أَذْلِيسْ وِيسّْ خمْسَا: إِزهِّيذنْ 107-150
107
1 قَاذَامْ سِيذِي، مَاغَارْ نتَّا ذ أَصبْحَانْ، مَاغَارْ ثَامخْسِيوْثْ نّسْ إِشوَّارنْ ثتّْغِيمَا إِ ڒبْذَا.
2 أجّْ إِنِّي إِتّْوَافْذِينْ زِي سِيذِي أَذْ سِّيوْڒنْ أَمُّو،
إِنِّي إِفْذِي زڭْ ؤُفُوسْ ن يِينِّي ثنْ إِحصَّارنْ، ▫
3 إِنِّي إِسّْمُونْ زِي ثمُّورَا،
زِي شَّارْقْ، زِي ڒْغَارْبْ، زِي شَّامَالْ ؤُ زِي ڒبْحَارْ.
4 ثُوغَا ذِينْ إِنِّي إِودَّارنْ ذِي ڒخْڒَا،
أَبْرِيذْ نْسنْ إِكَّا خْ ثْنزْرُوفْثْ،
وَارْ ؤُفِينْ ثَانْذِينْثْ مَاحنْذْ أَذْ ذَايسْ زذْغنْ.
5 ذَايْسنْ ڒَاژْ ذ ؤُفَاذِي،
ڒعْمَارْ نْسنْ إِفْشڒْ ذَايْسنْ.
6 خنِّي سْغُويّنْ غَارْ سِيذِي ذِي ڒحْصَارثْ نْسنْ،
ؤُ نتَّا إِسّنْجمْ إِ-ثنْ زِي ثِيڭّْوُوذِي نْسنْ.
7 نتَّا إِنْذهْ إِ-ثنْ ذڭْ إِجّْ ن وبْرِيذْ إِسڭّذْ،
مَاحنْذْ أَذْ ؤُيُورنْ غَارْ إِشْثْ ن ثنْذِينْثْ حِيمَا أَذْ ذَايسْ زذْغنْ.
8 أجّْ إِ-ثنْ أَذْ قَاذَانْ سِيذِي خْ ثْمخْسِيوْثْ نّسْ إِشوَّارنْ،
خْ لْمُوعْجِيزَاثْ نّسْ إِ ثَارْوَا ن بْنَاذمْ.
9 مَاغَارْ نتَّا إِسّْجِّيونْ ڒعْمَارْ إِفُّوذنْ،
ڒعْمَارْ إِدْجُوژنْ إِشُّورْ إِ-ث س ڒْخَارْ.
10 ثُوغَا ذِينْ إِنِّي إِقِّيمنْ ذِي ثَادْجسْثْ ذ ثِيڒِي ن ڒْموْثْ،
س إِشذِّيينْ ن دّدْجْ ذ وُوزَّاڒْ،
11 مَاغَارْ غوّْغنْ أَكْ-ذ وَاوَاڒنْ ن أَربِّي،
وَارْ سْڒِينْ غَارْ شّْوَارْ ن ؤُمْعُودْجِي خْ كُوڒْشِي.
12 نتَّا إِسّقْنعْ ؤُڒْ نْسنْ س ثَامَارَا،
نّْذرْفنْ وَارْ ؤُفِينْ وِي غَا إِوْشنْ أَفُوسْ.
13 خنِّي ڒَاغَانْ إِ سِيذِي ذِي ڒحْصَارثْ نْسنْ،
ؤُ نتَّا إِسّنْجمْ إِ-ثنْ زِي ثِيڭّْوُوذِي نْسنْ.
14 نتَّا إِسُّوفّغْ إِ-ثنْ زِي ثَادْجسْثْ ؤُ زِي ثِيڒِي ن ڒْموْثْ،
ؤُ يَارْژَا إِشذِّيينْ نْسنْ.
15 أجّْ إِ-ثنْ أَذْ قَاذَانْ سِيذِي خْ ثْمخْسِيوْثْ نّسْ إِشوَّارنْ،
خْ لْمُوعْجِيزَاثْ نّسْ إِ ثَارْوَا ن بْنَاذمْ.
16 مَاغَارْ نتَّا يَارْژَا ثِيوُّورَا ن نّْحَاسْ،
إِشَارّڭْ زّكْرُونَاثْ ن وُوزَّاڒْ.
17 ثُوغَا ذِينْ إِپُوهَاڒِييّنْ إِنِّي إِتّْوَاغزَّانْ،
زِي سِّيبّثْ ن ؤُخطُّو نْسنْ ذ ن ڒْمُوعْصِييّثْ نْسنْ.
18 إِعِيفّْ ڒعْمَارْ نْسنْ زِي مَارَّا مَاشَّا،
إِوْضنْ أَڒْ ثوُّورَا ن ڒْموْثْ.
19 خنِّي ڒَاغَانْ إِ سِيذِي ذِي ڒحْصَارثْ نْسنْ،
ؤُ نتَّا إِسّنْجمْ إِ-ثنْ زِي ثِيڭّْوُوذِي نْسنْ.
20 نتَّا إِسّكّْ أَوَاڒْ نّسْ،
ؤُ إِسّْڭنْفَا إِ-ثنْ ؤُ إِسّنْجمْ إِ-ثنْ زڭْ إِمضْڒَانْ.
21 أجّْ إِ-ثنْ أَذْ قَاذَانْ سِيذِي خْ ثْمخْسِيوْثْ نّسْ إِشوَّارنْ،
خْ لْمُوعْجِيزَاثْ نّسْ إِ ثَارْوَا ن بْنَاذمْ.
22 أجّْ إِ-ثنْ أَذْ أَوْينْ ثِيوْهِيبِينْ ن ؤُقَاذِي،
أَذْ بَارّْحنْ ثِيمڭَّا نّسْ س ؤُسْڒِيوْڒوْ. ▪
23 ثُوغَا ذِينْ إِنِّي إِهكّْوَانْ غَارْ ڒبْحَارْ س إِغَارُّوبَا،
إِنِّي إِخدّْمنْ خْ وَامَانْ إِوسْعنْ. ▪
24 ژْرِينْ مِينْ إِڭَّا سِيذِي،
ؤُڒَا ذ لْمُوعْجِيزَاثْ نّسْ ذِي ڒَادْجَاغْ ن ڒبْحَارْ.
25 مَاڒَا نتَّا إِسِّيوڒْ،
إِكَّارْ-د إِجّْ ن ؤُسمِّيضْ،
نِّي إِسّْڭعّْذنْ ڒمْوَاجْ نّسْ.
26 ڭَاعّْذنْ غَارْ ؤُجنَّا،
ؤُشَا هْوَانْ غَارْ ثِيسِي ن وَامَانْ ن ڒَادْجَاغْ.
إِفْسِي ڒعْمَارْ نْسنْ زِي ثِيڭّْوُوذِي.
27 ميّْڒنْ، ميّْڒمْ زِي سَّا غَارْ ذَا أَمْ ؤُمسْشَارْ،
إِودَّارْ أَسنْ مَارَّا ڒعْقڒْ نْسنْ خْ مِينْ غَا ڭّنْ.
28 خنِّي ڒَاغَانْ إِ سِيذِي ذِي ڒحْصَارثْ نْسنْ،
ؤُ نتَّا إِسُّوفّغْ إِ-ثنْ-د زِي ثِيڭّْوُوذِي نْسنْ.
29 نتَّا يَارَّا أَسمِّيضْ أَذْ يَارْسْ،
أَڒَامِي ذوْڒنْ ڒمْوَاجْ سّغْضنْ.
30 نِيثْنِي فَارْحنْ ؤُمِي أَرْسِينْ ڒمْوَاجْ،
ؤُ ؤُمِي نتَّا إِنْذهْ إِ-ثنْ غَارْ ڒْمُويِّي إِ غَارسْ ثُوغَا مژْرنْ.
31 أجّْ إِ-ثنْ أَذْ قَاذَانْ سِيذِي خْ ثْمخْسِيوْثْ نّسْ إِشوَّارنْ،
خْ لْمُوعْجِيزَاثْ نّسْ إِ ثَارْوَا ن بْنَاذمْ،
32 أجّْ إِ-ثنْ أَذْ ث سّْعُودْجنْ ذڭْ وڭْرَاوْ ن ڒْڭنْسْ،
أَذْ ث شنّْعنْ ذِي ڒْحڒْقثْ ن إِمْغَارنْ.
33 نتَّا يَارَّا إِغزْرَانْ ذ ڒخْڒَا،
ڒْعُونْصَارَاثْ يَارَّا إِ-ثنْثْ ذ ثَامُّورْثْ إِفُّوذنْ،
34 ثَامُّورْثْ إِ إِتِّيشنْ ڒْغِيدْجثْ يَارَّا إِ-ت ذ ثَامدْجَاحْثْ،
زِي سِّيبّثْ ن ثُوعفّْنَا ن يِينِّي ذَايسْ إِزدّْغنْ.
35 نتَّا يَارَّا ڒخْڒَا ذ أَيڒْمَامْ ن وَامَانْ،
ثَامُّورْثْ يُوژْغنْ ذ ڒْعُونْصَارَاثْ.▪
36 ذِينِّي إِ إِسّزْذغْ إِنِّي إِدْجُوژنْ،
ؤُشَا ذِينْ سّْبدّنْ نِيثْنِي إِشْثْ ن ثنْذِينْثْ مَاحنْذْ أَذْ ذَايسْ زذْغنْ.
37 نِيثْنِي زَارّْعنْ ذڭْ إِيَّارنْ ؤُ تّژُّونْ ثِيزَايَارِينْ ذڭْ إِمَارْجَاعنْ،
ثِينِّي د-إِتَّاوْينْ إِڭُومَّا ذ ڒْغِيدْجثْ نْسنْ.
38 نتَّا إِبَاركْ إِ-ثنْ، أَڒَامِي ذوْڒنْ ذڭْ وَاطَّاسْ،
أَڭْڒَا ن ڒْمَاڒْ نْسنْ وَارْ إِتّْوَاسمْژِي.
39 خنِّي مَاشَا ذَاكّْوَاڒنْ نِيثْنِي ذِي ذْرُوسْ عَاوذْ،
هكّْوَانْ غَارْ ڒَادْجَاغْ زِي سِّيبّثْ ن ڒحْصَارثْ ذ ڒْغَارْ ذ وشْضَانْ.
40 نتَّا إِتّْكبَّا أَسحْقَارْ خْ ثَارْوَا ن ثَاصِيڒثْ نْسنْ،
إِجَّا إِ-ثنْ تّثْلِيعنْ ذِي ڒخْڒَا مَانِي وَارْ دْجِينْ إِبْرِيذنْ.
41 إِسّْڭعّذْ-د أَمزْڒُوضْ زِي ڒغْبنْ،
ؤُشَا يَارَّا ڒَادْجَاثْ أَمْ ثْحِيمَارِينْ ن وُودْجِي. ▪
42 إِنِّي إِڭُّورنْ نِيشَانْ تّْوَاڒَانْ ؤُشَا فَارّْحنْ،
مَاشَا مَارَّا أَيْثْ ن ڒْمُوعْصِييّثْ تّقّْننْ أَقمُّومْ نْسنْ. ▪
43 ونِّي ذ أَمِيغِيسْ، أجّْ إِ-ث أَذْ إِحْضَا،
أجّْ إِ-ثنْ أَذْ سّْننْ نِيشَانْ مِينْ إِخْسْ أَذْ ثِينِي ثْمخْسِيوْثْ إِشوَّارنْ ن سِيذِي.