91
1 ونِّي إِزدّْغنْ ذڭْ ؤُذُورِّي ن ؤُمْعُودْجِي خْ كُوڒْشِي، أَقَا نتَّا أَذْ إِسّنْسْ ذِي ثِيڒِي ن ؤُمْزمَّارْ خْ كُوڒْشِي.
2 أَذْ إِنِيغْ إِ سِيذِي: شكْ ذ أَمْشَانْ إِنُو ن ثَاروْڒَا ذ لْپُورْجْ إِنُو،
أَربِّي إِنُو، ونِّي خْ تّشْڒغْ!
3 مَاغَارْ نتَّا أَذْ شكْ إِفكّْ زِي ثخْشفْثْ ن إِنيْمَارنْ ن إِجْضَاضْ،
زِي طَّاعُونْ يَاردّْدْجنْ. ▪
4 س أَرِّيشْ نّسْ أَذْ شكْ إِذڒْ،
سَاذُو وَافْرِيونْ نّسْ أَذْ ثَافذْ أَذُورِّي.
ڒْمَانثْ نّسْ ذ ثَاسدَّارْثْ ثَامقّْرَانْثْ ذ أَرُّوضْ ن وُوزَّاڒْ. ▪
5 وَارْ ثتّڭّْوذذْ شَا زڭْ ؤُنخْڒِيعْ ن دْجِيڒثْ،
زِي فْڒِيثْشَا ن ڒْقوْسْ إِ ذِينْ إِطَّاونْ س وَاسّْ، ▪
6 ؤُڒَا زِي طَّاعُونْ إِ د-إِتّنّْضنْ ذِي ثَادْجسْثْ،
زِي لْهَالَاكْ إِ يَاردّْدْجنْ س ؤُزِيڒْ.
7 وَاخَّا أَذْ وْضَانْ أَڒفْ غَارْ ؤُغزْذِيسْ نّكْ،
ؤُ عشْرَا أَڒفْ غَارْ أَفُوسْ أَفُوسِي نّكْ،
وَاخَّا أَمنِّي وَارْ شكْ د-إِتِّيكّْوِيضْ.
8 أَذْ ثْوَاڒِيذْ أَيَا س ثِيطَّاوِينْ نّكْ وَاهَا،
أَذْ ثْژَارذْ مَامّشْ إِ غَا إِتّْوَاخْڒفْ زڭْ إِعفَّاننْ.
9 مَاغَارْ خَاكْ: ’شكْ أَ سِيذِي، أَقَا شكْ ذ أَمْشَانْ إِنُو ن ثَاروْڒَا!‘
أَقَا شكْ ثڭِّيذْ أَمْعُودْجِي خْ كُوڒْشِي ذ ثَازذِّيغْثْ إِ يِيخفْ نّكْ،
10 وَارْ ذَايكْ ثْنطّحْ ثُوعفّْنَا،
ؤُڒَا ذ إِشْثْ ن جّْرِيحشْثْ وَارْ د-ثْقَارَّابْ شَا غَارْ ؤُقِيضُونْ نّكْ،
11 مَاغَارْ نتَّا أَذْ خَاكْ يُومُورْ لْمَالَاكَاثْ نّسْ،
مَاحنْذْ أَذْ شكْ حْضَانْثْ ذِي مَارَّا إِبْرِيذنْ نّكْ. ▪
12 أَذْ شكْ كْسِينْ خْ إِفَاسّنْ نْسنْثْ،
حِيمَا أَضَارْ نّكْ وَارْ إِنڭّحْ أَژْرُو. ▪
13 أَذْ ثْعفْسذْ خْ ويْرَاذْ إِزهَّارنْ ؤُ خْ ثْڒفْسَا،
أَذْ ثْعجْنذْ خْ ويْرَاذْ أَمژْيَانْ ذ ڒْهَايْشثْ ن ڒبْحَارْ. ▪
14 ؤُمِي د-إِقّنْ نتَّا غَارِي،
نشّْ أَذْ ث سّْنجْمغْ.
نشّْ أَذْ ث سّْڭعّْذغْ،
مَاغَارْ نتَّا إِسّنْ إِسمْ إِنُو.
15 نتَّا أَذْ أَيِي إِڒَاغَا ؤُ نشّْ أَذْ خَاسْ د-أَرّغْ.
ذِي ڒحْصَارثْ أَقَا أَيِي غَارسْ.
نشّْ أَذْ ث فكّغْ، أَذْ أَسْ سّْعُودْجغْ.
16 نشّْ أَذْ ث سّْجِّيوْنغْ أَكْ-ذ ثُوزّڭَّارْثْ ن وُوسَّانْ،
نشّْ أَذْ أَسْ سّشْنغْ أَسنْجمْ إِنُو.