140
1 إِ ؤُمقّْرَانْ ن إِمغْنَاجنْ. أَزهّذْ ن ذَاوُوذْ.2 فكّْ أَيِي زڭْ إِعفَّاننْ، أَ سِيذِي،
حْضَا أَيِي زڭْ إِرْيَازْأنْ ن لْعُونْفْ،
3 إِنِّي إِتّْخَارّْصنْ ذڭْ وُوڒْ نْسنْ ذِي ڒْغَارْ،
ؤُ سّكَّارنْ إِمنْغَانْ ذِي مَارَّا ؤُسَّانْ.
4 نِيثْنِي سّْقضْعنْ إِڒْسَاونْ نْسنْ أَمْ يِيجّْ ن ؤُفِيغَارْ،
سّمْ إِحْمَا أَقَا-ث سَاذُو إِينْشِيشنْ نْسنْ. سِيلَاهْ. ▪
5 حْضَا خَافِي، أَ سِيذِي، زڭْ إِفَاسّنْ ن إِعفَّاننْ،
سَّارْ أَيِي زڭْ إِرْيَازنْ ن لْعُونْفْ، إِنِّي يَارزُّونْ أَذْ أَيِي غضْڒنْ غَارْ ثمُّورْثْ. ▫
6 أَيْثْ ن بُو-نّْفَاخثْ سّْنُوفَّارنْ خَافِي إِجّْ ن ڒْفخْ،
تّْبزَّاعنْ ثِيسغْوِينْ أَمْ إِشْثْ ن ثْرَاشَّا غَارْ ؤُغزْذِيسْ ن وبْرِيذْ،
أَقَا تّڭّنْ أَيِي ثِيخفْشِينْ. سِيلَاهْ. ▪
7 نشّْ نِّيغْ إِ سِيذِي: ”شكْ ذ أَربِّي إِنُو!“
سڒْ، أَ سِيذِي، غَارْ ثْمِيجَّا ن ؤُزَاوڭْ إِنُو.
8 أَ سِيذِي، سِيذِي إِنُو، جّهْذْ ن ؤُسنْجمْ إِنُو،
ذڒْ أَزدْجِيفْ إِنُو ذڭْ وَاسّْ ن ڒْحسّْ ن ڒسْنَاحْ.
9 أَ سِيذِي، وَارْ تّجِّي أَعفَّانْ أَذْ يَارّْ مژْرِي.
وَارْ تّڭّْ تَّاسِيعْ إِ ونْوَايْ نّسْ إِعفّْننْ،
ؤُشَا أَذْ سّْعُودْجنْ إِخفْ نْسنْ. سِيلَاهْ.
10 خْ ؤُزدْجِيفْ ن مَارَّا إِنِّي ذ أَيِي د-إِنّْضنْ،
إِڒِي أَذْ ثنْ إِذڒْ ؤُشقّفْ ن إِينْشِيشنْ نْسنْ،
11 أجّْ أَذْ خَاسنْ كبّنْ ڒفْحمْ إِتّحْذُوذُوقنْ،
إِڒِي نتَّا أَذْ ثنْ إِغْضرْ ذِي ثْمسِّي، ذِي ڒْحمْڒَاثْ يُودْجْغنْ،
حِيمَا وَارْ تّكَّارنْ عَاذْ.
12 أجّْ أَرْيَازْ إِ إِشقّْفنْ س يِيڒسْ وَارْ إِتّْغِيمِي إِبدّْ خْ ثمُّورْثْ،
إِڒِي أَرْيَازْ بُو-ڒخْشُونثْ، أَقَا أَذْ إِتّْوَاعَارْنْ س ڒْغَارْ إِ إِڭَّا
أَڒْ إِ غَا إِوْضَا ذغْيَا ذِي ثخْشفْثْ.
13 نشّْ سّْنغْ، أَقَا سِيذِي أَذْ إِسّقْفڒْ دّعْوثْ ن ڒْمُوسَاكِينْ،
ڒْحقّْ ن إِمزْڒَاضْ.
14 س ثِيذتّْ، إِمْسڭَّاذنْ أَذْ قَاذَانْ إِسمْ نّكْ،
إِنِّي إِڭُّورنْ نِيشَانْ أَذْ زمَّارنْ أَذْ قِّيمنْ بدّنْ زَّاثْ إِ وُوذمْ نّكْ.