106
1 هَالِّيلُو-يَاهْ، قَاذَامْ سِيذِي، مَاغَارْ نتَّا إِصْبحْ، مَاغَارْ ثَامخْسِيوْثْ نّسْ إِشوَّارنْ ثتّْغِيمَا إِ ڒبْذَا. ▪
2 وِي إِزمَّارنْ أَذْ إِحَاجَا ثِيمڭَّا ثِيمقّْرَانِينْ ن سِيذِي،
أَذْ إِبَارّحْ مَارَّا شَّانْ نّسْ؟
3 سّعْذْ نْسنْ إِ يِينِّي إِحْضَانْ ڒْحقّْ،
سّعْذْ نّسْ إِ ونِّي إِتّڭّنْ ڒبْذَا ثَاسڭْذَا.
4 عْقڒْ خَافِي، أَ سِيذِي، س أَرْضَا غَارْ ڒْڭنْسْ نّكْ،
عَاهذْ أَيِي س ؤُسنْجمْ نّكْ،
5 مَاحنْذْ أَذْ ژَترغْ ڒْخَارْ إِ ينِّي زَّايكْ إِتّْوَافَارْزنْ،
مَاحنْذْ أَذْ فَارْحغْ س ڒفْرَاحثْ ن ڒْڭنْسْ نّكْ،
مَاحنْذْ أَذْ فَارْحغْ س يِيخفْ إِنُو جْمِيعْ أَكْ-ذ ثسْغَارْثْ نّكْ.
6 نشِّينْ نخْضَا، جْمِيعْ أَكْ-ذ إِبَابَاثنْ نّغْ،
نڭَّا ڒْغشّْ،
نڭَّا ثُوعفّْنَا. ▪
7 إِبَابَاثنْ نّغْ ذِي مِيصْرَا وَارْ فْهِيمنْ إِ لْمُوعْجِيزَاثْ نّكْ،
وَارْ خَارّْصنْ ذڭْ ؤُفيّضْ ن ثْمخْسِيوْثْ نّكْ إِشوَّارنْ،
مَاشَا غوّْغنْ غَارْ ڒبْحَارْ، غَارْ ڒبْحَارْ ن ثلْڭَا. ▪
8 مَاشَا نتَّا إِسّنْجمْ إِ-ثنْ ذِي طّْوعْ ن يِيسمْ نّسْ،
حِيمَا أَذْ ثتّْوَاسّنْ ڒمْغَارثْ نّسْ. ▪
9 نتَّا إِوبّخْ ڒبْحَارْ ن ثلْڭَا أَڒَامِي إِذْوڒْ يُوژغْ،
ؤُشَا إِجَّا إِ-ثنْ أَذْ كّنْ خْ وُوذمْ ن ثمُّورْثْ ن وَامَانْ يُودْجْغنْ أَمشْنَاوْ ذِي ڒخْڒَا. ▪
10 نتَّا إِفكّْ إِ-ثنْ زڭْ ؤُفُوسْ ن يِينِّي إِ-ثنْ إِشَارّْهنْ،
إِسّنْجمْ إِ-ثنْ زڭْ ؤُفُوسْ ن ڒعْذُو.
11 أَمَانْ ذْڒِينْ إِنِّي ثنْ إِحصَّارنْ،
وَارْ إِقِّيمْ ؤُڒَا ذ إِجّنْ زَّايْسنْ. ▪
12 نِيثْنِي تّشْڒنْ خْ وَاوَاڒنْ نّسْ،
صبّْحنْ أَسْ س يِيجّْ ن يزْڒِي ن ؤُصبّحْ. ▪
13 مَاشَا تُّونْ ذغْيَا ثِيمڭَّا نّسْ،
وَارْ خْسنْ أَذْ رَاجَانْ عَاذْ شّْوَارْ نّسْ.
14 نِيثْنِي ذوْڒنْ تّْمغّْڒنْ أَطَّاسْ ذِي ڒخْڒَا،
قدْجْبنْ أَربِّي ذِي ثْنزْرُوفْثْ. ▪
15 خنِّي إِوْشَا أَسنْ مِينْ تَّارنْ،
مَاشَا إِسّمْژِي ڒْقدّْ ن ڒعْمُورْ نْسنْ. ▪
16 نِيثْنِي ذوْڒنْ ؤُسْمنْ زِي مُوسَا ذِي ڒْمَارْڭحْ ن ڒْعسْكَارْ،
ؤُڒَا زِي هَارُونْ، أَمْقدّسْ ن سِيذِي. ▪
17 ثَامُّورْثْ ثنُّورْزمْ، ثْصَارْضْ ذَاثَانْ،
ؤُشَا ثنْثِي أَبَارُّو ن أَبِيرَامْ. ▪
18 ثِيمسِّي ثبْذَا ثشْمضْ جَارْ ؤُبَارُّو نْسنْ،
إِجّْ ن ؤُشعَّاڒْ ن ثْمسِّي إِقّذْ إِعفَّاننْ نِّي. ▪
19 نِيثْنِي ڭِّينْ إِجّْ ن ؤُينْذُوزْ غَارْ حُورِيبْ،
ؤُشَا ؤُضَارنْ زَّاثْ إِ يِيجّْ ن ڒخْيَاڒْ إِفسْينْ. ▪
20 نِيثْنِي بدّْڒنْ أَعُودْجِي ن سِيذِي
أَكْ-ذ ڒخْيَاڒْ ن إِجّْ ن ؤُفُونَاسْ إِ إِتّتّنْ أَرّْبِيعْ.
21 تُّونْ أَربِّي، أَمْسنْجمْ نْسنْ،
ونِّي ثُوغَا إِڭِّينْ ثِيمڭَّا ثِيمقّْرَانِينْ ذِي مِيصْرَا،
22 لْمُوعْجِيزَاثْ ذِي ثمُّورْثْ ن حَامْ،
ثِيمڭَّا سَّاڭّْوَاذنْثْ غَارْ ڒبْحَارْ ن ثلْڭَا.
23 إِنَّا أَقَا أَذْ ثنْ إِكحّضْ،
مْڒِي وَارْ إِدْجِي ذ مُوسَا، ونِّي زَّايسْ إِتّْوَافَارْزنْ،
إِكَّارْ-د ذِي ثْخنْذُوقْثْ زَّاثْ إِ وُوذمْ نّسْ ذِي طّْوعْ نْسنْ،
مَاحنْذْ أَذْ إِسّْبعّذْ أَسْعَارْ نّسْ إِ زِي إِخْسْ أَذْ ثنْ إِهلّكْ. ▪
24 نِيثْنِي كّْسنْ ثَاقْشُورْثْ خْ ثمُّورْثْ إِعِيزّنْ،
وَارْ تّشْڒنْ شَا خْ وَاوَاڒْ نّسْ. ▪
25 نِيثْنِي نْذقْمنْ ذڭْ إِقِيضَانْ نْسنْ،
وَارْ سْڒِينْ غَارْ ثْمِيجَّا ن سِيذِي.
26 نتَّا إِسّْڭعّذْ أَفُوسْ نّسْ خَاسنْ،
إِجِّيدْجْ أَذْ ثنْ إِسّغْضڒْ ذِي ڒخْڒَا، ▪
27 مَاحنْذْ أَذْ إِسّغْضڒْ ثَارْوَا نْسنْ جَارْ ڒڭْنُوسْ،
مَاحنْذْ أَذْ ثنْ إِزدْجعْ ذِي ثمُّورَا. ▪
28 نِيثْنِي سّْڒحْمنْ إِخفْ نْسنْ غَارْ بَاعَالْ-فَاغُورْ،
شِّينْ ثِيغَارْصَا إِ إِمتَّانْ. ▪
29 سْعَارنْ ث س ثْمڭَّا نْسنْ،
غَارسْ أَڒَامِي د خَاسنْ ثوْضَا جّْرِيحشْثْ.
30 خنِّي إِكَّارْ-د فِينَاحَاسْ، يُوسَا-د جَارْ أَسنْ،
ؤُ أَمُّو إِ ثتّْوَاسْبدّْ جّْرِيحشْثْ.
31 أَيَا إِتّْوَاحْسبْ أَسْ-د ذ ثَاسڭْذَا،
زِي جِّيڒْ أَڒْ جِّيڒْ إِ ڒبْذَا.
32 نِيثْنِي سْعَارنْ أَفُوڭمْ نّسْ غَارْ وَامَانْ ن مَارِيبَا،
أَڒَامِي إِڭَّا مُوسَا ڒْغَارْ ذِي سِّيبّثْ نْسنْ، ▪
33 مَاغَارْ سَّارزْڭنْ ڒعْمَارْ نّسْ،
غَارسْ أَڒَامِي إِفّغْ وَاوَاڒْ وَارْ إِضْبِيعنْ زڭْ إِينْشِيشنْ نّسْ.
34 نِيثْنِي وَارْ ثحَّانْ ڒڭْنُوسْ
إِ خفْ إِ ذ أَسنْ إِنَّا سِيذِي إِتّْخصَّا أَذْ ثنْ ثحَّانْ.
35 مَاشَا صُّورنْ إِخفْ نْسنْ أَكْ-ذ ڒڭْنُوسْ
ڒمْذنْ أَذْ ڭّنْ مِينْ ڭِّينْ نِيثْنِي. ▪
36 نِيثْنِي ثُوغَا تّْسخَّارنْ إِ ڒخْيَاڒَاثْ ن صَّانَامْ نْسنْ،
إِنِّي ذ أَسنْ إِذوْڒنْ ذ ثَاخْشفْثْ.
37 نِيثْنِي إِوْينْ إِحنْجِيرنْ نْسنْ ذ ثْحنْجِيرِينْ نْسنْ ذ ثَاغَارْصْثْ إِ شّْوَاطنْ. ▪
38 نِيثْنِي سِّيزّْڒنْ إِذَامّنْ إِمزْذَاڭنْ،
إِذَامّنْ ن إِحنْجِيرنْ نْسنْ ذ ثْحنْجِيرِينْ نْسنْ،
نِّي إِوْينْ ذ ثَاغَارْصْثْ إِ ڒخْيَاڒَاثْ ن صَّانَامْ ن كنْعَانْ،
أَڒَامِي ثذْوڒْ ثمُّورْثْ ثفْسذْ س إِذَامّنْ. ▪
39 نِيثْنِي ذوْڒنْ خمْجنْ زِي ثْمڭَّا نْسنْ،
سّْفسْذنْ إِخفْ نْسنْ س ڒخْذَايمْ نْسنْ.
40 يَارْغَا وغْضَابْ ن سِيذِي خْ ڒْڭنْسْ نّسْ،
ؤُ نتَّا إِعِيفّْ ثَاسْغَارْثْ نّسْ.
41 نتَّا إِسلّمْ إِ-ثنْ غَارْ إِفَاسّنْ ن ڒڭْنُوسْ،
ؤُ إِنِّي ثنْ إِشَارّْهنْ ذوْڒنْ تّْسدْجَاضنْ خَاسنْ.
42 حْصَارنْ ثنْ ڒْعذْيَانْ نْسنْ،
نِيثْنِي تّْوَاسْوَاضْعنْ سَاذُو أَفُوسْ نْسنْ.
43 أَطَّاسْ ن ثْوَاڒَاوِينْ ثُوغَا إِسّنْجَامْ إِ-ثنْ،
مَاشَا نِيثْنِي سَّارزْڭنْ خَاسْ س ثْغنَّانْثْ نْسنْ،
تّْوَاسْمژْينْ س ڒْمُوعْصِييّثْ نْسنْ.
44 وَاخَّا أَمنِّي نتَّا إِخْزَارْ-د عَاذْ غَارْسنْ ؤُمِي ثنْ ثُوغَا ذِي ڒحْصَارثْ،
ؤُمِي إِسْڒَا ثْغُويِّيثْ نْسنْ.
45 يِيذَارْ ڒْعَاهْذْ نّسْ ذِي طّْوعْ نْسنْ،
ؤُ إِنْذمْ زِي سِّيبّثْ ن ثْمخْسِيوْثْ نّسْ إِشوَّارنْ.
46 إِسّْشنْ أَسنْ أَرّحْمثْ نّسْ،
زَّاثْ إِ وُوذمْ ن مَارَّا إِنِّي ثنْ إِحبّْسنْ.
47 سنْجمْ أَنغْ، أَ سِيذِي، أَربِّي،
نْذهْ أَنغْ نْمُونْ زِي ڒڭْنُوسْ،
حِيمَا أَذْ نْقَاذَا إِسمْ أَمْقدَّاسْ نّكْ،
أَذْ شكْ نْصبّحْ س يزْڒَانْ ن ؤُسمْغَارْ. ▪
48 أَذْ إِتّْوَابَاركْ سِيذِي، أَربِّي ن إِسْرَائِيل،
زِي ڒبْذَا أَڒْ ڒبْذَا!“
أجّْ مَارَّا ڒْڭنْسْ أَذْ يِينِي: ’أَمِينْ! هَالِّيلُو-يَاهْ!‘ ▪