79
1 أَزهّذْ ن أَسَافْ. أَ أَربِّي، ڒڭْنُوسْ ؤُذْفنْ غَارْ ڒْوَارْثْ نّكْ.
نِيثْنِي سّْخمْجنْ زَّاوشْثْ نّكْ ثَامقّْرَانْثْ إِقدّْسنْ،
أَرِّينْ ؤُرْشَالِيمْ ذ ڒْخِيرْبَاثْ.
2 ڒْخشْبَاثْ ن إِمْسخَّارنْ نّكْ وْشِينْ ثنْثْ ذ مَاشَّا إِ إِجْضَاضْ ن ؤُجنَّا،
أَيْسُومْ ن إِمْثِيقَّانْ نّكْ إِ ڒوْحُوشْ ن ثمُّورْثْ.
3 إِذَامّنْ نْسنْ زدْجْعنْ ثنْ أَمْ وَامَانْ غَارْ مَارَّا إِغزْذِيسنْ ن ؤُرْشَالِيمْ،
ؤُڒَا ذ إِجّْ وَارْ ثنْ إِنْضِيڒْ.
4 نذْوڒْ ذ ڒفْذِيحثْ إِ جِّيرَانْ نّغْ،
ذ ؤُسْثهْزِي ذ ؤُسحْقَارْ إِ مَارَّا إِنِّي ذ أَنغْ د-إِنّْضنْ. ▪
5 أَرْ مڒْمِي، أَ سِيذِي؟ مَا خنِّي أَذْ ثقِّيمذْ ثْسعَّارذْ إِ ڒبْذَا؟
مَا أَذْ أَرغْ وَاسَامْ نّكْ أَمْ ثْمسِّي إِ ڒبْذَا؟ ▪
6 فَارّغْ أَسْعَارْ نّكْ خْ ڒڭْنُوسْ إِنِّي وَارْ شكْ إِسِّيننْ،
خْ ثِيڭلْذِيوِينْ نِّي وَارْ إِتّْڒِيغِينْ خْ يِيسمْ نّكْ. ▪
7 مَاغَارْ نِيثْنِي شِّينْ يَاعْقُوبْ،
أَردّْدْجنْ ثَازذِّيغْثْ نّسْ.
8 وَارْ خَانغْ عقّڒْ عْلَاحْسَابْ ڒْمُوعْصِييّثْ نّغْ ن زِيشْ.
قدْجقْ، أجّْ أَرّحْمثْ نّكْ أَذْ كِيذْنغْ ثمْسَاڭَارْ،
مَاغَارْ نضْعفْ أَطَّاسْ. ▪
9 أوْشْ أَنغْ أَفُوسْ نّكْ، أَ أَربِّي، ذِي طّْوعْ ن ؤُعُودْجِي ن يِيسمْ نّكْ،
سنْجمْ أَنغْ ؤُ سصْڒحْ دّْنُوبْ نّغْ ذِي طّْوعْ ن يِيسمْ نّكْ.
10 مَايمِّي إِ غَا إِنِينْ ڒڭْنُوسْ: ”مَانِي إِدْجْ أَربِّي نْسنْ؟“ أجّْ أَنْثَاقمْ ن إِذَامّنْ إِتّْوَاسِّيزْڒنْ ن ڒْڭنْسْ نّكْ
أَذْ إِذْوڒْ إِتّْوَاسّنْ جَارْ ڒڭْنُوسْ جَارْ ثِيطَّاوِينْ نّغْ.
11 أجّْ أَزهَّارْ ن ؤُمحْپُوسْ أَذْ د-يَاسْ زَّاثْ إِ وُوذمْ نّكْ،
حْضَا إِحنْجِيرنْ ن ڒْموْثْ عْلَاحْسَابْ ڒمْغَارثْ ن ؤُغِيڒْ نّكْ.
12 أَرّْ أَسنْ إِ جِّيرَانْ نّغْ أَبهْذڒْ نْسنْ سبْعَا ن ثْسقَّارْ غَارْ وحْسِينْ نْسنْ،
أَبهْذڒْ نْسنْ إِ زِي شكْ فضْحنْ، أَ سِيذِي إِنُو.
13 نشِّينْ ذ ڒْڭنْسْ نّكْ ذ وُودْجِي ن دّْمَانِي ن ثَاروْسَا نّكْ.
نتّْقَاذَا شكْ إِ ڒبْذَا، زِي جِّيڒْ أَڒْ جِّيڒْ.
نشِّينْ أَذْ نْبَارّحْ شَّانْ نّكْ.