80
1 إِ ؤُمقّْرَانْ ن إِمغْنَاجنْ. س ثغْنِينْثْ ن ’ثْلِيلِّيشِينْ‘. شّْهَاذثْ ن أَسَافْ. أَزهّذْ. ▫ 2 سڒْ، أَ أَمكْسَاوْ ن إِسْرَائِيل،
شكْ ذ ونِّي يَاركّْوسنْ يُوسُوفْ أَمْ وُودْجِي،
شكْ ذ ونِّي إِتّْغِيمَانْ خْ إِكِيرُوبنْ، بَانْ-د ذِي ثِيسِّيقْثْ! ▫
3 سكَّارْ جّهْذْ نّكْ زَّاثْ إِ وُوذمْ ن إِفْرَايِيمْ ذ بِينْيَامِينْ ذ مَانَاسَّا،
أَسْ-د حِيمَا أَذْ أَنغْ ثْفكّذْ.
4 أَ أَربِّي، أَرّْ أَنغْ-د ؤُ أجّْ ؤُذمْ نّكْ أَذْ يَارْغْ،
خنِّي أَذْ نتّْوَافكّْ. ▪
5 أَ سِيذِي، أَربِّي ن ڒْعسْكَارَاثْ،
مشْحَاڒْ إِ غَا ثكّذْ ثتّْخيَّاقذْ زِي ثْژَادْجِيثْ ن ڒْڭنْسْ نّكْ؟
6 شكْ ثسّشّذْ ثنْ س وغْرُومْ ن إِمطَّاونْ،
ثَارِّيذْ ثنْ أَذْ سْونْ إِمطَّاونْ س إِجّْ ن ڒْمِيجَاڒْ إِتّْوَاڭّنْ.
7 شكْ ثڭِّيذْ أَنغْ ذ إِشْثْ ن ثْشَامَّا ن إِمْشُوبّشنْ إِ جِّيرَانْ نّغْ،
ڒْعذْيَانْ نّغْ سْثهْزَازنْ جَارْ أَسنْ. ▪
8 سْبدّْ أَنغْ، أَ أَربِّي ن ڒْعسْكَارَاثْ،
أجّْ ؤُذمْ نّكْ أَذْ يَارْغْ،
خنِّي أَذْ نتّْوَافكّْ.
9 شكْ ثْقڒْعذْ إِشْثْ ن ثْزَايَارْثْ زِي مِيصْرَا،
ثُوژّْڒذْ خْ ڒڭْنُوسْ، ؤُشَا ثژُّوذْ-إِ-ت ذِينْ.
10 شكْ ثسّْوجْذذْ أَسْ أَمْشَانْ ؤُ ثَارِّيذْ ت-إِ-د أَذْ ثوّثْ إِژوْرَانْ،
ثْعمَّارْ ثْزَايَارْثْ مَارَّا ثَامُّورْثْ.
11 تّْوَاسّْذُورْينْ إِذُورَارْ س ثِيڒِي نّسْ،
ثِيشجِّيرَا ن ثنْڭلْثْ ن أَربِّي س ڒفْرُوعْ نّسْ.
12 ثڭَّا ثِيسضْوِينْ نّسْ أَذْ أَوْضنْثْ أَڒْ ڒبْحَارْ،
إِفثْوَانْ نّسْ إِزِييْزَاونْ أَڒْ إِغْزَارْ ن لْفُورَاطْ.
13 مَايمِّي ثْغضْڒضْ إِغبْرَاونْ نّسْ،
أَڒَامِي مَارَّا إِنِّي د-إِتّكّنْ خْ وبْرِيذْ ڒقّْضنْ ت؟
14 إِڒفْ زڭْ وزْغَارْ إِقْڒبْ ثَازَايَارْثْ،
مُومُّو ن ييَّارْ أَقَا إِهْذَا إِ-ت. ▫
15 أَ أَربِّي ن ڒْعسْكَارَاثْ، ذْوڒْ-د غَارْنغْ،
سِيجّْ-د زڭْ ؤُجنَّا، ؤُ خْزَارْ، أَرْزفْ ثَازَايَارْثْ-أَ
16 ؤُ تّْهِيلَّا ذِي ثْزَايَارْثْ ثنِّي إِژُّو ؤُفُوسْ نّكْ أَفُوسِي،
ذِي ثْممِّيثْ نِّي ثسّْجهْذذْ إِ يِيخفْ نّكْ.
17 أَقَا ثتّْوَاسّشْمضْ س ثْمسِّي، ثتّْوَاقْضعْ.
زڭْ ؤُسڭّْوذْ ن وُوذمْ نّكْ أَذْ ودَّارنْ.
18 أجّْ أَفُوسْ نّكْ أَذْ يِيڒِي أَكْ-ذ ورْيَازْ ن ؤُفُوسْ نّكْ أَفُوسِي،
أَكْ-ذ مِّيسْ ن بْنَاذمْ ونِّي ثسّْجهْذذْ إِ يِيخفْ نّكْ.
19 خنِّي وَارْ خَاكْ نْحيّذْ شَا.
أجّْ أَنغْ أَذْ ندَّارْ، خنِّي أَذْ نْڒَاغَا خْ يِيسمْ نّكْ.
20 أَ سِيذِي، أَربِّي ن ڒْعسْكَارَاثْ، سْبدّْ أَنغْ-د،
أجّْ ؤُذمْ نّكْ أَذْ يَارْغْ،
خنِّي أَذْ نتّْوَافكّْ.