69
1 إِ ؤُمقّْرَانْ ن إِمغْنَاجنْ. س ثغْنِينْثْ ن ’ثْلِيلِّيشِينْ‘. ن ذَاوُوذْ. ▫ 2 سنْجمْ أَيِي، أَ أَربِّي، مَاغَارْ أَمَانْ إِوْضنْ أَيِي غَارْ ڒعْمَارْ إِنُو.
3 نشّْ غبِّيغْ ذڭْ ؤُبَارْيُوضْ يُودْجغْ، وَارْ ذِينْ مَانِي إِ غَا بدّغْ.
أَقَا-يِي ذڭْ وَامَانْ يُودْجْغنْ ؤُ ڒْحمْڒثْ ثتَّازّڒْ خَافِي.
4 نشّْ ؤُحْڒغْ س إِغُويَّانْ، ثْمِيجَّا إِنُو ثبُّويْبحْ،
ثِيطَّاوِينْ إِنُو قْضَانْثْ زڭْ ؤُرَاجِي خْ أَربِّي إِنُو.
5 إِنِّي ذ أَيِي إِشَارّْهنْ خْ وَالُو تّْوسْعنْ خْ ؤُشوَّافْ إِ إِدْجَانْ خْ ؤُزدْجِيفْ إِنُو.
إِنِّي يَارزُّونْ أَذْ أَيِي أَردّْدْجنْ، ڒْعذْيَانْ إِنُو إِ خَافِي إِسّْخَارِّيقنْ، ذوْڒنْ جهّْذنْ.
مِينْ وَارْ ؤُشَارغْ، إِتّْخصَّا أَيِي أَذْ ت-إِ-د أَرّغْ عَاذْ.
6 أَ أَربِّي، شكْ ثسّْنذْ ثُوبُّوهڒْيَا إِنُو،
إِمرْوُوسَا ن دّْنُوبْ إِنُو وَارْ خَاكْ فَّارنْ.
7 أجّْ إِنِّي خَاكْ إِسِّيثِيمنْ، وَارْ تّْسضْحِينْ،
أَ سِيذِي إِنُو، سِيذِي ن ڒْعسْكَارَاثْ،
أجّْ إِنِّي خَاكْ يَارزُّونْ، وَارْ زَّايِي تّْوَافطّْحنْ،
أَ أَربِّي ن إِسْرَائِيل.
8 مَاغَارْ ذِي طّْوعْ نّكْ إِ كسِّيغْ أَسحْقَارْ،
أَسضْحِي إِڒحّفْ إِ ؤُغمْپُوبْ إِنُو.
9 ذوْڒغْ ذ أَغْرِيبْ غَارْ أَيْثْمَا،
إِ إِحنْجِيرنْ ن يمَّا ذوْڒغْ ذ أَبَارَّانِي.
10 مَاغَارْ شْضَارثْ إِ ثَادَّارْثْ نّكْ ثشَّا أَيِي،
أَسحْقَارْ ن يِينِّي شكْ إِسّحْقَارَانْ إِوْضَا-د خَافِي. ▪
11 نشّْ رُوغْ غَارْ ؤُژُومِّي ن ڒعْمَارْ إِنُو،
مَاشَا أَيَا يِيوِي أَيِي-د عْڒَامْ كُوڒْ أَسحْقَارْ.
12 نشّْ يَارْضغْ إِشْثْ ن ثْخَانْشثْ ن وشْضَانْ،
مَاشَا ذوْڒغْ أَسنْ ذ إِجّْ ن لْمَاثَالْ.
13 إِنِّي إِقِّيمنْ غَارْ ثوَّارْثْ ن ثنْذِينْثْ سَّاوَاڒنْ خَافِي،
ؤُڒَا ذ إِزْڒَانْ ن يِينِّي إِسّسّنْ شّْرَابْ.
14 نشّْ مَاشَا تّتَّارْغْ غَاركْ، أَ سِيذِي!
أَقَا ذِينْ إِجّْ ن ڒْوقْثْ ن ؤُحِينِّي، أَ أَربِّي،
س ڒمْغَارثْ ن ثْمخْسِيوْثْ نّكْ إِشوَّارنْ.
أَرّْ-د خَافِي س ؤُسنْجمْ نّكْ إِ د-إِفّْغنْ زِي ڒْمَانثْ نّكْ.
15 جْبذْ أَيِي-د زڭْ ؤُبَارْيُوضْ ؤُ أجّْ أَيِي وَارْ تّْغبِّيغْ،
حِيمَا أَذْ تّْوَافكّغْ زڭْ إِنِّي ذ أَيِي إِشَارّْهنْ ؤُ زڭْ وَامَانْ يُودْجْغنْ.
16 وَارْ تّجِّي أَذْ أَيِي ثَاوِي ڒْحمْڒثْ،
وَارْ تّجِّي ڒَادْجَاغْ أَذْ أَيِي إِسَارْضْ،
ؤُشَا أَنُو أَذْ خَافِي إِبلّعْ أَقمُّومْ نّسْ.
17 أَرّْ أَيِي-د، أَ سِيذِي، مَاغَارْ ثَامخْسِيوْثْ نّكْ إِشوَّارنْ ثصْبحْ.
قْڒبْ غَارِي عْلَاحْصَابْ أَرّحْمثْ نّكْ إِفيّْضنْ.
18 وَارْ تّفَّارْ شَا ؤُذمْ نّكْ خْ ؤُمْسخَّارْ نّكْ،
مَاغَارْ تّْوَاحْصَارغْ.
أَرّْ أَيِي-د ذَاوحْذَا.
19 أَذسْ أَيِي-د غَارْ ڒعْمَارْ إِنُو، فكّْ إِ-ث.
فْذِي أَيِي ذِي سِّيبّثْ ن ڒْعذْيَانْ إِنُو.
20 شكْ ثسّْنذْ ڒْعَارْ إِنُو ذ ؤُسضْحِي إِنُو ذ ڒفْضِيحثْ إِنُو،
أَقَا مَارَّا إِنِّي ذ أَيِي إِحصَّارنْ بدّنْ زَّاثكْ.
21 أَسحْقَارْ يَارْژْ أَيِي ؤُڒْ ؤُ نشّْ قنْضغْ أَطَّاسْ.
نشّْ رَاجِيغْ أَزِيدْجزْ، مَاشَا وَالُو، ؤُ رَاجِيغْ إِنِّي ذ أَيِي غَا إِعزَّانْ،
مَاشَا وَارْ ؤُفِيغْ ؤُڒَا ذ إِجّنْ.
22 نِيثْنِي ڭِّينْ سّمْ ذِي مَاشَّا إِنُو،
ؤُ إِ ؤُفَاذِي إِنُو ڭِّينْ أَيِي أَذْ سْوغْ ڒْخدْجْ. ▪
23 أجّْ طَّابْڒَا نْسنْ أَذْ ثذْوڒْ ذ ڒْفخْ،
ؤُڒَا ذ ثَاخْشفْثْ إِ ينِّي أَكِيذْسنْ إِبدّنْ. ▪
24 سْذَارْغڒْ ثِيطَّاوِينْ نْسنْ حِيمَا وَارْ تّْوِيڒِينْ عَاذْ،
أَرّْ ثِيجْعِينَّاثِينْ نْسنْ أَذْ تّنْهزَّانْثْ ڒبْذَا.▪
25 زدْجعْ خَاسنْ أَسْخضْ نّكْ،
أجّْ ڒْحَاذُوقْ ن وغْضَابْ نّكْ أَذْ ثنْ إِڒْقفْ.
26 أجّْ ڒْمَارْڭحْ ن ثْزذِّيغْثْ نْسنْ أَذْ إِذْوڒْ ذ ڒْخَارْبثْ،
مَاحنْذْ وَارْ ذَايسْ إِزدّغْ عَاذْ ؤُڒَا ذ إِجّنْ. ▪
27 مَاغَارْ نِيثْنِي ذَارَّاشنْ خْ ورْيَازْ نِّي ثُوغَا ثوْثِيذْ شكْ،
ؤُ س ڒْهَارْذْ نْسنْ أَرْنِينْ إِ ڒحْرِيقْ ن يِينِّي زَّايكْ إِتّْوَاڒقّْفنْ.
28 أَرّْ دّنْبْ خْ دّنْبْ نْسنْ،
وَارْ ثنْ تّجِّي أَذْ د-أَذْفنْ غَارْ ثْسڭْذَا نّكْ.
29 أجّْ إِ-ثنْ أَذْ تّْوَامْحَانْ زڭْ وذْلِيسْ ن ثُوذَارْثْ،
ؤُ وَارْ تّْوَازمّمنْ شَا غَارْ إِمْسڭَّاذنْ.
30 مَاشَا نشّْ أَقَا أَيِي ذِي ڒغْبنْ ؤُ قنْضغْ.
إِڒِي أَسنْجمْ نّكْ، أَ أَربِّي، أَذْ أَيِي إِسّْڭعّذْ سنّجْ.
31 نشّْ أَذْ صبّْحغْ إِسمْ ن أَربِّي س يِيجّْ ن يزْڒِي،
س ؤُقَاذِي أَذْ أَسْ سّمْغَارغْ.
32 أَيَا أَذْ يَارْضَا سِيذِي كْثَارْ زڭْ إِجّْ ن ؤُفُونَاسْ،
زڭْ إِجّْ ن ؤُينْذُوزْ س وَاشَّاونْ ذ ثشْضشْثْ إِمّْسبْضَانْ.
33 إِمْهِيننْ إِنِّي ت إِژْرِينْ، أَذْ فَارْحنْ،
ؤُ إِنِّي يَارزُّونْ خْ أَربِّي،
أَقَا ؤُڒْ نْومْ أَذْ إِدَّارْ.
34 مَاغَارْ سِيذِي إِتّسْڒَا غَارْ إِمزْڒَاضْ،
وَارْ إِسّحْقِيرِي شَا إِمحْبَاسْ نّسْ.
35 أجّْ إِجنْوَانْ ذ ثمُّورْثْ أَذْ ث سّمْغَارنْ،
ڒبْحُورْ ذ مَارَّا مِينْ ذَايْسنْ إِتّنْهزَّانْ.
36 مَاغَارْ أَربِّي أَذْ إِسّنْجمْ صِيهْيُونْ،
أَذْ إِبْنَا عَاوذْ ثِيندَّامْ ن يَاهُوذَا،
ؤُ نِيثْنِي أَذْ ذِينْ زذْغنْ ؤُ أَذْ ت طّْفنْ ذ ڒْوَارْثْ.
37 زَّارِيعثْ ن إِمْسخَّارنْ نّسْ أَذْ ت ثطّفْ ذ ثَاسْغَارْثْ،
إِنِّي إِتّخْسنْ إِسمْ نّسْ أَذْ ذَايسْ زذْغنْ.