أَذْلِيسْ وِيسّْ أَربْعَا: إِزهِّيذنْ 90-106
90
1 ثَاژَادْجِيثْ ن مُوسَا، أَرْيَازْ ن أَربِّي. أَ سِيذِي إِنُو، شكْ ثُوغَا ذ ثَازذِّيغْثْ نّغْ زِي جِّيڒْ أَڒْ جِّيڒْ.
2 قْبڒْ مَا أَذْ إِڒِينْ إِذُورَارْ،
قْبڒْ مَا أَذْ د-ثسُّوفّْغذْ ثَامُّورْثْ، دُّونشْثْ،
وَاهْ أَقَا شكْ ذ أَربِّي زِي ڒبْذَا أَڒْ ڒبْذَا.
3 شكْ ثجِّيذْ بْنَاذمْ أَذْ إِعْقبْ غَارْ ثْعجَّاجْثْ.
ثقَّارذْ: ”عقْبتِّيوْ-د ثَارْوَا ن بْنَاذمْ!“
4 مَاغَارْ أَڒفْ ن إِسڭّْوُوسَا ذِي ثِيطَّاوِينْ نّكْ أَمْ وَاسّْ ن إِضنَّاضْ،
ونِّي إِعْذُونْ أَمْ إِشْثْ ن نُّوبثْ ن ثْعسَّاسْثْ ذِي دْجِيڒثْ.
5 شكْ ثْفَارْضذْ ثنْ، أَقَا أَثنْ أَمْ يِيضسْ.
Ƴأَرْ ثُوفُّوثْ ڭِّينْ أَمْ أَرّْبِيعْ إِسْڒَاونْ.
6 غَارْ ثُوفُّوثْ إِتّْزيْزِيوْ أَرّْبِيعْ ؤُشَا خنِّي إِتِّيسْڒَاوْ،
غَارْ ثْمذِّيثْ إِتّْوَامْجَارْ، إِتَّاژغْ.
7 مَاغَارْ نشِّينْ نفْنَا س وغْضَابْ نّكْ،
ننّخْڒعْ زڭْ وسْعَارْ نّكْ.
8 شكْ ثڭِّيذْ ڒْمُوعْصِييّثْ نّغْ قِيبَاتْشْ نّكْ،
دّْنُوبْ نّغْ إِنُّوفَّارنْ ذِي ثْفَاوْثْ ن وُوذمْ نّكْ.
9 مَاغَارْ مَارَّا ؤُسَّانْ نّغْ أَذْ عْذُونْ ذڭْ ؤُفُوڭمْ نّكْ إِسّڭّْوَاذنْ.
نسّعْذُو إِسڭّْوُوسَا نّغْ أَمْ إِجّْ ن ؤُسْقِينْفِي.
10 ؤُسَّانْ ن ثُوذَارْثْ نّغْ تّكّنْ سبْعِينْ ن إِسڭّْوُوسَا،
نِيغْ مڒْمِي إِ غَا نِيڒِي نجْهذْ، أَقَا ثْمَانْيِينْ ن إِسڭّْوُوسَا.
مِينْ ذَايسْ ذ أَعُودْجِي، إِتَّارُو-د ثَامَارَا ذ ڒْوحْرَانْ،
ذغْيَا ثتّكّْ ثْعدُّو ؤُ نطَّاوْ غَارْ ذِينْ.
11 مَانْ ونْ إِسّْننْ ڒْقسْحَانْ ن وغْضَابْ نّكْ،
مشْحَاڒْ إِسَّاڭّْوَاذْ ؤُذُوقّزْ نّكْ ن ؤُفُوڭمْ؟
12 سڒْمذْ أَنغْ أَذْ نْحسّبْ ؤُسَّانْ نّغْ،
حِيمَا أَذْ د-نَاوِي ؤُڒْ إِشُّورنْ س ثِيغِيثْ.
13 ذْوڒْ-د، أَ سِيذِي، أَڒْ مڒْمِي؟
حِينّْ خْ إِمْسخَّارنْ نّكْ.
14 سْجِّيونْ أَنغْ غَارْ ؤُثفُّو س ثْمخْسِيوْثْ نّكْ إِشوَّارنْ،
خنِّي أَذْ نسْڒِيوْڒوْ، أَذْ نْفَارْحْ مَارَّا ؤُسَّانْ نّغْ.
15 سْفَارْحْ أَنغْ أَنشْثْ ن وُوسَّانْ إِ ذ أَنغْ ثحْصَارذْ،
أَنشْثْ ن إِسڭّْوُوسَا إِ ذِي نژْرَا ڒْغَارْ.
16 سْشنْ ڒْخذْمثْ نّكْ إِ إِمْسخَّارنْ نّكْ،
ڒْعزّْ نّكْ خْ إِحنْجِيرنْ نْسنْ.
17 أَذْ خَانغْ ثهْوَا ڒضْرَافثْ ن سِيذِي، أَربِّي نّغْ،
ؤُ ضْمنْ شكْ ڒْخذْمثْ ن إِفَاسّنْ نّغْ،
وَاهْ، ڒْخذْمثْ ن إِفَاسّنْ نّغْ ضْمنْ إِ-ت.