89
1 أَخمِّي ن إِثَانْ، أَزْرَاحِي. 2 أَذْ غنّْجغْ خْ ثْمخْسِيوْثْ إِشوَّارنْ ن سِيذِي إِ ڒبْذَا،
أَذْ بَارّْحغْ ڒَامَانْ نّكْ س ؤُقمُّومْ إِنُو زِي جِّيڒْ أَڒْ جِّيڒْ.
3 مَاغَارْ نِّيغْ: ”ثَامخْسِيوْثْ إِشوَّارنْ ثتّْوَابْنَا إِ ڒبْذَا،
أَقَا ثْضمْنذْ ڒَامَانْ نّكْ ذڭْ إِجنْوَانْ.“
4 ”نشّْ ڭِّيغْ إِجّْ ن ڒْعَاهْذْ أَكْ-ذ ونِّي زَّايِي إِتّْوَافَارْزنْ،
جُّودْجغْ إِ ؤُمْسخَّارْ إِنُو ذَاوُوذْ:
5 ’نشّْ أَذْ ضمْنغْ زَّارِيعثْ نّكْ إِ ڒبْذَا،
ؤُ أَذْ بْنِيغْ ڒْعَارْشْ نّكْ زِي جِّيڒْ أَڒْ جِّيڒْ.‘ “ سِيلَاهْ.
6 إِجنْوَانْ تّْقَاذَانْ شكْ خْ لْمُوعْجِيزَا نّكْ، أَ سِيذِي،
ؤُڒَا ذڭْ وڭْرَاوْ ن إِمْقدَّاسنْ تّْقَاذَانْ شكْ خْ ڒَامَانْ نّكْ. ▪
7 مَاغَارْ مَانْ ونْ ذڭْ إِسيْنُوثنْ إِزمَّارْ أَذْ إِتّْوَاقدّْ أَكْ-ذ سِيذِي،
مَانْ ونْ إِ إِدْجَانْ جَارْ وَارَّاونْ ن أَربِّي إِزمَّارْ أَذْ إِمْقُودَّا أَكْ-ذ سِيذِي؟
8 أَربِّي إِوْعَارْ أَطَّاسْ ذڭْ وڭْرَاوْ ن إِمْقدَّاسنْ،
مَارَّا إِنِّي ذ أَسْ د-إِنّْضنْ تّڭّْوذنْ زَّايسْ.
9 أَ سِيذِي، أَربِّي ن ڒْعسْكَارَاثْ،
مَانْ ونْ غَارْ إِدْجْ ثِيزمَّارْ أَمْ شكْ، أَ سِيذِي!
ڒَامَانْ نّكْ إِتّنّضْ إِ شكْ.
10 شكْ ثْحكّْمذْ خْ نّْفَاخثْ ن ڒبْحَارْ.
خْمِي د-تّْنكَّارنْ ڒمْوَاجْ نّسْ، أَقَا شكْ ثَارسِّيذْ إِ-ثنْ.
11 أَقَا ثْڒبْزذْ رَاهَابْ أَمْ يِيجّنْ ونِّي إِسّْنُوقّْبنْ،
ثْزدْجْعذْ ڒْعذْيَانْ نّكْ س ؤُغِيڒْ نّكْ إِجهْذنْ.
12 نّكْ إِجنْوَانْ، نّكْ ؤُڒَا ذ ثَامُّورْثْ.
دُّونِيثْ ذ ؤُعمَّارْ نّسْ ثڭِّيذْ أَسنْ ذْسَاسْ. ▪
13 شكْ ثْخڒْقذْ-د شَّامَالْ ذ لْجَانُوبْ،
ثَاپُورْ ذ هِيرْمُونْ سْڒِيوْڒِيونْ س يِيسمْ نّكْ.
14 أَقَا غَاركْ أَغِيڒْ إِ ذِي ثڭِّيذْ ثَارْيَاسْثْ،
أَفُوسْ نّكْ إِجْهذْ، أَفُوسْ أَفُوسِي نّكْ إِتّْوَاسْڭعَّاذْ.
15 ثَاسڭْذَا ذ ڒْحقّْ أَقَا أَثنْ ذ ذْسَاسْ ن ڒْعَارْشْ نّكْ،
ثَامخْسِيوْثْ إِشوَّارنْ ذ ڒَامَانْ إِتِّيزْوَارنْ زَّاثْ إِ وُوذمْ نّكْ. ▪
16 سّعْذْ ن ڒْڭنْسْ إِ إِسّْننْ أَذْ ميّْزنْ أَصُوضِي س وسْرُودّحْ ن ڒْپُوقْ، أَ سِيذِي،
نِيثْنِي أَذْ ؤُيُورنْ ذِي ثْفَاوْثْ ن وُوذمْ نّكْ.
17 نِيثْنِي أَذْ فَارْحنْ أَسّْ مَارَّا س يِيسمْ نّكْ،
ؤُشَا أَذْ د-تّْوَاسْڭعّْذنْ س ثْسڭْذَا نّكْ،
18 مَاغَارْ شكْ ذ ڒمْڒَاحثْ ن جّهْذْ نْسنْ،
إِشّْ نّغْ أَذْ إِتّْوَاسْڭعّذْ س ڒْخَاضَارْ نّكْ.
19 ثَاسدَّارْثْ نّغْ ن ؤُسڒْقِي ن سِيذِي،
أَجدْجِيذْ نّغْ أَقَا-ث ن ؤُمْقدَّاسْ ن إِسْرَائِيل.
20 إِشْثْ ن ثْوَاڒَا ثُوغَا ثسِّيوْڒذْ ذِي ثْمژْرِيوْثْ خْ ؤُمْثِيقِّي نّكْ، ثنِّيذْ:
”س ؤُفُوسْ ن إِجّْ ن بُو-ثغْرُوضْثْ ڭِّيغْ ثْوِيزَا،
إِجّْ ونِّي إِتّْوَافَارْزنْ زِي ڒْڭنْسْ سّْڭعّْذغْ-ث.
21 نشّْ ؤُفِيغْ ذَاوُوذْ، أَمْسخَّارْ إِنُو،
ذهْنغْ ث س زّشْثْ إِقدّْسنْ، ▪
22 مَاحنْذْ أَفُوسْ إِنُو ڭُّورْ أَذْ يِيڒِي إِمْثنْ أَكِيذسْ،
وَاهْ أَغِيڒْ إِنُو أَذْ ث إِسّمْحذْ.
23 ڒعْذُو وَارْ ث إِسَّاڭّْوَاذْ،
ؤُ مِّيسْ ن ڒْمُوعْصِييّثْ وَارْ ث إِحصَّارْ. ▪
24 إِنِّي ث إِحصَّارنْ أَذْ ثنْ ڒبْزغْ زَّاثْ إِ وُوذمْ نّسْ،
إِنِّي ث إِشَارّْهنْ أَذْ ثنْ وْثغْ.
25 ڒَامَانْ إِنُو ذ ثْمخْسِيوْثْ إِنُو إِشوَّارنْ، أَقَا أَثنْ أَكِيذسْ إِ غَا يِيڒِينْ،
أَذْ إِتّْوَاسْڭعّذْ يِيشّْ نّسْ س يِيسمْ إِنُو.
26 أَذْ سَّارْسغْ أَفُوسْ نّسْ خْ ڒبْحَارْ،
أَفُوسْ نّسْ أَفُوسِي خْ إِغزْرَانْ.
27 نتَّا أَذْ خَافِي د-إِڒَاغَا:
’أَقَا شكْ ذ بَابَا إِنُو، أَربِّي إِنُو، ذ ثَاصْضَارْثْ ن ؤُسنْجمْ إِنُو!‘ ▪
28 نشّْ أَذْ ث ڭّغْ ذ أَمنْزُو إِنُو،
أَمْعُودْجِي خْ إِجدْجِيذنْ ن ثمُّورْثْ.
29 إِ ڒبْذَا أَذْ حْضِيغْ ثَامخْسِيوْثْ إِنُو إِشوَّارنْ زَّاثسْ،
ؤُ أَذْ قِّيمغْ تّطّْفغْ س ڒْمَانثْ ذِي ڒْعَاهْذْ إِنُو أَكِيذسْ.
30 أَذْ ژُّوغْ زَّارِيعثْ نّسْ إِ ڒبْذَا،
ؤُ ڒْعَارْشْ نّسْ مِينْ غَا كّنْ ؤُسَّانْ ن ؤُجنَّا دْجَانْ.
31 مَاڒَا إِحنْجِيرنْ نّسْ حيّْذنْ خْ شَّارِيعَا إِنُو،
وَارْ ڭُّورنْ أَكْ-ذ لْفَارَايِيضْ إِنُو، ▪
32 مَاڒَا سّْفسْذنْ ثِيوصَّا إِنُو،
وَارْ حطِّينْ ڒُومُورَاثْ إِنُو،
33 خنِّي أَذْ خدْجْصغْ أَعدُّو نْسنْ س وعْمُوذْ،
ڒْمُوعْصِييّثْ نْسنْ س ثيِّيثَا.
34 مَاشَا وَارْ خَاسنْ تّكّْسغْ ثَامخْسِيوْثْ إِنُو إِشوَّارنْ،
وَارْ نكَّارغْ ڒْمَانثْ إِنُو.
35 وَارْ تّْغصَّابغْ ڒْعَاهْذْ إِنُو،
مِينْ د-إِفّْغنْ زڭْ إِينْشِيشنْ إِنُو،
وَارْ ث تّْبذِّيڒغْ.
36 نشّْ جُّودْجغْ إِشْثْ ن ثْوَاڒَا غَارْ ثْقدَّاسْثْ إِنُو:
‘وَارْ ڭُّورْ أَذْ سّْخَارّْقغْ عمَّارْصْ خْ ذَاوُوذْ!‘ ▪
37 زَّارِيعثْ نّسْ أَذْ ثقِّيمْ إِ ڒبْذَا،
ؤُ ڒْعَارْشْ نّسْ أَذْ ذِينْ إِبدّْ زَّاثِي أَمْ ثْفُوشْثْ.
38 نتَّا أَذْ إِقِّيمْ إِبدّْ إِ ڒبْذَا أَمْ ثْزِيرِي،
ؤُ أَشهَّاذْ ذڭْ إِسيْنُوثنْ أَقَا-ث ذ أَمْثِيقِّي.“ سِيلَاهْ.
39 مَاشَا شكْ ثْعَارّْنذْ ث غَارْ ؤُغزْذِيسْ، ثنْضَارذْ ث،
شكْ ثْفُوڭّْمذْ خْ ؤُمذْهُونْ نّكْ.
40 شكْ ثنْضَارذْ ڒْعَاهْذْ أَكْ-ذ ؤُمْسخَّارْ نّكْ،
ثْفسْذذْ ثَامْرِيسْثْ ن وعْزَاڒْ نّسْ س ؤُبدْجَاعْ ن ثمُّورْثْ.
41 ثْغضْڒذْ مَارَّا ڒحْيُوذْ نّسْ،
ثْهذْمذْ ثِيندَّامْ نْسنْ إِفَارْينْ س إِغبْرَاونْ.
42 مَارَّا إِنِّي د-إِكِّينْ أَبْرِيذْ كشّْضنْ ث،
نتَّا إِذْوڒْ ذ أَسحْقَارْ إِ جِّيرَانْ نّسْ. ▪
43 شكْ ثسّْڭعّْذذْ أَفُوسْ أَفُوسِي ن يِينِّي ث إِحصَّارنْ،
ثسّْفَارّْحذْ مَارَّا ڒْعذْيَانْ نّسْ.
44 شكْ ثسّنْقڒْبذْ ڒقْضعْ ن سِّيفْ نّسْ،
شكْ ثجِّيذْ ث وَارْ إِتّْغِيمِي إِبدّْ ذڭْ ؤُمنْغِي.
45 شكْ ثسّْبدّذْ أَژْرِي نّسْ،
ڒْكُورْسِي نّسْ إِڭلّْذنْ ثنْضَارذْ ث غَارْ ثمُّورْثْ.
46 شكْ ثسّمْژِيذْ أَسْ ؤُسَّانْ ن ثمْژِي نّسْ،
ثذْڒِيذْ ث س ڒفْضِيحثْ. سِيلَاهْ.
47 غَارسْ أَڒْ مڒْمِي عَاذْ، أَ سِيذِي، أَذْ ثسّْنُوفَّارذْ إِخفْ نّكْ بْڒَا قطُّو،
أَذْ يَارْغْ وسْعَارْ نّكْ أَمْ ثْمسِّي؟
48 عْقڒْ خْ ڒْمِيجَاڒْ ن ثُوذَارْثْ إِنُو!
مَايمِّي د-ثْخڒْقذْ مَارَّا أَرَّاوْ ن بْنَاذمْ أَمنِّي بَاطڒْ؟
49 مَانْ أَرْيَازْ إِجهْذنْ وَارْ إِتّْوِيڒِي ڒْموْثْ،
مَانْ أَرْيَازْ إِ غَا إِفكّنْ ڒعْمَارْ نّسْ زڭْ ؤُفُوسْ ن ڒَاخَارْثْ؟ سِيلَاهْ. ▪
50 أَ سِيذِي إِنُو، مَانِي دْجَانْثْ ثْمڭَّا ن ثْمخْسِيوْثْ نّكْ إِشوَّارنْ ن زِيشْ،
ثِينِّي خْ ثُوغَا ثجِّيدْجذْ إِ ذَاوُوذْ س ڒْمَانثْ نّكْ؟ ▪
51 أَ سِيذِي إِنُو، عْقڒْ خْ ؤُسحْقَارْ ن إِمْسخَّارنْ نّكْ،
نِّي أَربُّوغْ ذڭْ وحْسِينْ إِنُو زڭْ ؤُبَارُّو ن مَارَّا ڒڭْنُوسْ، ▫
52 إِ زِي ذ أَيِي سّحْقَارَانْ ڒْعذْيَانْ نّكْ، أَ سِيذِي،
إِ زِي سّحْقَارَانْ إِصُورَافْ ن ؤُمذْهُونْ نّكْ.
53 أَذْ إِتّْوَابَاركْ سِيذِي إِ ڒبْذَا قَاعْ!
أَمِينْ، وَاهْ، أَمِينْ!