108
1 إِزْڒِي. أَزهّذْ ن ذَاوُوذْ. 2 أَ أَربِّي، ؤُڒْ إِنُو إِعوّڒْ،
أَذْ غنّْجغْ أَذْ زهّْذغْ، وَاهْ ؤُڒَا ذ أَعُودْجِي إِنُو.
3 فَاقْ، لْهَارْبَا ذ ڒْڭَامْبْرِي!
نشّْ خْسغْ أَذْ سّْفَاقغْ ثَافَاوْثْ ن ڒفْجَارْ.
4 نشّْ أَذْ شكْ قَاذِيغْ جَارْ ڒڭْنُوسْ، أَ سِيذِي،
أَذْ أَكْ زهّْذغْ جَارْ شُّوعُوبْ.
5 مَاغَارْ ثَامخْسِيوْثْ نّكْ إِشوَّارنْ ثتَّاكّْوَاضْ ثِيوَا إِ إِجنْوَانْ،
ڒَامَانْ نّكْ غَارسْ أَڒْ إِسيْنُوثنْ. ▪
6 أَ أَربِّي، سْڭعّذْ إِخفْ نّكْ ثِيوَا إِ إِجنْوَانْ،
أَرّْ أَعُودْجِي نّكْ خْ مَارَّا ثَامُّورْثْ،
7 حِيمَا إِمْعِيزّنْ نّكْ أَذْ تّْوَانجْمنْ،
أَوِي أَسنْجمْ س ؤُفُوسْ أَفُوسِي نّكْ ؤُ أَرّْ-د خَانغْ أَوَاڒْ.
8 أَربِّي ثُوغَا إِسَّاوَاڒْ ذِي زَّاوشْثْ نّسْ إِقدّْسنْ،
س ؤُينِّي إِ غَا نڭْزغْ س ڒفْرَاحثْ.
نشّْ أَذْ بْضِيغْ شَاكِيمْ،
أَذْ عبَّارغْ ثَايْسَارْثْ ن سُوكُّوثْ.
9 جِيلْعَاذْ إِنُو، مَانَاسَّا إِنُو،
إِفْرَايِيمْ ذ أَسڒْقِي إِجهْذنْ ن ؤُزدْجِيفْ إِنُو،
يَاهُوذَا ذ أَمْڭوّذْ إِنُو.
10 مَاشَا مُوآبَ ذ سَّارِيجْ إِنُو ن ؤُسِيرْذْ،
خْ إِذُومْ أَذْ نْضَارغْ ثِيسِيڒَا إِنُو،
خْ ثمُّورْثْ ن فِيلِيشِيثْ أَذْ دُّوقّْزغْ س ؤُسْڒِيوْڒوْ.
11 وِي ذ أَيِي غَا إِنذْهنْ ذِي ثنْذِينْثْ إِفَارْينْ س إِغبْرَاونْ؟
وِي ذ أَيِي غَا إِڭوّْذنْ غَارْ إِذُومْ؟
12 مَا وَارْ ذ أَنغْ ثنْضَارذْ، أَ أَربِّي،
ؤُ أَكْ-ذ ڒْعسْكَارَاثْ نّغْ مَا زعْمَا وَارْ د-ثفِّيغذْ عَاذْ أَكِيذْسنْ، أَ أَربِّي؟ ▪
13 أوْشْ أَنغْ أَفُوسْ حِيمَا أَذْ أَنغْ ثسّْنجْمذْ زِي ڒحْصَارثْ،
مَاغَارْ أَسنْجمْ س ؤُفُوسْ ن يِيجّْ ن بْنَاذمْ أَقَا إِبْضڒْ.
14 أَكْ-ذ أَربِّي أَذْ نڭّْ س ومْحَاضْ،
ؤُ نتَّا أَذْ إِعْفسْ خْ ينِّي ذ أَنغْ إِحصَّارنْ.