139
1 إِ ؤُمقّْرَانْ ن إِمغْنَاجنْ. ن ذَاوُوذْ. أَزهّذْ. أَ سِيذِي، شكْ ثْبقّْشذْ أَيِي ؤُ ثسّْنذْ أَيِي.
2 شكْ ثسّْنذْ أَغِيمِي إِنُو ذ ؤُبذِّي إِنُو،
زِي ڒَاڭّْوَاجْ ثْفهّْمذْ إِخَارِّيصنْ إِنُو.
3 خْمِي ڭُّورغْ ؤُ خْمِي طّْصغْ ثَارزُّوذْ ذَايِي،
أَقَا شكْ ثسّْنذْ مَارَّا إِبْرِيذنْ إِنُو.
4 مِينْزِي وَارْ ذِينْ ؤُڒَا ذ إِجّْ ن وَاوَاڒْ خْ يِيڒسْ إِنُو،
ؤُ خْزَارْ، شكْ أَ سِيذِي، ثسّْنذْ ث كُوڒْشِي.
5 شكْ ثْحصَّارذْ أَيِي زِي ضفَّارْ ؤُ زِي زَّاثْ،
ثسَّارْسذْ خَافِي ثَاڒقَّا ن ؤُفُوسْ نّكْ.
6 ثُوسّْنَا أَيَا ذ أَثبْهثْ إِ نشّْ،
ثُوعْڒَا خَافِي، وَارْ زمَّارغْ أَذْ ت أَوْضغْ.
7 غَارْ مَانِي زمَّارغْ أَذْ رَاحغْ زِي أَرُّوحْ نّكْ،
غَارْ مَانِي إِ غَا أَروْڒغْ زڭْ وُوذمْ نّكْ؟
8 مَاڒَا ڭعّْذغْ غَارْ ؤُجنَّا، أَقَا شكْ ذِينِّي،
مَاڒَا ڭِّيغْ ڒَاخَارْثْ ذ ثَاسُّوثْ إِنُو،
خْزَارْ، أَقَا شكْ ؤُڒَا ذِينِّي، ▪
9 مَاڒَا كْسِيغْ أَفْرِيونْ أَمْ ثْفَاوْثْ ن ڒفْجَارْ،
أَذْ زذْغغْ غَارْ ؤُنڭَّارْ قَاعْ ن ڒبْحَارْ، ▫
10 خنِّي ؤُڒَا ذِينِّي أَذْ أَيِي إِنْذهْ ؤُفُوسْ نّكْ،
أَفُوسْ نّكْ أَفُوسِي أَذْ أَيِي إِطّفْ.
11 مَاڒَا نِّيغْ: ”إِوَا ثَادْجسْثْ، وْضَا-د خَافِي،
خنِّي دْجِيڒثْ ذ ثْفَاوْثْ إِ ذ أَيِي إِقُووَّارنْ.
12 إِ شكْ ثَادْجسْثْ وَارْ ثدْجِي ذ طّْڒَامْ،
إِ شكْ دْجِيڒثْ ثتّڭّْ ثْفَاوْثْ أَمْ ؤُزِيڒْ،
إِ شكْ ثَادْجسْثْ أَقَا-ت أَمْ ثْفَاوْثْ.
13 مِينْزِي شكْ ثْخڒْقذْ-د ثِيژَّاڒْ إِنُو،
ثْمُوذذْ أَيِي ذڭْ ؤُعذِّيسْ ن يمَّا.
14 قَاذِيغْ شكْ ؤُمِي د-تّْوَاخڒْقغْ زڭْ إِشْثْ ن ثبْرِيذْثْ ن ڒعْجبْ ذ ثَامقّْرَانْثْ.
ثِيمڭَّا نّكْ ذ لْمُوعْجِيزَاثْ، ڒعْمَارْ إِنُو ثسّنْ ث مْلِيحْ قَاعْ.
15 إِخْسَانْ إِنُو ثُوغَا وَارْ خَافكْ نُّوفَّارنْ،
ؤُمِي تّْوَاڭّغْ ذِي ثْنُوفّْرَا،
تّْوَامُوذغْ أَمْ إِجّْ ن ؤُپُورْضَا ذِي ڒَادْجَاغْ ن ثمُّورْثْ. ▪
16 ثِيطَّاوِينْ نّكْ ژْرِينْثْ أَبدُّو إِنُو إِضفْصنْ.
ذڭْ وذْلِيسْ نّكْ إِتّْوَانّْضنْ أَقَا مَارَّا يُورَانْ،
أَقَا ؤُسَّانْ إِ ثُوغَا تّْوَارشْمنْ مڒْمِي ثُوغَا عَاذْ وَارْ إِدْجِي ؤُڒَا ذ إِجّنْ زَّايْسنْ.
17 مَامّشْ غَارِي تّْعِيزَّانْ إِخَارِّيصنْ نّكْ، أَ أَربِّي،
مَامّشْ إِمْغَارْ ؤُبَارُّو نْسنْ!
18 مَاڒَا خْسغْ أَذْ ثنْ حسْبغْ، أَقَا أَثنْ كْثَارْ أَطَّاسْ زڭْ يجْذِي،
ؤُ خْمِي فَاقغْ، أَقَا أَيِي عَاذْ أَكِيذكْ.
19 أَ أَربِّي، معْلِيكْ إِ غَا ثنْغذْ خنِّي أَعفَّانْ،
مَاعْلِيكْ إِ غَا ثجّذْ إِرْيَازنْ إِ إِسَّازَّاڒنْ إِذَامّنْ أَذْ خَافِي أَڭّْوجّنْ،
20 إِنِّي خَاكْ إِسَّاوَاڒنْ س ثْحْرَايْمشْثْ،
ڒْعذْيَانْ نّكْ إِنِّي إِنطّْقنْ إِسمْ نّكْ ذِي ڒْبَاطڒْ.
21 أَ سِيذِي، مَا وَارْ شَارّْهغْ إِنِّي شكْ إِشَارّْهنْ،
ؤُ مَا وَارْ تّْعِيفّغْ إِنِّي أَكِيذكْ إِتّمْعَاڒَانْ؟
22 نشّْ شَارّْهغْ ثنْ إِجّْ ن وشْرَاهْ إِكْمڒْ،
أَقَا نِيثْنِي ذوْڒنْ أَيِي ذ ڒْعذْيَانْ.
23 أَرْزُو خَافِي، أَ أَربِّي، سّنْ ؤُڒْ إِنُو،
قدْجبْ أَيِي ؤُ سّنْ إِخَارِّيصنْ إِنُو. ▪
24 خْزَارْ-د، مَا أَقَا أَيِي ذِي شَا ن وبْرِيذْ ن ڒقْجَاحثْ
ؤُ نْذهْ أَيِي غَارْ وبْرِيذْ ن ڒبْذَا.