109
1 إِ ؤُمقّْرَانْ ن إِمغْنَاجنْ. أَزهّذْ ن ذَاوُوذْ. أَ أَربِّي ن ؤُصبّحْ إِنُو، وَارْ سْغِيذِي!
2 مَاغَارْ أَقمُّومْ ن إِجّْ ن ؤُعفَّانْ،
أَقَا أَقمُّومْ إِشُّورْ س إِخَارِّيقنْ إِنُّورْزمْ خَافِي.
نِيثْنِي سَّاوَاڒنْ أَكِيذِي س يِيجّْ ن يِيڒسْ إِسّْخَارِّيقنْ.
3 نّْضنْ أَيِي-د س وَاوَاڒنْ إِشُّورنْ س وشْرَاهْ،
تّْمنْغَانْ أَكِيذِي خْ وَالُو. ▪
4 إِ ثْوَارِّيثْ خْ ثْمخْسِيوْثْ إِنُو كَّارنْ نِيثْنِي ضِيدّْ إِنُو،
ؤُ نشّْ كسِّيغْ س ڒْمعْرُوفْ.
5 نِيثْنِي خدْجْصنْ أَيِي ڒْخَارْ س ڒْغَارْ،
ثَامخْسِيوْثْ إِنُو س وشْرَاهْ.
6 أڭّْ خَاسْ إِجّْ ن ؤُعفَّانْ،
أجّْ شِّيطَانْ أَذْ إِبدّْ غَارْ ؤُغزْذِيسْ نّسْ.
7 مَاڒَا خَاسْ شَارّْعنْ، أَذْ إِفّغْ أَمْ إِجّْ ن ؤُقْطَاطْعِي،
ؤُشَا ؤُڒَا ذ ثَاژَادْجِيثْ نّسْ أَذْ ثِيڒِي ذ دّنْبْ. ▪
8 أَذْ ذوْڒنْ ؤُسَّانْ نّسْ ؤُذْرُوسنْ وَاهَا،
أجّْ ونّغْنِي أَذْ إِطّفْ ڒْفُوسِينَا نّسْ.
9 أَذْ ذوْڒنْ إِحنْجِيرنْ نّسْ ذ إِيُوجِيڒنْ،
ثَامْغَارْثْ نّسْ ذ ثَاجَّاتْشْ.
10 أَذْ ثلّْعنْ إِحنْجِيرنْ نّسْ ذَا ذ ذِيهَا، أَذْ تَّارنْ،
أَذْ أَرْزُونْ خْ مَاشَّا جَارْ ڒْخِيرْبَاثْ نْسنْ.
11 أَذْ إِتَّارْ بُو-ؤُمَارْوَاسْ مَارَّا مِينْ غَارسْ،
أَذْ كشّْضنْ إِبَارَّانِييّنْ ڒْغِيدْجثْ ن وَارْبرْ نّسْ.
12 وَارْ غَارسْ إِتِّيڒِي ؤُڒَا ذ إِجّنْ ونِّي ذ أَسْ إِ غَا إِڭِّينْ س ثْمخْسِيوْثْ إِشوَّارنْ،
أجّْ ؤُڒَا ذ إِجّْ أَذْ إِحِينّْ خْ إِيُوجِيڒنْ نّسْ.
13 أَذْ تّْوَاثحَّانْ ثَارْوَا نّسْ أَوَارْنِي أَسْ،
أَذْ إِتّْوَامْحَا إِسمْ نْسنْ ذِي جِّيڒْ إِ د غَا يَاسنْ.
14 أَذْ يِيذَارْ سِيذِي ڒْمُوعْصِييّثْ ن إِبَابَاثنْ نّسْ،
عمَّارْصْ وَارْ إِمحِّي دّنْبْ ن يمَّاسْ.
15 إِڒِي أَذْ بدّنْ ڒبْذَا قِيبَاتْشْ إِ سِيذِي،
أجّْ إِ-ث أَذْ إِكّسْ ڒِيذَارثْ نْسنْ خْ ثمُّورْثْ. ▪
16 مَاغَارْ نتَّا وَارْ إِعْقِيڒْ حِيمَا أَذْ يڭّْ س ثْمخْسِيوْثْ إِشوَّارنْ،
مَاشَا إِمَارّثْ ڒْمسْكِينْ ذ ؤُمزْڒُوضْ،
ؤُڒَا ذ ونِّي ؤُمِي إِتّْوَارْژْ وُوڒْ، حِيمَا أَذْ ث إِنغْ.
17 نتَّا ثُوغَا إِتّخْسْ نّعْڒثْ،
خنِّي أجّْ إِ-ت أَذْ خَاسْ ثوْضَا،
ؤُ ؤُمِي وَارْ إِفَارْحْ س لْبَارَاكَا،
أجّْ إِ-ت أَذْ خَاسْ ثِيڭّْوجْ.
18 ؤُمِي يَارْضْ نّعْڒثْ أَمْ وَارُّوضْ نّسْ،
أجّْ إِ-ت أَذْ ثَاذفْ خنِّي أَمْ وَامَانْ غَارْ ذَاخڒْ نّسْ،
أَمْ زّشْثْ ذڭْ إِخْسَانْ نّسْ.
19 أجّْ أَذْ ثِيڒِي نّعْڒثْ نِّي أَمْ وَارُّوضْ إِ ذِي إِتّْڒحّفْ،
أَمْ وبْيَاسْ إِ إِبكّسْ ڒبْذَا.
20 ثَا ذ ڒْمُونثْ ن سِيذِي إِ إِغْرِيمنْ إِنُو،
إِ ينِّي إِسَّاوَاڒنْ ڒْغَارْ خْ ڒعْمَارْ إِنُو.
21 مَاشَا شكْ، أَ سِيذِي، سِيذِي إِنُو،
أڭّْ ذَايِي أَمْ مَامّشْ ثخْسذْ ذِي طّْوعْ ن يِيسمْ نّكْ،
مَاغَارْ ثَامخْسِيوْثْ نّكْ إِشوَّارنْ ذ ثَاصبْحَانْثْ،
سنْجمْ أَيِي.
22 مَاغَارْ نشّْ ذِي ڒغْبنْ ؤُ زڒْضغْ،
ؤُڒْ إِنُو إِتّْوَاسْنُوقّبْ غَارْ ذَاخڒْ ذڭْ إِذْمَارنْ إِنُو.
23 أَمشْنَاوْ إِشْثْ ن ثِيڒِي إِزُّوڭَّارْثنْ قطِّيغْ،
زْڒُوزَانْ أَيِي أَمْ يِيشْثْ ن ثْمُورْغِي.
24 إِفَادّنْ إِنُو تَّارْجِيجِينْ س ؤُژُومِّي،
أَرِّيمثْ إِنُو إِتّْخصَّا إِ-ث ثَاذُونْثْ.
25 نشّْ ذوْڒغْ أَسنْ ذ إِشْثْ ن ڒْقشْعثْ ن ؤُسحْقَارْ.
مَاڒَا ژْرِينْ أَيِي، سّنْهزَّانْ أَزدْجِيفْ نْسنْ.
26 أوْشْ أَيِي أَفُوسْ، أَ سِيذِي، أَربِّي إِنُو،
سنْجمْ أَيِي عْلَاحْصَابْ ثَامخْسِيوْثْ نّكْ إِشوَّارنْ،
27 حِيمَا أَذْ سّْننْ أَقَا ذ مَانْ أَيَا ذ أَفُوسْ نّكْ،
أَقَا شكْ إِ إِڭِّينْ مَانْ أَيَا، أَ سِيذِي.
28 نِيثْنِي ذ ينِّي إِنعّْڒنْ، مَاشَا شكْ أَذْ ثْبَارْكذْ،
نِيثْنِي تّْغوّْغنْ، أَذْ ذوْڒنْ تّْسضْحَانْ
مَاشَا أَمْسخَّارْ نّكْ أَذْ إِفَارْحْ.
29 أجّْ إِغْرِيمنْ إِنُو أَذْ يَارْضنْ س ڒفْضِيحثْ،
أَذْ ڒحّْفنْ ذڭْ ؤُسضْحِي أَمْ ذڭْ إِجّْ ن ؤُسڒْهَامْ.
30 زڭْ وُوڒْ إِنُو أَذْ قَاذِيغْ سِيذِي س ؤُقمُّومْ إِنُو،
أَذْ ث سّمْغَارغْ جَارْ وَاطَّاسْ.
31 مَاغَارْ نتَّا أَذْ إِبدّْ أَكْ-ذ ؤُمزْڒُوضْ غَارْ ؤُفُوسْ نّسْ أَفُوسِي،
حِيمَا أَذْ ث إِسّنْجمْ زڭْ إِنِّي إِحكّْمنْ خْ ڒعْمَارْ نّسْ.