‏1 إِ سُولِيمَانْ.

أَ أَربِّي، أوْشْ إِ ؤُجدْجِيذْ مَاحنْذْ أَذْ إِحْكمْ عْلَاحْسَابْ ڒْحقّْ نّكْ،

ؤُ أوْشْ ثَاسڭْذَا نّكْ إِ مِّيسْ ن ؤُجدْجِيذْ.

‏2 خنِّي نتَّا أَذْ إِحَاكمْ ڒْڭنْسْ نّكْ س ثْسڭْذَا،

ڒْمُوسَاكِينْ نّكْ س ڒْحقّْ.

‏3 إِذُورَارْ أَذْ إِوْينْ ڒهْنَا إِ ڒْڭنْسْ،

ؤُڒَا ذ ثِيوْرِيرِينْ س ثْسڭْذَا.

‏4 نتَّا أَذْ يَاغْ إِ ثسْغَارْثْ ن ڒْمُوسَاكِينْ ن ڒْڭنْسْ،

أَذْ إِسّنْجمْ ثَارْوَا ن إِمزْڒَاضْ،

ؤُ أَذْ إِڒْبزْ ونِّي ثنْ إِحصَّارنْ.

‏5 نِيثْنِي أَذْ زَّايكْ ڭّْوذنْ مِينْ غَا ثكّْ ثْفُوشْثْ ثدْجْ،

ؤُ ثَازِيرِي أَذْ ثسّْشنْ ؤُذمْ نّسْ، زِي جِّيڒْ أَڒْ جِّيڒْ. ^▪  

‏6 نتَّا أَذْ د-إِهْوَا خْ أَرّْبِيعْ إِوجْذنْ إِ وحْثَاشْ،

أَمْ ثِينشْنَاشِينْ إِسَّارْضَابنْ ثَامُّورْثْ. ^▪  

‏7 ذڭْ وُوسَّانْ نّسْ أَذْ إِنُّووَارْ ؤُمْسڭّذْ،

أَذْ ذِينْ يِيڒِي ڒهْنَا إِفيّْضنْ أَڒْ غَا ثَافذْ ثَازِيرِي وَارْ ثدْجِي عَاذْ.

‏8 نتَّا أَذْ إِحْكمْ زِي ڒبْحَارْ أَڒْ ڒبْحَارْ،

زڭْ إِغْزَارْ ن لْفُورَاطْ أَڒْ ثِينڭُّورَا ن ثمُّورْثْ.

‏9 إِمزْذَاغْ نْ ڒخْڒَا أَذْ قُّونْجڒنْ زَّاثسْ،

مَاشَا ڒْعذْيَانْ نّسْ أَذْ ڒسْحنْ ؤُشَاڒْ.

‏10 إِجدْجِيذنْ ن ثَارْشِيشْ أَذْ د-إِوْينْ إِشْثْ ن ثوْهِيبْثْ،

إِجدْجِيذنْ ن شَابَا ذ سَابَا أَذْ د-قَارّْبنْ ثَارْزفِينْ.

‏11 مَارَّا إِجدْجِيذنْ أَذْ أَسْ أَضَارنْ،

مَارَّا ڒڭْنُوسْ أَذْ أَسْ سخَّارنْ.

‏12 مَاغَارْ نتَّا أَذْ إِفكّْ أَمزْڒُوضْ ونِّي غَارسْ إِتّْڒَاغَانْ،

ؤُڒَا ذ ڒْمسْكِينْ ذ ونِّي وَارْ غَارسْ أَمْعَاونْ. ^▪  

‏13 نتَّا أَذْ إِعْثقْ أَمَارْخُو ذ ؤُمزْڒُوضْ،

نتَّا أَذْ إِسّنْجمْ ڒعْمَارْ ن إِمزْڒَاضْ. ^▫  

‏14 نتَّا أَذْ إِفكّْ ڒعْمُورْ نْسنْ زِي دّدْجْ ذ لْعُونْفْ،

إِذَامّنْ نْسنْ أَذْ سكّْوَانْ أَطَّاسْ ذِي ثِيطَّاوِينْ نّسْ.

‏15 نتَّا أَذْ إِدَّارْ ؤُ أَذْ أَسْ إِمّوْشْ وُورغْ زِي شَابَا.

ؤُ وَانِيثَا أَذْ إِژَّادْجْ ڒبْذَا ذِي طّْوعْ نّسْ،

أَسّْ مَارَّا أَذْ ث إِبَاركْ.

‏16 أَذْ يِيڒِي إِجّْ ن ؤُفيّضْ ن إِمنْذِي ذِي ثمُّورْثْ خْ ثْقِيشَّاثْ ن إِذُورَارْ،

ڒْغِيدْجثْ نّسْ أَذْ ثنْهزّْ أَمْ ثْشجِّيرَا ن لُوبْنَانْ،

ؤُ إِنِّي زِي ثنْذِينْثْ أَذْ نُّووَارنْ أَمْ أَغمُّويْ أَزِيزَا ذِي ثمُّورْثْ.

‏17 إِسمْ نّسْ أَذْ إِقِّيمْ إِ ڒبْذَا،

إِڒِي أَذْ إِنُّووَارْ إِسمْ نّسْ زَّاثْ إِ وُوذمْ ن ثْفُوشْثْ.

أَذْ ذَايسْ تّْوَابَارْكنْ نِيثْنِي،

مَارَّا ڒڭْنُوسْ أَذْ ث سّمْغَارنْ.

‏18 أَذْ إِتّْوَابَاركْ سِيذِي أَربِّي، أَربِّي ن إِسْرَائِيل.

نتَّا إِتّڭّْ لْمُوعْجِيزَاثْ، نتَّا وَاهَا.

‏19 أَذْ إِتّْوَابَاركْ إِسمْ ن ؤُعُودْجِي نّسْ إِ ڒبْذَا.

أَذْ ثتّْوَاشُّورْ مَارَّا ثَامُّورْثْ س ؤُعُودْجِي نّسْ. أَمِينْ، وَاهْ، أَمِينْ.

‏20 ثِيژِيدْجَاثِينْ ن ذَاوُوذْ، مِّيسْ ن يَاسَّا، أَقَا كمّْڒنْثْ.