ثَامْوَارِّيثْ ن أَيُوبْ خْ إِلِيفَازْ - أَفقُّوسْ نّسْ
6
1 يَارَّا-د أَيُوبْ، إِنَّا: 2 أَ، مْڒِي مَاشَا معْلِيكْ إِتّْوَاوْزنْ ڒْهمّْ إِنُو،
مْڒِي جِّينْ أَذْ إِڭعّذْ خْ ڒْمِيزَانْ ؤُڒَا ذ ڒغْبنْ إِنُو أَكِيذسْ إِمُونْ!
3 مَاغَارْ ڒخُّو أَقَا-ث إِذْقڒْ خْ يجْذِي ن ڒبْحُورْ،
خْ ؤُيَا تّفّْغنْ وَاوَاڒنْ إِنُو نْهْڒَا أَخمّمْ. ▪
4 مَاغَارْ نُّوغنْثْ ذَايِي فْڒِيثْشَاثْ ن ؤُمْزمَّارْ خْ كُوڒْشِي،
أَڒَامِي بُوحْبڒْ إِنُو إِسسّْ أَرّْهَاجْ نْسنْثْ.
إِنخْڒِيعنْ زِي أَربِّي كَّارنْ-د أَكِيذِي. ▪
5 مَا إِسّْحُونْذْرُوثْ وغْيُوڒْ ن ڒخْڒَا غَارْ أَرّْبِيعْ أَزِيزَا؟
نِيغْ إِسّْمُوهْرُوثْ ؤُفُونَاسْ غَارْ هدُّو نّسْ؟
6 مَاشَّا بْڒَا أَڒذِّي مَا أَذْ ث يشّْ بْنَاذمْ بْڒَا ثَامدْجَاحْثْ؟
نِيغْ أَقَا ذِينْ أَڒذِّي ذِي ڒْمحّْ أَشمْڒَاڒْ ن ثْمدْجَاتْشْ؟
7 مِينْ يُوڭِي ڒعْمَارْ إِنُو أَذْ ث إِحَاذَا،
ڒخُّو أَيَا مَارَّا إِ نشّْ أَمْ مَاشَّا إِغُومّنْ.
8 مْڒِي د غَا يَاسْ مِينْ أَرزُّوغْ،
إِوَا، إِوْشَا أَربِّي مِينْ سِيتِّيمغْ.
9 مْڒِي ثُوغَا إِخْسْ سِيذِي مَاحنْذْ أَذْ أَيِي إِڒْبزْ،
مَاحنْذْ أَذْ إِسَّارْخُو أَفُوسْ نّسْ ؤُ مَاحنْذْ أَذْ أَيِي إِقسّْ.
10 مَانْ أَيَا أَذْ أَيِي يِيڒِي عَاذْ ذ أَفوّجْ،
أَذْ أَيِي إِنْعشْ ذِي ڒحْرِيقْ نِّي وَارْ خَافِي إِسّْعِيزِّي شَا،
مَاغَارْ وَارْ نْكَارغْ شَا أَوَاڒنْ ن ؤُمْقدَّاسْ.
11 مِينْ إِعْنَا جّهْذْ إِنُو، أَقَا زمَّارغْ أَذْ رَاجِيغْ عَاذْ؟
نِيغْ مِينْ إِعْنَا ؤُنڭَّارُو إِنُو، أَذْ سبَّاڒغْ إِخفْ إِنُو عَاذْ؟
12 مَا جّهْذْ إِنُو أَمْ جّهْذْ ن إِژْرَا؟
مَا أَرِّيمثْ إِنُو أَمْ نّْحَاسْ؟
13 مَا وَارْ دْجِيغْ قَاعْ بْڒَا ثْوِيزَا س يِيخفْ إِنُو،
مَا وَارْ خَافِي إِتّْوَاكّسْ ؤُفكِّي قَاعْ؟
14 ونِّي ؤُمِي إِقْضعْ ڒَايَاسْ إِتّْخصَّا أَسْ ثَامخْسِيوْثْ إِشُووَّارنْ زڭْ ؤُمدُّوكّڒْ نّسْ،
مَاڒَا لَّا إِزمَّارْ أَذْ يجّْ ثِيڭّْوُوذِي زڭْ ؤُمْزمَّارْ خْ كُوڒْشِي.
15 أَيْثْمَا بَاننْ-د ذ إِغدَّارنْ أَمْ ثْغزْرِينْ ذڭْ إِذُورَارْ،
أَمْ ثَاسُّوثْ ن ثْغزْرِينْ نِّي إِعدُّونْ ذغْيَا،
16 إِنِّي إِتّْبَارّْشِيننْ س وجْرِيسْ،
ؤُ إِنِّي ذِي إِسّْنُوفَّارْ وذْفڒْ إِخفْ نّسْ.
17 ذڭْ وُوسَّانْ نِّي ذِي ذوْڒنْثْ حْصَارنْثْ، بدّنْثْ،
خْمِي حمَّانْثْ، تَّاژْغنْثْ، إِمْحَا ومْشَانْ نْسنْثْ.
18 إِبْرِيذنْ ن ثشْڒِي نْسنْ فَارْغنْ،
ڭعّْذنْ ذِي ڒعْوِينْ ؤُشَا ودَّارنْ.
19 إِمْسبْرِيذنْ زِي ثَايْمَا قِّيمنْ تّْشعَّاينْ،
إِكَارَاوَاننْ زِي شَابَا تّْرَاجَانْ ثنْثْ.
20 نِيثْنِي تّْوَاشمْثنْ ذڭْ ؤُثشْڒِي نِّي غَارْسنْ.
ؤُسِينْ-د غَارْ ثْغزْرِينْ ذڭْ إِذُورَارْ ؤُشَا بَارّْقنْ.
21 س ثِيذتّْ، ڒخُّو ثْذوْڒنْثْ كنِّينْثْ ذ وَالُو،
ثژْرِينْثْ أَرْژِييّثْ إِنُو ؤُشَا ثڭّْوذنْثْ.
22 مَا نِّيغْ: ’أَوْيمْ أَيِي-د شَا!‘
نِيغْ: ’وْشمْ أَيِي ثِيرْزِيفِينْ زڭْ وَاڭْڒَا نْومْ!‘
23 نِيغْ: ’فكّْ أَيِي زڭْ ؤُفُوسْ ن ونِّي إِحصَّارنْ!‘
نِيغْ: ’فْذِي أَيِي زڭْ ؤُفُوسْ ن أَيْثْ ن بُو-ڒخْشُونثْ!‘
24 سْغَارْ أَيِي، خنِّي أَذْ سّغْذغْ،
سْشنْ أَيِي مِينْ ذِي ودَّارغْ!
25 مَامّشْ جهّْذنْ وَاوَاڒنْ يشْنَانْ،
مَاشَا مِينْ خفْ أَوبّخْ نْومْ؟
26 مَا ثتّْخَارّْصمْ ذڭْ وَاوَاڒنْ مَاحنْذْ أَذْ أَيِي ثْوبّْخمْ؟
مَا خنِّي أَوَاڒنْ ن ونِّي ؤُمِي قضْعنْ ڒَايَاسْ أَمْ ڒعْوِينْ إِ كنِّيوْ؟
27 عَاذْ خْ يِيجّْ ن ؤُنِيپُو أَيُوجِيڒْ أَذْ خَاسْ ثنْضَارمْ ثَاقدُّوحْثْ،
ؤُ عَاذْ خْ يِيجّْ ن ؤُمدُّوكّڒْ نْومْ أَذْ خَاسْ ثڭّمْ ثَامعْمُوتْشْ.
28 خنِّي ڒخُّو، مَاڒَا ثخْسمْ، حْضَامْ خَافِي مْلِيحْ،
نشّْ وَارْ خَاومْ سّْخَارِّيقغْ ذڭْ ؤُغمْپُوبْ نْومْ.
29 قدْجْبمْ أَيِي، وَارْ إِعدّڒْ أَذْ يِيڒِي دّدْجْ.
قدْجْبمْ أَيِي عَاوذْ، ثَاسڭْذَا إِنُو ثْبدّْ عَاذْ نِيشَانْ.
30 مَا أَقَا ذِينْ ڒْغشّْ خْ يِيڒسْ إِنُو؟
مَا وَارْ إِتّْڒذِّي وَانغْ إِنُو خْ مِينْ وَارْ إِحْڒِينْ؟