‏1 إِزْڒِي ن ؤُڭعّذْ.

“زِي ثمْژِي إِنُو حْصَارنْ أَيِي أَطَّاسْ ن ثْوَاڒَاوِينْ!“

إِنِي ث خنِّي أَمُّو، أَ إِسْرَائِيل،

‏2 زِي ثمْژِي إِنُو حْصَارنْ أَيِي أَطَّاسْ ن ثْوَاڒَاوِينْ،

مَاشَا وَارْ ذ أَيِي زمَّارنْ.

‏3 إِمْشَارّْزنْ شَارْزنْ خْ وعْرُورْ إِنُو،

ڭِّينْ ڒَاثَارَاثْ ن وشْرَازْ نْسنْ ذ إِزِيرَارنْ.

‏4 سِيذِي ذ أَمْسڭّذْ.

نتَّا إِقْضعْ إِسغْوَانْ ن إِعفَّاننْ.

‏5 أجّْ مَارَّا إِنِّي إِشَارّْهنْ صِيهْيُونْ،

أَذْ سّضْحَانْ ؤُ أَذْ تّْوَاعَارْننْ غَارْ ضفَّارْ.

‏6 إِڒِي أَذْ إِڒِينْ أَمْ أَرّْبِيعْ خْ ثْزغْوِينْ،

إِتِّيسْڒَاوْ قْبڒْ مَا أَذْ إِتّْوَاقْڒعْ، ^▪  

‏7 وَارْ زَّايسْ إِتّْعمَّارْ ؤُشوَّارْ أَفُوسْ نّسْ،

ؤُڒَا ذ ونِّي إِتّْشدَّانْ إِشوَّافنْ ن إِمنْذِي أَحْسِينْ نّسْ،

‏8 ؤُ إِمْسبْرِيذنْ وَارْ قَّارنْ:

”لْبَارَاكَا ن سِيذِي أَقَا-ت أَكِيذْومْ!

نشِّينْ نْبَاركْ كنِّيوْ س يِيسمْ ن سِيذِي.“