‏1 أَزهّذْ ن ذَاوُوذْ.

نشّْ أَذْ غنّْجغْ خْ ثْمخْسِيوْثْ إِشوَّارنْ ذ ڒْحقّْ،

أَذْ زهّْذغْ إِ شكْ، أَ سِيذِي!

‏2 نشّْ أَذْ ڭّغْ س ڒعْقڒْ عْلَاحْسَابْ إِجّْ ن وبْرِيذْ إِكمّْڒنْ.

مڒْمِي غَارِي إِ د غَا ثَاسذْ؟

نشّْ أَذْ ؤُيُورغْ ذِي ڒْوسْثْ ن ثَادَّارْثْ إِنُو س وُوڒْ نِيشَانْ،

‏3 نشّْ وَارْ نطَّارغْ ثِيطَّاوِينْ إِنُو ذِي مِينْ إِفضْحنْ.

نشّْ شَارّْهغْ مِينْ تّڭّنْ إِنِّي خَاكْ إِحيّْذنْ

مَانْ أَيَا وَارْ ذ أَيِي إِڒصّقْ.

‏4 ؤُڒْ إِتّفْرِيغنْ إِتّْخصَّا أَذْ خَافِي يَاڭّْوجْ،

وَارْ خْسغْ أَذْ سّْنغْ مِينْ وَارْ إِحْڒِينْ.

‏5 ونِّي إِشقّْفنْ ذڭْ ؤُمْقَارّبْ نّسْ س ثْنُوفّْرَا، أَذْ ث ثحِّيغْ.

ونِّي إِتّْكبَّارنْ س ثِيطَّاوِينْ نّسْ ذ ونِّي إِتّْعفَّارنْ س وُوڒْ نّسْ،

وَارْ ث كسِّيغْ.

‏6 ثِيطَّاوِينْ إِنُو أَرزُّونْثْ خْ إِمْثِيقَّانْ ذِي ثمُّورْثْ، حِيمَا نِيثْنِي أَذْ غَارِي قِّيمنْ.

ونِّي إِڭُّورنْ ذڭْ إِجّْ ن وبْرِيذْ إِكمّْڒنْ، أَذْ أَيِي إِسخَّارْ.

‏7 ونِّي إِتّڭّنْ ڒْغشّْ، وَارْ إِتّْغِيمِي ذِي ثَادَّارْثْ إِنُو،

ؤُڒَا ذ بُو-إِخَارِّيقنْ وَارْ إِتّْوَاضْمنْ زَّاثْ إِ ثِيطَّاوِينْ إِنُو.

‏8 كُوڒْ ضّْبحْ أَذْ ثحِّيغْ مَارَّا إِعفَّاننْ زِي ثمُّورْثْ،

حِيمَا أَمُّو إِ غَا مْحِيغْ مَارَّا إِنِّي إِتّڭّنْ ڒْمُوعْصِييّثْ زِي ثنْذِينْثْ ن سِيذِي.