143
1 أَزهّذْ ن ذَاوُوذْ. أَ سِيذِي، سڒْ إِ ثْژَادْجِيثْ إِنُو، سْحسّْ إِ ؤُزَاوڭْ إِنُو.
أَرّْ-د خَافِي عْلَاحْسَابْ ثِيذتّْ نّكْ، عْلَاحْسَابْ ثَاسڭْذَا نّكْ.
2 وَارْ تّڭّْ شّْرعْ أَكْ-ذ ؤُمْسخَّارْ نّكْ،
مَاغَارْ ؤُڒَا ذ إِجّْ زڭْ إِنِّي إِدَّارنْ أَذْ يِيڒِي ذ أَمْسڭّذْ زَّاثْ إِ وُوذمْ نّكْ. ▪
3 مِينْزِي ڒعْذُو إِضفَّارْ ڒعْمَارْ إِنُو،
إِعفّسْ خْ ثُوذَارْثْ إِنُو غَارْ ثمُّورْثْ،
إِسّْرُوسَا أَيِي ذڭْ إِمُوشَانْ ن ثَادْجسْثْ،
أَمْ ينِّي إِمُّوثنْ زِي مشْحَاڒْ ؤُيَا.
4 بُوحْبڒْ إِنُو إِتّفْشِيڒْ خَافِي،
ؤُڒْ إِنُو يَاروّعْ ذِي ذَاخڒْ إِنُو.
5 نشّْ تّْعقْڒغْ خْ وُوسَّانْ إِعْذُونْ،
تّْخمَّامغْ ذِي مَارَّا ثِيمڭَّا نّكْ،
تّْخَارّْصغْ ذِي ڒفْعَايڒْ ن إِفَاسّنْ نّكْ. ▪
6 نشّْ تّْبزّْعغْ إِفَاسّنْ إِنُو غَاركْ،
ڒعْمَارْ إِنُو أَقَا-ث زَّاثكْ أَمْ إِشْثْ ن ثمُّورْثْ إِفُّوذنْ. سِيلَاهْ.
7 أَرّْ-د خَافِي ذغْيَا، أَ سِيذِي، بُوحْبڒْ إِنُو إِتّفْشِيڒْ،
وَارْ سّْنُوفَّارَا ؤُذمْ نّكْ زَّايِي،
مَاحنْذْ وَارْ دِّيكّْوِيڒغْ أَمْ ينِّي د-إِهكّْوَانْ ذڭْ وحْفُورْ ن ونْضڒْ.
8 أجّْ أَيِي أَذْ سْڒغْ إِ ثْمخْسِيوْثْ نّكْ إِشوَّارنْ غَارْ ثفُّوثْ،
مَاغَارْ تّشْڒغْ خَاكْ.
سْشنْ أَيِي أَبْرِيذْ إِ غَا ؤُيُورغْ،
مَاغَارْ سّْڭعّْذغْ ڒعْمَارْ إِنُو غَاركْ. ▪
9 أَ سِيذِي، كّسْ أَيِي-د إِ ڒْعذْيَانْ إِنُو،
غَاركْ إِ د-أَروْڒغْ.
10 سڒْمذْ أَيِي أَذْ ڭّغْ مِينْ إِدْجَانْ إِ أَرْضَا نّكْ، مَاغَارْ شكْ ذ أَربِّي إِنُو.
أجّْ أَرُّوحْ نّكْ إِصبْحنْ أَذْ أَيِي إِنْذهْ ذڭْ إِشْثْ ن ثمُّورْثْ إِوَاطَانْ.
11 أَ سِيذِي، أَرّْ-د ذَايِي ثُوذَارْثْ ذِي طّْوعْ ن يِيسمْ نّكْ.
س ثْسڭْذَا نّكْ، سُوفّغْ ڒعْمَارْ إِنُو زِي ڒحْصَارثْ،
12 أَردّدْجْ ڒْعذْيَانْ إِنُو ذِي ثْمخْسِيوْثْ نّكْ إِشوَّارنْ،
قْضَا خْ مَارَّا إِنِّي ذ أَيِي إِحصَّارنْ،
مَاغَارْ نشّْ ذ ؤُمْسخَّارْ نّكْ. ▪