92
1 أَزهِّيذْ. إِجّْ ن إِزْڒِي إِ وَاسّْ ن سّبْثْ. 2 مَامّشْ إِصْبحْ مَاحنْذْ أَذْ نْقَاذَا سِيذِي،
أَذْ نْزهّذْ إِ يِيسمْ نّكْ،
أَ أَمْعُودْجِي خْ كُوڒْشِي،
3 مَاحنْذْ أَذْ نْبَارّحْ غَارْ ثُوفُّوثْ س ثْمخْسِيوْثْ نّكْ إِشوَّارنْ،
ڒَامَانْ نّكْ ذِي دْجْيَاڒِي،
4 ذِي لْعُوذْ س عشْرَا ن إِفِيڒَانْ ؤُ ذِي لْهَارْبَا،
س ثِيرَارْثْ خْ إِفِيڒَانْ ن ڒْڭَامْبْرِي.
5 مَاغَارْ شكْ ثسّْفَارْحذْ أَيِي، أَ سِيذِي، س ثْمڭَّا نّكْ،
نشّْ أَذْ سْڒِيوڒْوغْ خْ ڒفْعَايڒْ ن إِفَاسّنْ نّكْ.
6 مَامّشْ مْغَارنْثْ ثْمڭَّا نّكْ، أَ سِيذِي،
مَامّشْ ؤُدْجْغنْ إِخَارِّيصنْ نّكْ!
7 إِجّْ ن ؤُقفُّوحْ وَارْ غَارسْ مِينْ غَا إِعَاوذْ،
ؤُ إِجّْ ن ؤُپُوهَاڒِي وَارْ إِفهّمْ مَانْ أَيَا.
8 مَاڒَا إِعفَّاننْ غمّْينْ أَمْ أَرّْبِيعْ،
ؤُ مَارَّا إِنِّي إِتّڭّنْ ڒْمُوعْصِييّثْ نوَّارنْ،
أَقَا أَيَا أَذْ إِسِّيوضْ أَثحِّي نْسنْ إِ ڒبْذَا قَاعْ.
9 شكْ ذ أَمْعُودْجِي خْ كُوڒْشِي إِ ڒبْذَا، أَ سِيذِي!
10 مَاغَارْ خْزَارْ، ڒْعذْيَانْ نّكْ، سِيذِي،
ڒْعذْيَانْ نّكْ أَذْ فْنَانْ،
مَارَّا إِنِّي إِتّڭّنْ ڒْغشّْ أَذْ تّْوَازدْجْعنْ.
11 شكْ أَذْ ثسّْڭعّْذذْ أَشَّاوْ إِنُو أَمْ ونِّي ن ؤُفُونَاسْ نْ ڒخْڒَا،
تّْوَاذهْنغْ س زّشْثْ ن طْرِي.
12 ثِيطّْ إِنُو أَذْ ثْژَارْ إِنِّي خَافِي إِتّْشكّْمنْ،
إِمزُّوغنْ إِنُو أَذْ سْڒنْ إِ إِغْرِيمنْ إِنُو إِنِّي خَافِي د-إِكَّارنْ.
13 أَمْسڭّذْ أَذْ إِنوَّارْ أَمْ ثْشجَّارْثْ ن ثِينِي،
أَذْ إِغْمِي أَمْ ثْشجَّارْثْ ن ثنْڭلْثْ خْ إِذُورَارْ ن لُوبْنَانْ، ▪
14 إِنِّي إِتّْوَاژُّونْ ذِي ثَادَّارْثْ ن سِيذِي،
أَذْ نُّووَارنْ ذِي ڒمْرَاحَاثْ ن أَربِّي نّغْ.
15 نِيثْنِي أَذْ وْشنْ ڒْغِيدْجثْ ذِي ثوْسَارْ،
أَذْ قِّيمنْ صحّنْ ؤُ ذ طْرِي.
16 مَاحنْذْ أَذْ بَارّْحنْ، بلِّي سِيذِي أَقَا-ث نِيشَانْ.
نتَّا ذ ثَاصْضَارْثْ إِنُو ؤُ وَارْ ذَايسْ بُو ڒْغشّْ.