86
1 ثَاژَادْجِيثْ ن ذَاوُوذْ. أَ سِيذِي، أَرّْ-د أَمزُّوغْ نّكْ غَارِي، سڒْ أَيِي،
مَاغَارْ نشّْ ذِي ڒغْبنْ ؤُ زڒْضغْ.
2 حْضَا خْ ڒعْمَارْ إِنُو، مَاغَارْ نشّْ ذ أَمْثِيقِّي،
أَ أَربِّي إِنُو، سنْجمْ أَمْسخَّارْ نّكْ، ونِّي خَاكْ إِتّْشَاڒَانْ.
3 حِينّْ خَافِي، أَ سِيذِي إِنُو،
مَاغَارْ تّْڒَاغِيغْ-د خَاكْ أَسّْ أَمْ إِكْمڒْ.
4 سْفَارْحْ ڒعْمَارْ ن ؤُمْسخَّارْ نّكْ،
مَاغَارْ إِ شكْ، أَ سِيذِي إِنُو، سّْڭعَّاذغْ ڒعْمَارْ إِنُو.
5 مَاغَارْ شكْ، أَ سِيذِي إِنُو، ذ أَصبْحَانْ ؤُ ذ أَمْسَامحْ،
غَاركْ ثَامخْسِيوْثْ إِشوَّارنْ إِ مَارَّا إِنِّي غَاركْ د-إِتّْڒَاغَانْ.
6 أَ سِيذِي، سڒْ إِ ثْژَادْجِيثْ إِنُو،
حكَّارْ إِ ثْمِيجَّا ن ؤُحشّمْ إِنُو.
7 ذڭْ وَاسّْ ن ڒحْصَارثْ إِنُو تّْڒَاغِيغْ-د غَاركْ،
مَاغَارْ شكْ أَذْ خَافِي د-ثَارّذْ. ▪
8 جَارْ إِربِّيثنْ وَارْ إِدْجِي ؤُڒَا ذ إِجّنْ أَمشْنَاوْ شكْ، أَ سِيذِي إِنُو،
ؤُ وَارْ ذِينْ مِينْ يَارْوسنْ ذِي ثْمڭَّا نِّي ثڭِّيذْ. ▪
9 مَارَّا ڒڭْنُوسْ إِ ثڭِّيذْ، أَذْ د-أَسنْ،
أَذْ أَضَارنْ زَّاثْ إِ وُوذمْ نّكْ، أَ سِيذِي إِنُو،
أَذْ سّْعُودْجنْ إِسمْ نّكْ.
10 مَاغَارْ شكْ ذ أَمقّْرَانْ ؤُ شكْ ذ ونِّي إِتّڭّنْ لْمُوعْجِيزَاثْ،
شكْ وحّْذكْ ذ أَربِّي إِ ثدْجِيذْ.
11 سْشنْ أَيِي أَبْرِيذْ نّكْ، أَ سِيذِي، حِيمَا أَذْ ؤُيُورغْ ذِي ثِيذتّْ نّكْ،
سْمُونْ ؤُڒْ إِنُو مَاحنْذْ أَذْ ڭّْوذغْ إِسمْ نّكْ. ▪
12 أَ سِيذِي إِنُو، أَربِّي إِنُو، خْسغْ أَذْ شكْ قَاذِيغْ س مَارَّا وُوڒْ إِنُو،
أَذْ شنّْعغْ إِسمْ نّكْ إِ ڒبْذَا قَاعْ.
13 مَاغَارْ ثَامخْسِيوْثْ نّكْ إِشوَّارنْ ثمْغَارْ خَافِي،
شكْ ثسّْنجْمذْ ڒعْمَارْ إِنُو زِي ڒَادْجَاغْ ن ڒَاخَارْثْ.
14 أَ أَربِّي، إِمْعفَّارنْ كَّارنْ-د أَكِيذِي،
ؤُ بَانْذِييَّاثْ ن أَيْثْ ن بُو-ڒخْشُونثْ أَرزُّونْ أَذْ نْغنْ ڒعْمَارْ إِنُو.
شكْ وَارْ غَارْسنْ ثدْجِيذْ قِيبَاتْشْ إِ ثِيطَّاوِينْ نْسنْ. ▪
15 مَاشَا شكْ، أَ سِيذِي إِنُو، ذ أَربِّي ذ أَرْحِيمْ ذ ؤُحْنِينْ،
غَاركْ تَّاسِيعْ ن ڒْخَاضَارْ ؤُڒَا ذ ثَامخْسِيوْثْ إِشوَّارنْ ذ ڒَامَانْ مْغَارنْ. ▪
16 خْزَارْ-د غَارِي ؤُ حِينّْ خَافِي،
أڭّْ جّهْذْ نّكْ ذڭْ ؤُمْسخَّارْ نّكْ،
ؤُشَا سنْجمْ مِّيسْ ن ثَايَّا نّكْ.
17 أڭّْ إِشْثْ ن ڒعْڒَامثْ ذِي طّْوعْ إِنُو،
حِيمَا إِنِّي ذ أَيِي إِشَارّْهنْ أَذْ ث ژَترنْ أَذْ سّضْحَانْ،
مَاغَارْ شكْ، أَ سِيذِي، ثوْشِيذْ أَيِي أَفُوسْ ؤُ ثسّْفوّْجذْ خَافِي.