‏1 إِ ؤُمقّْرَانْ ن إِمغْنَاجنْ. زڭْ أَيْثْ ن قُورَاحْ. أَزهّذْ.

‏2 شكْ ثَارْضِيذْ خْ ثمُّورْثْ، أَ سِيذِي،

ثسّنْقڒْبذْ ثَامحْبَاسْثْ ن يَاعْقُوبْ.

‏3 ثكّْسذْ ڒْمُوعْصِييّثْ خْ ڒْڭنْسْ نّكْ،

ثذْڒِيذْ مَارَّا دّْنُوبْ نّسْ. سِيلَاهْ.

‏4 شكْ ثْمنْعذْ مَارَّا أَذُوقّزْ نّكْ ن ؤُفُوڭمْ،

ثسّْثوّْجذْ ڒْحَاذُوقْ ن وغْضَابْ نّكْ.

‏5 أَرّْ أَنغْ، أَ أَربِّي ن ؤُسنْجمْ نّغْ،

تُّو أَغْضَابْ نّكْ خَانغْ.

‏6 مَا ثخْسذْ أَذْ خَانغْ ثسْعَارذْ إِ ڒبْذَا؟

مَا أَذْ ثڭّذْ أَغْضَابْ نّكْ أَذْ إِقِّيمْ زِي جِّيڒْ أَڒْ جِّيڒْ؟

‏7 مَا وَارْ ذ أَنغْ ثجِّيذْ أَذْ ندَّارْ عَاوذْ،

حِيمَا أَذْ أَشْ إِفَارْحْ ڒْڭنْسْ نّكْ؟ ^▪  

‏8 سْشنْ أَنغْ-د ثَامخْسِيوْثْ نّكْ إِشوَّارنْ، أَ سِيذِي،

أوْشْ أَنغْ أَسنْجمْ نّكْ.

‏9 نشّْ خْسغْ أَذْ سْڒغْ مِينْ غَا إِسِّيوڒْ أَربِّي، سِيذِي،

مَاغَارْ نتَّا أَذْ إِسِّيوڒْ أَكْ-ذ ڒْڭنْسْ نّسْ ؤُ أَكْ-ذ إِمْثِيقَّانْ نّسْ خْ ڒهْنَا.

غَارْومْ، مَاڒَا نِيثْنِي أَذْ د-ذوْڒنْ تّْشَاڒَانْ خْ يِيخفْ نْسنْ.

‏10 نِيشَانْ، أَقَا يُوذسْ-د ؤُسنْجمْ نّسْ إِ ينِّي زَّايسْ إِتّڭّْوذنْ،

حِيمَا أَعُودْجِي نّسْ أَذْ إِزْذغْ ذِي ثمُّورْثْ نّغْ.

‏11 ثَامخْسِيوْثْ إِشوَّارنْ ذ ڒَامَانْ أَذْ مّْسَاڭَارنْ،

ثَاسڭْذَا ذ ڒهْنَا أَذْ مْسُوذُومنْ. ^▪  

‏12 ثِيذتّْ أَذْ ثغْمِي زِي ثمُّورْثْ،

ثَاسڭْذَا أَذْ ثسِّيجّْ غَارْ سْوَادَّايْ زڭْ ؤُجنَّا.

‏13 سِيذِي أَذْ إِوْشْ ؤُڒَا ذ مِينْ إِصبْحنْ،

ثَامُّورْثْ نّغْ أَذْ ثوْشْ ڒْغِيدْجثْ نّسْ. ^▪  

‏14 ثَاسڭْذَا أَذْ أَسْ ثِيزْوَارْ زَّاثْ إِ وُوذمْ نّسْ،

أَذْ ثحْضَا جُّورّثْ ن إِصُورَافْ نّسْ.