78
1 أَخمِّي ن أَسَافْ. أَ ڒْڭنْسْ إِنُو، أوْشْ أَمزُّوغْ إِ شَّارِيعَا إِنُو!
ميّْڒمْ أَمزُّوغْ نْومْ غَارْ وَاوَاڒنْ ن ؤُقمُّومْ إِنُو.
2 نشّْ أَذْ أَرْزْمغْ أَقمُّونْ إِنُو س وَاوَاڒْ إِوزْننْ،
أَذْ بَارّْحغْ ڒمْعَانِي إِنُّوفَّارنْ زڭْ وشْحَاڒْ ؤُيَا، ▪
3 إِنِّي نسْڒَا ؤُ نسّنْ،
إِنِّي ذ أَنغْ حَاجَانْ إِبَابَاثنْ نّغْ.
4 وَارْ ثنْ نتّفَّارْ زڭْ إِحنْجِيرنْ نْسنْ،
زِي جِّيڒْ إِ د غَا يَاسنْ.
أَذْ نْبَارّحْ س ثْمڭَّا إِصبّْحنْ ن سِيذِي،
ؤُ س ثْمڭَّا إِجهْذنْ ذ لْمُوعْجِيزَاثْ نِّي ثُوغَا إِڭَّا.
5 مَاغَارْ نتَّا إِڭَّا إِشْثْ ن شّْهَاذثْ ذِي يَاعْقُوبْ،
ؤُڒَا ذ إِشْثْ ن شَّارِيعَا ذِي إِسْرَائِيل،
نِّي ثُوغَا يُومُورْ إِ إِبَابَاثنْ نّغْ،
مَاحنْذْ أَذْ ت سّْغَارنْ إِ إِحنْجِيرنْ نْسنْ، ▪
6 مَاحنْذْ جِّيڒْ إِ د غَا يَاسنْ أَذْ إِسّنْ،
إِحنْجِيرنْ نِّي د غَا إِتّْوَاخڒْقنْ أَوَارْنِي أَسنْ،
ؤُ خنِّي ؤُڒَا ذ نِيثْنِي أَذْ كَّارنْ أَذْ ت سّعْذُونْ إِ إِحنْجِيرنْ نْسنْ،
7 مَاحنْذْ نِيثْنِي أَذْ سَّارْسنْ ڒَامَانْ نْسنْ خْ أَربِّي،
وَارْ تّتُّونْ شَا ثِيمڭَّا ن أَربِّي،
مَاشَا أَذْ حْضَانْ ثِيوصَّا نّسْ،
8 وَارْ تِّيڒِينْ أَمشْنَاوْ إِبَابَاثنْ نْسنْ،
إِجّْ ن جِّيڒْ أَغنَّانْ ؤُ إِغوّْغنْ،
إِجّْ ن جِّيڒْ س وُوڒْ وَارْ إِمْثنْ ؤُ س أَرُّوحْ إِغْذَارنْ أَربِّي. ▪
9 أَيْثْ ن إِفْرَايِيمْ، إِمْجبَّاذنْ نْ ڒْقوْسْ،
عقْبنْ ذڭْ وَاسّْ ن ؤُمنْغِي.
10 وَارْ حْضَانْ ڒْعَاهْذْ أَكْ-ذ أَربِّي،
ؤُڭِينْ أَذْ ؤُيُورنْ ذِي شَّارِيعَا نّسْ.
11 تُّونْ ثِيمڭَّا نّسْ ذ لْمُوعْجِيزَاثْ،
ثِينِّي إِ ذ أَسنْ إِسّْشنْ.
12 زَّاثْ إِ ثِيطَّاوِينْ ن إِبَابَاثنْ نْسنْ إِڭَّا نتَّا إِشْثْ ن لْمُوعْجِيزَا،
ذِي ثمُّورْثْ ن مِيصْرَا، ذڭْ إِيَّارْ ن صُوعَانْ.
13 نتَّا إِبْضَا ڒبْحَارْ ؤُشَا إِسّژْوَا ثنْ زَّايسْ،
إِجَّا أَمَانْ أَذْ بدّنْ أَمْ وغْبَارْ. ▪
14 نتَّا إِسّْقبّضْ إِ-ثنْ س وَاسّْ س ؤُسيْنُو،
س دْجِيڒثْ مَارَّا س ثْفَاوْثْ ن ثْمسِّي. ▪
15 نتَّا إِبْضَا ڒجْرُوفْ ذِي ڒخْڒَا،
ؤُشَا إِوْشَا إِ ڒْڭنْسْ أَذْ إِسُو س ؤُفيّضْ،
أَمشْنَاوْ زڭْ وَامَانْ يُودْجْغنْ. ▪
16 نتَّا إِجَّا ڒْعُونْصَارَاثْ أَذْ فيّْضنْثْ زِي سّدْجَاحْ،
نتَّا إِجَّا أَمَانْ أَذْ هْوَانْ أَمْ إِغزْرَانْ.
17 مَاشَا نِيثْنِي أَرْنِينْ ذِي دّْنُوبْ نْسنْ خَاسْ،
أَرْنِينْ ذڭْ وسْعَارْ ذڭْ ؤُمْعُودْجِي خْ كُوڒْشِي
ؤُمِي ثُوغَا أَثنْ ذِي ثْنزْرُوفْثْ يُوژْغنْ.
18 نِيثْنِي جَارّْبنْ أَربِّي ذڭْ وُوڒْ نْسنْ،
ؤُمِي تَّارنْ مَاشَّا غَارْ مژْرِي ن ڒعْمَارْ نْسنْ.
19 سِّيوْڒنْ ضِيدّْ إِ أَربِّي، نَّانْ:
”مَا إِزمَّارْ أَربِّي أَذْ إِسّوْجذْ طَّابْڒَا ذِي ڒخْڒَا؟ ▪
20 خْزَارْ، نتَّا إِوْثَا ذِي ثصْضَارْثْ،
أَڒَامِي د-ؤُزّْڒنْ زَّايسْ وَامَانْ ذ إِغزْرَانْ.
مَا إِزمَّارْ نتَّا أَذْ إِوْشْ أَغْرُومْ،
نِيغْ إِسّوْجذْ أَيْسُومْ إِ ڒْڭنْسْ نّسْ؟“ ▪
21 س ؤُينِّي إِسْڒَا سِيذِي ؤُشَا إِفُّوڭمْ.
ثِيمسِّي ثَارْغَا ضِيدّْ إِ يَاعْقُوبْ،
إِكَّارْ-د وغْضَابْ نّسْ ضِيدّْ إِ إِسْرَائِيل، ▪
22 مَاغَارْ وَارْ تّْشِيڒِينْ شَا خْ أَربِّي،
وَارْ ؤُمِيننْ ذڭْ ؤُسنْجمْ نّسْ.
23 نتَّا يُومُورْ إِسيْنُوثنْ سنّجْ،
ؤُ يَارْزمْ ثِيوُّورَا ن ؤُجنَّا.
24 إِفَارّغْ-د خَاسنْ ’مَانَّا‘،
إِوْشَا أَسنْ إِمنْذِي زڭْ ؤُجنَّا. ▪
25 مَارَّا شِّينْ أَغْرُومْ ن يِينِّي ذَايْسنْ ڒْعزّْ.
إِسّكّْ أَسنْ مَاشَّا نْسنْ غَارْ وبْرِيذْ أَڒَامِي جِّيوْننْ. ▫ ▪
26 نتَّا إِڭَّا أَسمِّيضْ ن مَانِيسْ د-ثْنقَّارْ ثْفُوشْثْ أَذْ إِكَّارْ ذڭْ ؤُجنَّا،
س ثْزمَّارْ نّسْ إِسّكّْ-د أَسمِّيضْ ن لْجَانُوبْ. ▪
27 إِجَّا أَيْسُومْ أَذْ خَاسنْ د-إِوْضَا أَمْ ونْژَارْ ن ثْعجَّاجْثْ،
إِجْضَاضْ س وَافْرِيونْ أَمْ إِجْذِي نْ ڒبْحُورْ.
28 نتَّا إِجَّا إِ-ثنْ أَذْ وْضَانْ ذِي ڒْوسْثْ ن ڒْمَارْڭحْ ن ڒْعسْكَارْ،
غَارْ مَارَّا إِغزْذِيسنْ ن ثْزذِّيغِينْ نْسنْ.
29 نِيثْنِي شِّينْ ؤُ جِّيوْننْ قَاعْ،
كْسِينْ مِينْ ذِي ثُوغَا ضمْعنْ.
30 نِيثْنِي ثُوغَا عَاذْ وَارْ تّْوَافكّنْ زڭْ وضْمَاعْ نْسنْ،
مَاشَّا ثُوغَا عَاذْ ذڭْ ؤُقمُّومْ نْسنْ،
31 ؤُمِي خَاسنْ إِكَّارْ وغْضَابْ ن أَربِّي.
نتَّا إِنْغَا زڭْ إِنِّي إِدْجَانْ ذ إِمْشنّْعنْ قَاعْ جَارْ أَسنْ،
يَارَّا-د إِنِّي إِتّْوَافَارْزنْ زِي إِسْرَائِيل
أَذْ أَضَارنْ غَارْ ثْعجَّاجْثْ ن ثمُّورْثْ. ▪
32 مَاشَا قَاعْ أَمنِّي أَرْنِينْ ڭِّينْ دّْنُوبْ،
وَارْ ؤُمِيننْ ذِي لْمُوعْجِيزَاثْ نّسْ.
33 نتَّا إِجَّا ؤُسَّانْ نْسنْ أَذْ عْذُونْ أَمْ إِجّْ ن ڒفْوَارْ،
إِسڭّْوُوسَا نْسنْ أَمْ إِشْثْ ن ڒْعُورّثْ.
34 خْمِي ثنْ إِ غَا إِنغْ، أَرْزُونْ خْ أَربِّي،
ذوْڒنْ-د غَارسْ، أَرْزُونْ خَاسْ س شْضَارثْ.
35 نِيثْنِي عقْڒنْ أَقَا أَربِّي ذ ثَاصْضَارْثْ نْسنْ،
ؤُ أَربِّي، أَمْعُودْجِي خْ كُوڒْشِي، أَمفْذِي نْسنْ. ▫
36 مَاشَا نِيثْنِي سّْنِيعْمِيڒنْ زَّاثسْ س ؤُقمُّومْ نْسنْ،
س يِيڒسْ نْسنْ سّْخَارِّيقنْ خَاسْ.
37 وَارْ ثُوغِي ؤُڒْ نْسنْ إِمْثنْ أَكِيذسْ،
وَارْ ؤُيُورنْ س ڒْمَانثْ أَكْ-ذ ڒْعَاهْذْ نّسْ.
38 نتَّا مَاشَا ثُوغَا يَارحّمْ ذَايْسنْ ؤُ إِفْذَا ڒْمُوعْصِييّثْ،
وَارْ يَاردّدْجْ، مَاشَا أَطَّاسْ ن ثْوَاڒَاوِينْ إِجَّا زڭْ وغْضَابْ نّسْ،
ؤُ وَارْ إِسّكَّارْ مَارَّا أَسْعَارْ نّسْ.
39 نتَّا إِعْقڒْ أَقَا نِيثْنِي مْغِيرْ ذ أَيْسُومْ وَاهَا،
ذ إِجّْ ن ؤُسمِّيضْ إِعدُّو وَارْ د-إِتّْعِيقِّيبْ.
40 مشْحَاڒْ ن ثْوَاڒَاوِينْ سْعَارنْ ث ذِي ڒخْڒَا،
ڭِّينْ أَسْ ڒحْرِيقْ ذِي ثْنزْرُوفْثْ!
41 ثْوَاڒَا أَوَارْنِي ثنّغْنِيثْ قدْجْبنْ أَربِّي،
ڭِّينْ ڒحْرِيقْ إِ ؤُمْقدَّاسْ ن إِسْرَائِيل.
42 وَارْ خَارّْصنْ شَا عَاذْ ذڭْ ؤُفُوسْ نّسْ،
ذڭْ وَاسّْ نِّي ڒَامِي ثنْ إِفْذَا زڭْ ؤُفُوسْ ن يِيجّنْ إِ-ثنْ إِحْصَارنْ، ▫
43 أَڒَامِي إِڭَّا ڒعْڒَامَاثْ ذِي مِيصْرَا ،
ؤُڒَا ذ لْمُوعْجِيزَاثْ نّسْ ذڭْ إِيَّارْ ن صُوعَانْ،
44 أَڒَامِي إِڭَّا إِغزْرَانْ نْسنْ أَذْ ذوْڒنْ ذ إِذَامّنْ،
ؤُڒَا ذ مَارَّا ڒْعُونْصَارَاثْ نْسنْ،
حِيمَا نِيثْنِي وَارْ زمَّارنْ أَذْ زَّايْسنْ سْونْ عَاذْ. ▪
45 إِسّكّْ جَارْ أَسنْ إِجّْ ن ويْڒَافْ ن إِبعَّاشْ إِ ثنْ إِشّنْ،
ؤُڒَا ذ إِقَارْقْرِيونْ نِّي ثنْ إِثحَّانْ. ▪
46 نتَّا إِوْشَا ڒْغِيدْجثْ نْسنْ إِ ثْمُوغْرِي إِصَارّْضنْ،
ؤُڒَا ذ صَّابثْ نْسنْ إِ ثْمُوغْرِي. ▪
47 إِنْغَا ثَازَايَارْثْ نْسنْ س ثبْرُورِّي،
ؤُڒَا ذ إِزمُّورنْ نْسنْ س إِبْقُوقنْ إِمقّْرَاننْ ن ثبْرُورِي. ▪
48 نتَّا إِجَّا ڒْمَاڒْ نْسنْ إِ ؤُبْرُورِي،
ثِيحِيمْرِيوِينْ نْسنْ إِ وَاسَّامنْ.
49 نتَّا إِسّكّْ ڒْحَاذُوقْ ن وغْضَابْ نّسْ جَارْ أَسنْ،
أَمُوزَّارْ ذ ثفْقحْثْ ذ ڒْحصْرَانْ،
ؤُمِي د-إِسّكّْ لْمَالَاكَاثْ س جّْرَايحْ.
50 نتَّا إِسڭّمْ إِجّْ ن ؤُمسْرَاقْ إِ وغْضَابْ نّسْ،
وَارْ إِسّْعِيزّْ خْ ڒعْمَارْ نْسنْ زِي ڒْموْثْ،
إِسّعْذُو ڒْمَاڒْ نْسنْ إِ طَّاعُونْ. ▪
51 نتَّا إِنْغَا مَارَّا إِمنْزَا ذِي مِيصْرَا،
أَمزْوَارُو ن ثْزمَّارْ ن ثرْيَاسْثْ ذڭْ إِقِيضَانْ ن حَامْ. ▪
52 إِڭَّا ڒْڭنْسْ نّسْ أَذْ إِسّْڭعّذْ أَمْ وُودْجِي،
إِسّْقبّضْ إِ-ثنْ أَمْ إِشْثْ ن ثْحِيمَارْثْ ذِي ڒخْڒَا.
53 إِنْذهْ إِ-ثنْ ذِي ڒَامَانْ، وَارْ ڭّْوِيذنْ وَالُو،
مَاغَارْ ڒبْحَارْ إِذْڒَا ڒْعذْيَانْ نْسنْ. ▪
54 إِوْيِي ثنْ غَارْ ثمُّورْثْ ن زَّاوشْثْ نّسْ إِقدّْسنْ،
غَارْ وذْرَارْ-أَ نِّي ذ إِكْسبْ ؤُفُوسْ أَفُوسِي نّسْ.
55 إِسُّوفّغْ ڒڭْنُوسْ زَّاثْ إِ وُوذمْ نْسنْ،
ؤُ إِڭَّا أَذْ أَسنْ د-ثكَّارْ ثسْغَارْثْ نْسنْ س ؤُفِيڒُو ن ڒعْبَارْ،
ؤُ إِسّزْذغْ ثِيقبَّاڒْ ن إِسْرَائِيل ذڭْ إِقِيضَانْ نْسنْ. ▪
56 مَاشَا نِيثْنِي قدْجْبنْ ث ؤُ سْعَارنْ أَربِّي، أَمْعُودْجِي خْ كُوڒْشِي،
وَارْ هْضِينْ شّْهَاذَاثْ نّسْ.
57 نِيثْنِي ذوْڒنْ غَارْ ضفَّارْ،
ڭِّينْ س ڒغْذَارْ أَمْ إِبَابَاثنْ نْسنْ.
نِيثْنِي ودَّارنْ أَمْ إِشْثْ ن فْڒِيثْشَا ن ڒْقوْسْ إِ إِثفّْغنْ س ڒخْذعْ.
58 سْعَارنْ ث س ڒڭْعُوذِي نْسنْ إِ خْ وهّْبنْ ثِيغَارْصَا،
أَرِّينْ ث أَذْ يَاسمْ س ڒخْيَاڒَاثْ نْسنْ إِنقْشنْ ▪
59 أَربِّي إِسْڒَا مَانْ أَيَا ؤُشَا إِتّْوَاسَارْغْ وغْضَابْ نّسْ،
إِذْوڒْ إِعِيفّْ أَطَّاسْ زِي إِسْرَائِيل.
60 نتَّا إِجَّا ثَازذِّيغْثْ نّسْ ذِي شِيلُو،
أَقِيضُونْ مَانِي ثُوغَا إِزدّغْ جَارْ إِوْذَانْ.
61 نتَّا يَارَّا جّهْذْ نّسْ غَارْ ثْمحْبَاسْثْ،
ؤُڒَا ذ ثَالْوِيزْثْ نّسْ غَارْ ؤُفُوسْ ن ونِّي ث إِحصَّارنْ. ▪
62 نتَّا إِسلّمْ ڒْڭنْسْ نّسْ إِ سِّيفْ،
يَارْغَا وغْضَابْ نّسْ خْ ثسْغَارْثْ نّسْ.
63 ثِيمسِّي ثشَّا إِحُوذْرِييّنْ نْسنْ،
ثِيعْزَارِييِّينْ نْسنْ وَارْ خَاسنْثْ د-إِوْينْ إِغنِّيجنْ.
64 إِكهَّاننْ نْسنْ وْضَانْ س سِّيفْ،
ؤُ ثِيجَّاڒْ نْسنْ وَارْ رُونْثْ شَا. ▪
65 خنِّي إِفَاقْ-د سِيذِي إِنُو أَمشْنَاوْ شَا ن إِجّْ إِ ثُوغَا إِطّْصنْ،
أَمشْنَاوْ إِجّْ ن بُو-ثغْرُوضْثْ نِّي إِسْغُويُّو زِي بِينُو.
66 نتَّا إِوْثَا ونِّي ث إِحصَّارنْ غَارْ ضفَّارْ،
إِڭَّا ذَايْسنْ ڒفْضِيحثْ إِ ڒبْذَا. ▪
67 أَقِيضُونْ ن يُوسُوفْ إِنْضَارْ إِ-ث،
ثَاقْبِيتْشْ ن إِفْرَايِيمْ وَارْ ت إِفَارْزْ.
68 إِفَارْزْ ثَاقْبِيتْشْ ن يَاهُوذَا،
أَذْرَارْ ن صِيهْيُونْ ونِّي ثُوغَا إِتّخْسْ.
69 إِبْنَا زَّاوشْثْ نّسْ إِقدّْسنْ أَمْ إِجنْوَانْ يُوعْڒَانْ،
أَمْ ثمُّورْثْ نِّي إِسّمْثنْ إِ ڒبْذَا.
70 إِفَارْزْ أَمْسخَّارْ نّسْ ذَاوُوذْ،
إِكْسِي ث زِي ڒْكُورِيثْ ن وُودْجِي. ▪
71 إِجَّا إِ-ث أَذْ د-يَاسْ زِي غَارْ ضفَّارْ ن وُودْجِي،
مَاحنْذْ أَذْ يَارْوسْ يَاعْقُوبْ، ڒْڭنْسْ نّسْ،
ؤُڒَا ذ إِسْرَائِيل، ڒْوَارْثْ نّسْ. ▪
72 نتَّا يَارْوسْ إِ-ثنْ عْلَاحْسَابْ ڒصْفَايثْ ن وُوڒْ نّسْ،
إِڭوّذْ إِ-ثنْ س ؤُفُوسْ إِزمَّارنْ.