88
1 إِزْڒِي، أَزهّذْ ن أَيْثْ ن قُورَاحْ. إِ ؤُمقّْرَانْ ن إِمغْنَاجنْ،
س ثغْنِينْثْ ن ’إِزْڒِي ن وشْضَانْ‘ غَارْ ڒحْصَارَاثْ.
أَخمِّي ن هَايْمَانْ، أَزْرَاحِي.
2 أَ سِيذِي، أَربِّي ن ؤُسنْجمْ إِنُو،
ذڭْ وَاسّْ إِ ذِي د غَا سْغُويّغْ غَاركْ س دْجِيڒثْ،
3 أجّْ خنِّي أَذْ د-ثَاسْ ثْژَادْجِيثْ إِنُو زَّاثكْ،
أوْشْ أَمزُّوغْ نّكْ إِ ؤُڒَاغِي إِنُو.
4 مَاغَارْ ڒعْمَارْ إِنُو إِجِّيونْ س ڒْمُوصِيبَاثْ،
ثُوذَارْثْ إِنُو ثُوذسْ-د ڒَاخَارْثْ.
5 نشّْ تّْوَاحسَّابغْ أَمْ ينِّي د-إِهكّْوَانْ ذڭْ وحْفُورْ ن ونْضڒْ،
أَمْ إِجّْ ن ورْيَازْ ؤُمِي وَارْ ذَايسْ جّْهذْ عَاذْ.
6 أَقَا تّْوَاحُوزغْ جَارْ إِمتَّانْ،
أَمْ ينِّي إِتّْوَانْغنْ إِنِّي إِزّْڒنْ ذڭْ ونْضڒْ،
إِنِّي وَارْ ثنْ ثتِّيذَارذْ عَاذْ،
تّْوَاقضْعنْ زڭْ ؤُفُوسْ نّكْ.
7 شكْ ثڭِّيذْ أَيِي ذڭْ ونْضڒْ يُودْجْغنْ قَاعْ،
ذِي ثَادْجسْثْ، ذِي ڒَادْجَاغْ.
8 أَسْعَارْ نّكْ إِذْقڒْ خَافِي أَطَّاسْ،
س مَارَّا ڒمْوَاجْ ن لْغَاضَابْ نّكْ ثسّْذدْجذْ أَيِي. سِيلَاهْ.
9 إِمْقَارَّابنْ إِنُو ثسِّيڭّْوجذْ إِ-ثنْ خَافِي،
ثَارِّيذْ أَيِي ذ نّْعِي إِ نِيثْنِي.
إِتّْوَابلّعْ خَافِي، وَارْ زمَّارغْ أَذْ د-فّْغغْ.
10 ثِيطّْ إِنُو ثعْمشْ س ڒغْبنْ.
أَ سِيذِي، أَسّْ مَارَّا تّْڒَاغِيغْ غَاركْ،
نشّْ سّْوِيژّْضغْ إِفَاسّنْ إِنُو غَاركْ.
11 مَا أَذْ ثڭّذْ إِشْثْ ن لْمُوعْجِيزَا ذڭْ إِمتَّانْ؟
نِيغْ أَذْ د-كَّارنْ ڒخْيَاڒَاثْ ن إِمتَّانْ، مَا أَذْ شكْ قَاذَانْ؟ سِيلَاهْ.
12 مَا أَذْ بَارّْحنْ س ثْمخْسِيوْثْ نّكْ إِشوَّارنْ ذڭْ ونْضڒْ،
س ڒَامَانْ نّكْ ذڭْ ؤُهلّكْ؟
13 مَا أَذْ تّْوَاسّْننْثْ لْمُوعْجِيزَاثْ نّكْ ذِي ثَادْجسْثْ،
ثَاسڭْذَا نّكْ ذِي ثمُّورْثْ ن ثَاتُّوثْ؟
14 أَ سِيذِي، نشّْ تّْڒَاغِيغْ شكْ،
ثَاژَادْجِيثْ إِنُو ثتَّاسْ-د زَّاثكْ غَارْ ؤُثفُّو.
15 مَايمِّي، أَ سِيذِي، ثْنطَّارذْ ڒعْمَارْ إِنُو،
مَايمِّي ثتّْوَاسْنُوفَّارذْ ؤُذمْ نّكْ زَّايِي؟
16 زِي ثمْژِي إِنُو نشّْ ذِي ڒغْبنْ ؤُ ڭُّورغْ غَارْ ؤُنُورِي،
ثكّْسغْ إِسْنخْرِيعنْ نّكْ ضِيدّْ إِنُو،
تّْوَاحْصَارغْ زَّايْسنْ.
17 ثتّكّْ خَافِي ڒْحَاذُوقْ ن وغْضَابْ نّكْ،
إِتّحَّا أَيِي ؤُسڭّْوِيذْ نّكْ.
18 أَسّْ مَارَّا إِتّنّضْ أَيِي-د أَمشْنَاوْ أَمَانْ،
إِتّْقُووَّارْ أَيِي-د مَارَّا.
19 أَمْعِيزّْ إِنُو ذ أَمدُّوكّڒْ إِنُو ثسِّيڭّْوجذْ إِ-ثنْ خَافِي،
إِعْشِيرنْ إِنُو أَقَا أَثنْ تّْوَاڒحّْفنْ س ثَادْجسْثْ.