سّعْذْ ن ورْيَازْ ونِّي إِسڭّمْ أَربِّي.
س ؤُيَا وَارْ ثسّحْقِيرِي شَا تَّارْبِييّثْ ن ؤُمْزمَّارْ خْ كُوڒْشِي! ▪
18 مَاغَارْ نتَّا إِسّْيزّمْ ؤُ إِتّْشدَّا،
إِشَّاثْ، ؤُشَا خنِّي إِفَاسّنْ نّسْ سّْڭنْفَانْ. ▪
19 ذِي ستَّا ن ڒحْصَارَاثْ أَذْ شكْ إِفكّْ،
ذِي ثنِّي وِيسّْ سبْعَا وَارْ ڭُّورْ أَذْ شكْ إِڒْقفْ ڒْغَارْ. ▪
20 ذِي ڒَاژْ أَذْ شكْ د-إِسّنْجمْ زِي ڒْموْثْ،
ذڭْ ؤُمنْغِي زِي ثِييِّيثَا ن سِّيفْ.
21 أَذْ ثِيڒِيذْ ذِي ڒَامَانْ زَّاثْ إِ ؤُركُّوضْ ن يِيڒسْ،
وَارْ ثتّڭّْوذذْ شَا زڭْ وَاردّدْجْ مَاڒَا يُوسَا-د.
22 خْ وَاردّدْجْ ذ ڒَاژْ ثْزمَّارذْ أَذْ ثْضحْشذْ،
زِي ڒوْحُوشْ ن ڒخْڒَا ن ثمُّورْثْ وَارْ ثتّڭّْوذذْ.
23 مَاغَارْ ثْقضْعذْ ڒْعَاهْذْ أَكْ-ذ إِژْرَا ن ييَّارْ،
خنِّي ڒوْحُوشْ ن ڒخْڒَا أَذْ كِيذكْ دَّارنْ ذِي ڒهْنَا. ▪
24 أَذْ ثَارْڭْبذْ أَقَا ڒهْنَا ذ أَقِيضُونْ نّكْ،
أَذْ ثْبقّْشذْ ثَازذِّيغْثْ نّكْ، أَذْ ثَافذْ وَارْ شكْ إِتّْخصِّي وَالُو.
25 شكْ أَذْ ثسّْنذْ أَقَا أَرَّاوْ نّكْ أَطَّاسْ،
ؤُ دُّورّْيثْ نّكْ أَمْ وفْسُو أَزِيزَا ن ثمُّورْثْ.
26 أَذْ ثَاذْفذْ غَارْ ونْضڒْ ذِي ثوْسَارْ،
أَمْ مَامّشْ سّْڭعّْذنْ إِجّْ ن ؤُعُورِّيشْ ن ثْقبِّيضِينْ ن إِمنْذِي
غَارْ ؤُنذْرَارْ ذِي ڒْحَاڒْ نّسْ.
27 خْزَارْ، مَانْ أَيَا، أَقَا نشِّينْ نَارْزُو ذَايسْ، أَمُّو إِ ثدْجْ!
سڒْ غَارسْ ؤُشَا سّنْ إِ-ث ذڭْ يِيخفْ نّكْ!