أَيُوبْ يَارْنِي ذِي ثمْوَارِّيثْ نّسْ إِ إِلِيفَازْ: مَا وَارْ إِدَّارْ بْنَاذمْ ثُوذَارْثْ ثقْسحْ؟
7
1 مَا وَارْ ذِينْ إِدْجِي ؤُمنْغِي إِتّْخصَّانْ أَذْ ث إِمْنغْ بْنَاذمْ خْ ثمُّورْثْ، ؤُ مَا وَارْ دْجِينْ وُوسَّانْ نّسْ أَمْ وُوسَّانْ ن ؤُشوَّاڒْ؟
2 أَمْ إِتّْمژْرِي إِمْسغْ غَارْ ثِيڒِي،
أَمْ إِتّْرَاجَانْ ؤُشوَّارْ ڒْمُونثْ،
3 أَمُّو ذوْڒنْ إِيُورنْ شُّورنْ س ؤُبَارّقْ ذ ثَاسْغَارْثْ إِنُو،
ؤُ دْجْيَاڒِي شُّورنْثْ س ثَامَارَا بْضَانْ أَيِي ثنْثْ.
4 خْمِي تّزّْڒغْ تّطّْصغْ، قَّارغْ
’مڒْمِي زمَّارغْ أَذْ كَّارغْ، مڒْمِي إِ غَا ثعْذُو دْجِيڒثْ؟‘
جِّيوْنغْ س ڒهْوڒْ أَڒْ ذ يفُّو ڒْحَاڒْ.
5 أَرِّيمثْ إِنُو ثْيَارْضْ ذڭْ إِكشَّاونْ ؤُ ذِي ثقْشُورِينْ ن ؤُشَاڒْ،
ثِيڒْمشْثْ إِنُو ثْقطَّا ؤُ ثتّْڭيّحْ.
6 ذغْيَا خْ ؤُمكُّوكْ ن ؤُخيَّاضْ عدُّونْ وُوسَّانْ إِنُو،
عدُّونْ بْڒَا أَسِيثمْ.
7 عْقڒْ، أَقَا ثُوذَارْثْ إِنُو ذ أَصُوضِي ن نّفْسْ وَاهَا،
ؤُ ثِيطّْ إِنُو وَارْ ثْژَارّْ عمَّارْصْ عَاذْ مِينْ إِصبْحنْ. ▪
8 ثِيطّْ ن ونِّي ذ أَيِي إِتّْوَاڒَانْ، وَارْ ذ أَيِي ثْژَارّْ عَاذْ.
ثِيطَّاوِينْ نّكْ أَذْ خَافِي إِڒِينْثْ، مَاشَا نّشْ وَارْ ذَا تِّيڒِيغْ عَاذْ.
9 أَمْ مَامّشْ إِتّْذُورُّوقْ ؤُسيْنُو، إِعدُّو،
أَمُّو إِ غَا إِهْوَا ذِي ڒَاخَارْثْ، وَارْ زَّايسْ د-إِتّْڭعِّيذْ عَاذْ.
10 عمَّارْصْ وَارْ د-إِتّْعِيقِّيبْ غَارْ ثَادَّارْثْ نّسْ،
عمَّارْصْ وَارْ خَاسْ إِتّعْقِيڒْ ومْشَانْ نّسْ.
11 أَمُّو إِ وَارْ تّقّْنغْ أَقمُّومْ إِنُو،
أَذْ سِّيوْڒغْ ذِي ڒحْصَارثْ ن بُوحْبڒْ إِنُو،
أَذْ شثْشِيغْ ذِي ثَارْزُوڭِي ن ڒعْمَارْ إِنُو.
12 مَا نشّْ ذ ڒبْحَارْ نِيغْ ذ ڒْهَايْشثْ،
أَقَا شكْ ثسّْبدّذْ خَافِي أَعسَّاسْ؟
13 مَاڒَا نِّيغْ نشّْ: ’ثَاسُّوثْ أَذْ أَيِي ثْعزَّا،
قَامَا إِنُو أَذْ خَافِي ثسّهْونْ أَشثْشِي إِنُو!‘،
14 أَمُّو إِذْ أَيِي ثتّْغزِّيذْ س ثِيرْجِيوِينْ،
ؤُ س ثْمژْرِيوِينْ ثسَّاڭّْوَاذذْ أَيِي،
15 أَڒَامِي إِذْوڒْ ڒعْمَارْ إِنُو إِتِّيخْضَارْ أَجيّفْ،
إِتِّيخْضَارْ ڒْموْثْ خْ ييْسَانْ إِنُو.
16 نشّْ تّْعِيفِّيغْ مَانْ أَيَا، وَارْ دَّارغْ إِ ڒبْذَا.
أَرْخُو زَّايِي، مَاغَارْ ؤُسَّانْ إِنُو أَمْ أَصُوضِي ن نّفْسْ وَاهَا.▪
17 مِينْ إِعْنَا بْنَاذمْ أَقَا شكْ ثْحسّْبذْ ث ذ أَمقّْرَانْ أَمُّو،
ؤُ ثڒْهِيذْ أَكِيذسْ س وُوڒْ نّكْ؟ ▪
18 أَقَا شكْ ثَارزّْفذْ غَارسْ قَاعْ أَثفُّو،
ثْقدْجْبذْ إِ-ث قَاعْ ثَازحْزِيهْثْ؟
19 مشْحَاڒْ عَاذْ وَارْ زَّايِي ثتّكّْسذْ ثِيطَّاوِينْ،
وَارْ ذ أَيِي ثَارخُّوذْ حِيمَا أَذْ سّْغڒْيغْ إِكُوفَّانْ إِنُو؟
20 مَا خْضِيغْ؟ مِينْ ذ أَشْ إِ غَا ڭّغْ إِ شكْ،
إِ شكْ أَ-يْ-أَعسَّاسْ ن بْنَاذمْ؟
مَايمِّي إِ ذ أَيِي ثسّْبدّذْ ذ ثَاحْجُورْثْ زَّاثكْ،
ؤُ ذوْڒغْ ذ دّْقڒْ إِ يِيخفْ إِنُو؟
21 مَايمِّي وَارْ ذ أَيِي ثْغفَّارذْ أَخطُّو إِنُو،
ؤُ وَارْ ثْعدُّوذْ خْ ڒْمُوعْصِييّثْ إِنُو؟
مَاغَارْ ڒخُّو أَذْ زّْڒغْ ذِي ثْعجَّاجْثْ ؤُ شكْ أَذْ خَافِي ثَارْزُوذْ،
مَاشَا وَارْ تِّيڒِيغْ عَاذْ.