71
1 نشّْ تّْشَاڒغْ خَاكْ، أَ سِيذِي، أجّْ أَيِي عمَّارْصْ وَارْ تّْسضْحِيغْ إِ ڒبْذَا. ▪
2 فكّْ أَيِي س ثْسڭْذَا نّكْ ؤُ أَرْخُو أَيِي.
أَرّْ-د غَارِي أَمزُّوغْ نّكْ ؤُ سنْجمْ أَيِي.
3 إِڒِي ذ إِشْثْ ن ثصْضَارْثْ إِ ثْزذِّيغْثْ إِ نشّْ،
حِيمَا أَذْ غَارسْ د-أَسغْ ڒبْذَا.
شكْ ثْوصِّيذْ حِيمَا أَذْ تّْوَاسْنجْمغْ،
مَاغَارْ شكْ ذ جَّارْفْ إِنُو ذ لْپُورْجْ إِنُو.
4 أَربِّي إِنُو، سنْجمْ أَيِي زڭْ ؤُفُوسْ ن ؤُعفَّانْ،
زڭْ ؤُفُوسْ ن مِّيسْ ن ڒْمُوعْصِييّثْ ؤُ زِي بُو-غزُّو.
5 مَاغَارْ شكْ ذ أَسِيثمْ إِنُو، سِيذِي إِنُو، سِيذِي،
شكْ ذ أَثشْڒِي إِنُو زِي ثمْژِي إِنُو.
6 زڭْ ؤُعذِّيسْ ن يمَّا، ثُوغَا أَيِي عمّْذغْ خَاكْ،
زڭْ وَامِي د-فّْغغْ زڭْ ؤُعذِّيسْ ن يمَّا،
أَقَا شكْ ذ أَمْعَاونْ إِنُو، نشّْ صبْحغْ شكْ ڒبْذَا.
7 إِ وَاطَّاسْ نشّْ أَمْ إِشْثْ نْ ڒعْڒَامثْ،
مَاشَا شكْ ذ أَمْشَانْ إِنُو إِجْهذْ إِ ثَاروْڒَا.
8 أجّْ أَقمُّومْ إِنُو أَذْ إِشُّورْ س ؤُصبّحْ نّكْ،
أَسّْ إِمُونْ س شَّانْ نّكْ.
9 وَارْ خَافِي تّْمنْضَارْ ذڭْ وُوسَّانْ ن ثوْسَارْ إِنُو،
وَارْ ذ أَيِي سمّحْ مَاڒَا جّهْذْ إِنُو إِرُوحْ. ▫
10 مَاغَارْ ڒْعذْيَانْ إِنُو سَّاوَاڒنْ خَافِي،
إِنِّي يَارزُّونْ ڒعْمَارْ إِنُو، مْشَاوَارنْ جْمِيعْ.
11 نِيثْنِي قَّارنْ: ”أَربِّي إِسْمحْ ذَايسْ.
ضْفَارمْ ث ؤُ منْعمْ ث، مَاغَارْ وَارْ ذِينْ بُو ؤُمْسنْجمْ.“
12 أَ أَربِّي، وَارْ تّْغِيمِي ثِيڭّْوجذْ خَافِي،
أَ أَربِّي إِنُو، أوْشْ أَيِي ذغْيَا أَفُوسْ.
13 أجّْ إِغْرِيمنْ ن ثُوذَارْثْ إِنُو أَذْ تّْوَاسضْحَانْ ؤُ أَذْ تّْوَاشّنْ،
أجّْ إِنِّي يَارزُّونْ أَذْ أَيِي ڭّنْ ڒْغَارْ أَذْ تّْوَاذْڒنْ س ؤُسحْقَارْ ذ ڒفْضِيحثْ. ▪
14 نشّْ مَاشَا أَذْ قِّيمغْ تّْرَاجِيغْ ڒبْذَا،
ؤُ أَذْ أَرْنِيغْ عَاذْ غَارْ ؤُصبّحْ نّكْ.
15 أَقمُّومْ إِنُو أَذْ إِبَارّحْ س ثْسڭْذَا نّكْ،
أَسنْجمْ نّكْ، أَسّْ إِمُونْ،
مَاغَارْ وَارْ سِّينغْ ڒْقدّْ نّسْ.
16 نشّْ أَذْ د-أَسغْ س ثْمڭَّا ثِيمقّْرَانِينْ ن سِيذِي إِنُو، سِيذِي،
أَذْ إِذَارغْ ثَاسڭْذَا نّكْ، مْغِيرْ ثنِّي نّكْ وَاهَا.
17 أَ أَربِّي، شكْ ثُوغَا ثسّڒْمَاذذْ أَيِي زِي ثمْژِي إِنُو،
ؤُ نشّْ غَارسْ أَڒْ أَسّْ-أَ تّْبَارّْحغْ س لْمُوعْجِيزَاثْ نّكْ.
18 أَ أَربِّي، وَارْ ذ أَيِي سمّحْ شَا، وَاخَّا وْسَارغْ شَابغْ،
أَڒْ إِ غَا حَاجِيغْ إِ جِّيڒْ-أَ خْ ثْمڭَّا ن ؤُفُوسْ نّكْ ؤُڒَا خْ ثْمڭَّا نّكْ ثِيمقّْرَانِينْ،
إِ مَارَّا مِينْ إِ د غَا يَاسنْ.
19 أَ أَربِّي، ثَاسڭْذَا نّكْ ثِيوضْ غَارسْ أَڒْ سنّجْ قَاعْ،
مَاغَارْ شكْ ثڭِّيذْ ثِيمڭَّا ثِيمقّْرَانِينْ!
أَ أَربِّي، مَانْ ونْ إِدْجَانْ أَمْ شكْ!
20 أَقَا شكْ ثجِّيذْ ثكَّا خَافِي أَطَّاسْ ن ڒحْصَارَاثْ ذ ڒْغَارْ،
وَاخَّا أَمنِّي شكْ أَذْ أَيِي ثسّدَّارذْ عَاوذْ،
شكْ أَذْ أَيِي ثسُّوفّْغذْ زڭْ وَامَانْ يُودْجْغنْ ن ثمُّورْثْ.
21 شكْ أَذْ ثَارِّيذْ ڒمْغَارثْ إِنُو أَذْ ثمْغَارْ،
أَذْ أَيِي د-ثنّْضذْ س ؤُفوّجْ نّكْ.
22 أَذْ شكْ قَاذِيغْ عَاوذْ س لْهَارْبَا، خْ ڒَامَانْ نّكْ، أَ أَربِّي.
أَذْ شكْ زهّْذغْ س ڒْڭَامْبْرِي، أَ أَمْقدَّاسْ ن إِسْرَائِيل.
23 إِينْشِيشنْ إِنُو أَذْ سْڒِيوْڒونْ، أَقَا أَذْ زهّْذغْ إِ شكْ،
ؤُڒَا ذ ڒعْمَارْ إِنُو نِّي ثفْذِيذْ شكْ.
24 ؤُڒَا ذ إِڒسْ إِنُو أَذْ إِحَاجَا خْ ثْسڭْذَا نّكْ أَسّْ مَارَّا،
مَاغَارْ إِنِّي يَارزُّونْ أَذْ أَيِي ڭّنْ ڒْغَارْ، سّْنُوفَارنْ إِخفْ نْسنْ،
إِوَا، تّْوَافضْحنْ.