102
1 ثَاژَادْجِيثْ ن ونِّي إِحصَّارنْ مَاڒَا مَانَاينِّي ذ أَطَّاسْ خَاسْ، ؤُشَا خنِّي إِتّْفَارّغْ إِمُونَاسْ نّسْ زَّاثْ إِ سِيذِي.
2 أَ سِيذِي، سڒْ غَارْ ثْژَادْجِيثْ إِنُو،
أجّْ أَغُويِّي إِنُو أَذْ غَاركْ د-يَاوضْ.
3 وَارْ تّفَّارْ ؤُذمْ نّكْ خَافِي ذڭْ وَاسّْ إِ ذِي تّْوَاحْصَارغْ.
أَرّْ-د غَارِي أَمزُّوغْ نّكْ ذڭْ وَاسّْ إِ ذِي ڒَاغِيغْ،
سڒْ-د خنِّي غَارِي ذغْيَا،
4 مِينْزِي ؤُسَّانْ إِنُو عْذُونْ أَمْ دّخَّانْ،
إِخْسَانْ إِنُو أَمْ ثفْقُونْثْ إِشمْضنْ. ▪
5 ؤُڒْ إِنُو إِتِّيسْڒَاوْ ؤُ يُوژغْ أَمْ أَرّْبِيعْ،
أَڒَامِي تُّوغْ أَذْ شّغْ أَغْرُومْ إِنُو.
6 إِخْسَانْ إِنُو ڒصْقنْ غَارْ ثڒْمشْثْ إِنُو
زِي سِّيبّثْ ن ؤُزهَّارْ يُودْجْغنْ إِنُو.
7 نشّْ أَمْ إِجّْ بُو-ؤُعُوقِّي ن ؤُجْضِيضْ ذِي ڒخْڒَا،
ذوْڒغْ أَمْ إِجّْ ن مُوكَا جَارْ ڒْخِيرْبَاثْ.
8 نشّْ بدّغْ فَاقغْ،
ذوْڒغْ أَمْ يِيجّْ ن وجْضِيضْ إِ إِقِّيمنْ وحّْذسْ خْ ثْزقَّا.
9 ڒْعذْيَانْ إِنُو تّكّْوَارنْ أَيِي أَسّْ مَارَّا.
إِنِّي خَافِي إِتّْعدَّانْ،
نعّْڒنْ أَمْ قَّارنْ إِسمْ إِنُو.
10 مَاغَارْ تّتّغْ إِغّضْ أَمْ وغْرُومْ،
ؤُ خدْجْضغْ ثِيسسِّيثْ إِنُو س إِمطَّاونْ إِنُو
11 زِي سِّيبّثْ ن وسْخضْ نّكْ ذ ؤُذُوقّزْ ن وغْضَابْ نّكْ،
مَاغَارْ شكْ ثسّْڭعّْذذْ أَيِي ؤُ ثنْضَارذْ أَيِي عَاوذْ غَارْ ثمُّورْثْ.
12 ؤُسَّانْ إِنُو أَمْ إِشْثْ ن ثِيڒِي إِزُّوڭَّارْثنْ،
ؤُ نشّْ ثَاژْغغْ أَمْ ثُوڭَا.
13 مَاشَا شكْ، أَ سِيذِي، أَذْ ثقِّيمذْ إِ ڒبْذَا،
زِي جِّيڒْ أَڒْ جِّيڒْ أَذْ ذَايكْ خَارّْصنْ.
14 شكْ أَذْ ثكَّارذْ أَذْ ثَارْحْمذْ خْ صِيهْيُونْ،
مَاغَارْ أَقَا ذ ڒْوقْثْ مَاحنْذْ أَذْ خَاسْ ثْحِينّذْ،
مِينْزِي ڒْوقْثْ إِتّْوَاڭّنْ أَقَا ثِيوضْ-د.
15 مَاغَارْ إِژْرَا نّسْ ؤُسِينْ-د خْ ڒْخَاضَارْ ن إِمْسخَّارنْ نّكْ
ؤُ نِيثْنِي كْسِينْ س وسْحِيسّفْ ذِي ثْعجَّاجْثْ نْسنْ.
16 ڒڭْنُوسْ أَذْ ڭّْوذنْ إِسمْ ن سِيذِي،
مَارَّا إِجدْجِيذنْ ن ثمُّورْثْ أَذْ ڭّْوذنْ أَعُودْجِي نّكْ،
17 خْمِي إِ غَا إِبْنَا سِيذِي صِيهْيُونْ ثْوَاڒَاثْ نّغْنِيثْ،
أَذْ د-إِبَانْ ذڭْ ؤُعُودْجِي نّسْ،
18 أَذْ إِڒْهَا أَكْ-ذ ثْژَادْجِيثْ ن ؤُمزْڒُوضْ،
ؤُ وَارْ إِسّحْقَارَا شَا ثَاژَادْجِيثْ نْسنْ.
19 مَانْ أَيَا أَذْ إِتّْوَارِي إِ جِّيڒْ إِ د غَا يَاسنْ،
ڒْڭنْسْ نِّي د غَا إِتّْوَاخڒْقنْ،
أَذْ إِصبّحْ إِ سِيذِي،
20 مَاغَارْ نتَّا أَقَا إِسِّيجّْ-د زِي زَّاوشْثْ نّسْ إِقدّْسنْ يُوعْڒَانْ،
زڭْ ؤُجنَّا إِخْزَارْ-د سِيذِي غَارْ ثمُّورْثْ سْوَادَّايْ
21 حِيمَا أَذْ إِسڒْ أَنِيخْسِيسْ ن ؤُمحْپُوسْ،
حِيمَا أَذْ يَارْخُو إِ ينِّي إِدْجَانْ ذ ثَارْوَا ن ڒْموْثْ،
22 مَاحنْذْ أَذْ بَارّْحنْ س يِيسمْ ن سِيذِي ذِي صِيهْيُونْ،
ذ شّنْعثْ نّسْ ذِي ؤُرْشَالِيمْ،
23 خْمِي ذِينِّي إِ غَا تّْوَاسْمُوننْ ڒڭْنُوسْ،
جْمِيعْ أَكْ-ذ ثْڭلْذِيوِينْ حِيمَا أَذْ سخَّارنْثْ إِ سِيذِي.
24 نتَّا إِسَّارْخُو جّهْذْ إِنُو أَكْ-ذ وبْرِيذْ،
نتَّا إِسّمْژِي ذڭْ وُوسَّانْ إِنُو.
25 نشّْ نِّيغْ: ’وَارْ ذ أَيِي كسِّي ذڭْ وزْينْ ن وُوسَّانْ ن ثُوذَارْثْ إِنُو، أَ أَربِّي،
أَقَا إِسڭّْوُوسَا نّكْ تّْغِيمَانْ زِي جِّيڒْ أَڒْ جِّيڒْ.
26 زڭْ وشْحَاڒْ ؤُيَا ثڭِّيذْ ذْسَاسْ إِ ثمُّورْثْ،
إِجنْوَانْ ذ ڒْخذْمثْ ن إِفَاسّنْ نّكْ.
27 إِنَا أَذْ فْنَانْ، مَاشَا شكْ أَذْ ثْذُومذْ.
نِيثْنِي مَارَّا أَذْ أَرْشَانْ أَمْ وَارُّوضْ،
شكْ أَذْ ثنْ ثْبدّْڒذْ أَمْ إِشْثْ ن ڒعْبَايثْ،
أَمُّو إِ غَا تّْوَابدّْڒنْ.
28 شكْ مَاشَا ذ شكْ،
إِسڭّْوُوسَا نّكْ وَارْ قطِّينْ عمَّارْصْ.‘
29 إِحنْجِيرنْ ن إِمْسخَّارنْ نّكْ أَذْ ذِينْ زذْغنْ،
ؤُ ثَارْوَا نْسنْ أَذْ تّْوَاسْمثْننْ زَّاثْ إِ وُوذمْ نّكْ.