أَذْلِيسْ وِيسّْ ثْڒَاثَا: إِزهِّيذنْ 73-89
73
1 أَزهّذْ ن أَسَافْ. وَاهْ، أَربِّي ذ أَصبْحَانْ إِ إِسْرَائِيل، إِ ينِّي س وُوڒْ إِصْفَانْ.
2 نشّْ مَاشَا، عْڒَاحَاڒْ ثُوغَا إِضَارنْ إِنُو فّْغنْ زڭْ وبْرِيذْ،
وَارْ إِقِّيمْ وَالُو أَذْ حْڒُودْجْضنْ إِصُورَافْ إِنُو.
3 مَاغَارْ ثُوغَا ؤُسْمغْ زڭْ إِپُوهَاڒِييّنْ،
ڒَامِي ژْرِيغْ أَقَا إِعفَّاننْ مْلِيحْ إِ دْجَانْ. ▪
4 مَاغَارْ وَارْ ذِينْ بُو إِشذِّيينْ غَارْ ڒْموْثْ نْسنْ،
ؤُ صُّولْطَا نْسنْ أَقَا إِبدّْ نِيشَانْ.
5 نِيثْنِي وَارْ شَارّْشنْ ذڭْ وَارْبرْ ن إِوْذَانْ،
وَارْ تّْوَاڒقّْفنْ أَمْ وزْينْ أَمقّْرَانْ ن بْنَاذمْ.
6 س ؤُينِّي ثتَّايڒْ أَسنْ-د نّْفَاخثْ أَمْ ثْسدّشْثْ غَارْ يِيرِي نْسنْ،
ؤُشَا إِڒحّفْ أَسنْ لْعُونْفْ أَمْ إِجّْ ن وَارُّوضْ.
7 ثِيطَّاوِينْ نْسنْ تّْوَافّْغنْثْ زِي ثَاذُونْثْ،
عدُّونْ ڒخْيَاڒَاثْ ن وُوڒْ نْسنْ.
8 نِيثْنِي سْثهْزَانْ ؤُ س بْطَايْطَايْ سَّاوَاڒنْ خْ ڒْغَارْ، خْ دّدْجْ،
أَقَا سَّاوَاڒنْ-د زِي سنّجْ.
9 نِيثْنِي أَرزّْمنْ ؤُقمُّومْ نْسنْ خْ ؤُجنَّا،
ڒْهَارْذْ نْسنْ إِڭُّورْ خْ ثمُّورْثْ.
10 س ؤُيَا إِنّقْڒبْ ڒْڭنْسْ نْسنْ غَارْ ذَا،
أَمَانْ إِفيّْضنْ تّْسكَّافنْ ثنْ نِيثْنِي.
11 قَّارنْ: ”مَامّشْ إِ غَا إِسّنْ أَربِّي مَانْ أَيَا؟“
”مَا أَقَا ذِينْ ثُوسّْنَا خْ مَانْ أَيَا غَارْ ؤُمْعُودْجِي خْ كُوڒْشِي؟“
12 خْزَارْ، أَقَا أَثنْ ذ إِعفَّاننْ!
عَاذْ دَّارنْ ڒبْذَا ذِي ڒْهُوذْنثْ،
ؤُ سّْوسْعنْ أَڭْڒَا نْسنْ.
13 س ثِيذتّْ، أَمنِّي وَاهَا سِّيزذْڭغْ ؤُڒْ إِنُو،
ؤُ سِّيرْذغْ إِفَاسّنْ إِنُو ذِي ثَازْذُوڭِي.
14 أَسّْ أَمْ إِمُونْ نشّْ ثِييِّيثَا ذَايِي،
كُوڒْ ضّْبحْ ثتّْوَاربِّيغْ.
15 مَاڒَا نِّيغْ: ”أَذْ سِّيوْڒغْ ثَا ذ ثَا!“،
خْزَارْ، إِڒِي غْذَارغْ جِّيڒْ ن إِحنْجِيرنْ نّكْ.
16 إِتّْڒِيغْ أَيِي زمَّارغْ أَذْ فهْمغْ أَيَا،
مَاشَا ذِي ثِيطَّاوِينْ إِنُو إِتَّاوِي-د مْغِيرْ ثَامَارَا إِبطّْڒنْ،
17 غَارسْ أَڒَامِي ؤُذْفغْ غَارْ ثْزَاوِييِّينْ إِقدّْسنْ ن أَربِّي،
ؤُ فهْمغْ ثَانڭَّارُوثْ نْسنْ.
18 وَاهْ، شكْ ثسّْرُوسِيذْ ثنْ خْ إِمُوشَانْ إِتّحْرُودْجُوضنْ،
شكْ ثْغطّْڒذْ ثنْ ذ ڒْخِيرْبَاثْ.
19 مَامّشْ ذوْڒنْ تّْوَاردّْدْجنْ ذڭْ إِشْثْ ن ثشْثِي،
تّْوَامْحَانْ ؤُ تّْوَاقْضَانْ س إِشڒْوَاونْ إِسَّاڭّْوَاذنْ.
20 أَمْ ثَارْجِيثْ غَارْ ؤُفَاقِي، أَ سِيذِي إِنُو،
أَمُّو إِ غَا ثسّحْقَارذْ أَبيّنْ ن ڒخْيَاڒْ نْسنْ خْمِي د غَا ثْفَاقذْ.
21 مَاغَارْ ؤُڒْ إِنُو ثُوغَا إِتّْوَاسَارْزڭْ ذِي ڒْوقْثْ نِّي،
إِتّجِّي أَيِي ڒحْرِيقْ ذِي ثِيژَّاڒْ إِنُو. ▫
22 نشّْ ثُوغَا أَيِي ذ أَقفُّوحْ،
ثُوغَا أَيِي أَمْ إِجّْ ن ڒْوحْشْ أَمقّْرَانْ غَاركْ.
23 عَاذْ مَاشَا ڒبْذَا أَقَا أَيِي غَاركْ،
شكْ ثطّْفذْ أَيِي زڭْ ؤُفُوسْ أَفُوسِي إِنُو.
24 شكْ أَذْ أَيِي ثْڭوّْذذْ س شّْوَارْ نّكْ،
ؤُ أَوَارْنِي مَانْ أَيَا أَذْ أَيِي ثكْسِيذْ غَارْ ؤُعُودْجِي نّكْ.
25 مَانْ ونْ إِ غَارِي ذڭْ ؤُجنَّا حَاشَا شكْ؟
أَكِيذكْ وَارْ ثْزمَّارْ ؤُڒَا ذ إِشْثْ ن ثْمسْڒَاشْثْ ذِي ثمُّورْثْ أَذْ أَيِي ثَارْضَا.
26 مَاڒَا أَرِّيمثْ ذ وُوڒْ إِنُو سمّْحنْ ذَايِي،
خنِّي أَربِّي ذ ثَاصْضَارْثْ ن وُوڒْ إِنُو ذ ثَاسْغَارْثْ إِنُو إِ ڒبْذَا.
27 مَاغَارْ خْزَارْ، إِنِّي زَّايكْ إِتّڭّْوجنْ، أَذْ فْنَانْ.
كُوڒْ إِجّْ ونِّي خَاكْ إِتّْحيَّاذنْ أَمْ إِ غَا إِسّفْسذْ إِخفْ نّسْ،
أَذْ ث ثْكحّضذْ.
28 نشّْ مَاشَا، ڒْذَاسثْ إِ أَربِّي ذ مْلِيحْ إِ نشّْ.
نشّْ ڭِّيغْ سِيذِي إِنُو، سِيذِي، ذ أَمْشَانْ إِنُو ن ثَاروْڒَا،
حِيمَا أَذْ بَارّْحغْ مَارَّا ثِيمڭَّا نّكْ.