81
1 إِ ؤُمقّْرَانْ ن إِمغْنَاجنْ. س ثغْنِينْثْ ن ؤُجِيتِّي. ن أَسَافْ. 2 سْڒِيوْڒمْ إِ أَربِّي، جّهْذْ نّغْ،
ذُوقّْزمْ س ڒفْرَاحثْ إِ أَربِّي ن يَاعْقُوبْ.
3 سْڭعّْذمْ إِشْثْ ن يزْڒِي ن ؤُصبّحْ، أَوِي أَبنْذِيرْ،
ڒْڭَامْبْرِي مِيژِيذْ ذ لْهَارْبَا.
4 صُوضمْ ذڭْ ؤُيِيشّْ ن إِشَارِّي غَارْ ؤُبذِّي ن ؤُيُورْ،
غَارْ ثْزِيرِي إِقفْڒنْ، غَارْ وَاسّْ ن ڒْعِيذْ نّغْ.
5 مَاغَارْ ثَا ذ ثَاوْصيّثْ إِ إِسْرَائِيل،
إِشْثْ ن لْفَارِيضَا ن أَربِّي ن يَاعْقُوبْ.
6 إِڭَّا إِ-ت ذ شّْهَاذثْ ذِي يُوسُوفْ،
ڒَامِي د-إِفّغْ ضِيدّْ إِ ثمُّورْثْ ن مِيصْرَا.
أَقَا سْڒِيغْ إِجّْ ن يِيڒسْ وَارْ ذ أَسْ فهْمغْ. ▫
7 ثَاغْرُوضْثْ نّسْ فكّغْ ت زِي دّْقڒْ،
إِفَاسّنْ نّسْ أَرْخُونْ زِي ثْسُودْجثْ إِ ثُوغَا يَاربُّو.
8 شكْ ثْڒَاغِيذْ ذِي ڒحْصَارثْ ؤُ نشّْ فكّغْ شكْ زَّايسْ.
نشّْ أَرِّيغْ-د خَاكْ زڭْ وخَّامْ إِنُّوفَّارنْ ن وَاجَّاجْ،
غَارْ وَامَانْ ن مَارِيبَا قدْجْبغْ شكْ. سِيلَاهْ.
9 سڒْ، ڒْڭنْسْ إِنُو، خنِّي نشّْ أَذْ شهْذغْ ذِي ڒْوسْثْ نّكْ، أَ إِسْرَائِيل،
مَاڒَا خنِّي ثُوغَا ثخْسذْ أَذْ غَارِي د-ثسْڒذْ.
10 وَارْ غَاركْ إِتِّيڒِي إِجّْ ن أَربِّي ذ أَغْرِيبْ،
وَارْ تَّاضَارْ ؤُڒَا إِ يِيجّْ ن أَربِّي إِ وَارْ ثسِّينذْ.
11 نشّْ ذ سِيذِي، أَربِّي نّكْ، ونِّي شكْ د-إِسُّوفّْغنْ زِي مِيصْرَا.
أَرْزمْ أَقمُّونْ نّكْ ؤُ نشّْ أَذْ ث شُّورغْ.
12 مَاشَا ڒْڭنْسْ إِنُو وَارْ إِسْڒِي شَا غَارْ ثْمِيجَّا إِنُو،
إِسْرَايِيلْ وَارْ ذ أَيِي إِخْسْ.
13 س ؤُينِّي جِّيغْ ثنْ إِ وُوڒْ نْسنْ إِقسْحنْ،
أَڒَامِي إِ غَا ؤُيُورنْ ذِي ڒشْوَارْ ن ؤُزدْجِيفْ نْسنْ.
14 مْڒِي د-إِسْڒَا غَارِي ڒْڭنْسْ إِنُو،
مْڒِي إِسْرَائِيل إِخْسْ أَذْ يُويُورْ ذڭْ إِبْرِيذنْ إِنُو!
15 خنِّي مَامّشْ ذغْيَا إِڒِي قْضِيغْ خْ ڒْعذْيَانْ نْسنْ،
أَرِّيغْ أَفُوسْ إِنُو ضِيدّْ إِ ينِّي ثنْ إِحصَّارنْ.
16 إِنِّي إِشَارّْهنْ سِيذِي أَذْ غَارسْ د-ذوْڒنْ تّْمُورُوذنْ ذدْجنْ،
ڒْوقْثْ ن ؤُخدْجصْ نْسنْ أَذْ يِيڒِي إِ ڒبْذَا.
17 إِڒِي أَقَا إِوْشَا أَسْ مَاشَّا زِي لمْلِيحْ ن يِيرْذنْ،
وَاهْ، إِڒِي س ثَامّنْثْ زِي جَّارْفْ سّْجِّيوْنغْ شكْ.