68
1 إِ ؤُمقّْرَانْ ن إِمغْنَاجنْ. ن ذَاوُوذْ. أَزهّذْ. إِزْڒِي. 2 أَربِّي أَذْ إِكَّارْ، ڒْعذْيَانْ نّسْ أَذْ تّْوَاريّْشنْ،
إِنِّي ث إِشَارّْهنْ أَذْ أَروْڒنْ زَّاثْ إِ وُوذمْ نّسْ. ▪
3 شكْ أَذْ ثنْ ثسِّيڭّْوجذْ أَمْ دّخَّانْ إِطَّاوْ،
أَمْ شّْمعْ إِفسِّي ذِي ثْمسِّي،
أَمُّو إِ غَا فْنَانْ إِعفَّاننْ زَّاثْ إِ وُوذمْ ن أَربِّي.
4 مَاشَا إِمْسڭَّاذنْ أَذْ فَارْحنْ،
أَذْ سْڒِيوْڒِيونْ س ڒفْرَاحثْ زَّاثْ إِ وُوذمْ ن أَربِّي،
ؤُ أَذْ غبَّانْ ڒفْرَاحثْ.
5 غنّْجمْ إِ أَربِّي، زهّْذمْ إِ يِيسمْ نّسْ،
ڭّمْ إِجّْ ن وبْرِيذْ يُوعْڒَانْ إِ ونِّي إِندّْهنْ ذِي ڒوْضَا.
سِيذِي ذ إِسمْ نّسْ.
نڭْزمْ سْ ڒفْرَاحثْ زَّاثْ إِ وُوذمْ نّسْ.
6 بَابَاثْسنْ ن إِيُوجِيڒنْ ذ ڒْقَاضِي ن ثِيجَّاڒْ،
أَمُّو إِ يدْجْ أَربِّي ذِي ثْزذِّيغْثْ نّسْ إِقدّْسنْ، ▫
7 أَمُّو إِ يدْجْ أَربِّي ونِّي إِسّزْذْغنْ إِنِّي وحّذْسنْ
ذڭْ إِشْثْ ن ثْوَاشُونْثْ،
ونِّي إِسُّوفُّوغنْ إِمحْبَاسْ س ؤُفْڒَاحْ،
مَاشَا إِمْغوَّاغنْ أَذْ زذْغنْ
ذڭْ إِشْثْ ن ثمُّورْثْ إِتّْوَاسْشمْضنْ زِي ثْفُوشْثْ.
8 أَ أَربِّي، أَڒَامِي ثِيزَّارذْ زَّاثْ إِ وُوذمْ ن ڒْڭنْسْ نّكْ،
أَڒَامِي ثُوغَا ثڭُّورذْ ذِي ثْنزْرُوفْثْ، - سِيلَاهْ - ،
9 ثنْهزّْ ثمُّورْثْ ؤُشَا ؤُشْرُورنْ إِجنْوَانْ، زَّاثْ إِ وُوذمْ ن أَربِّي،
ؤُڒَا ذ أَذْرَارْ ن سِينَا إِنْهزّْ زَّاثْ إِ وُوذمْ ن أَربِّي، أَربِّي ن إِسْرَائِيل. ▫ ▪
10 أَكْ-ذ ونْژَارْ إِفْسُوسنْ، ثْرُوشّذْ ثَامُّورْثْ، أَيَا، أَربِّي،
خْمِي إِ غَا إِسْڒَاوْ ڒْوَارْثْ نّكْ، ثوْشِيذْ أَسْ شكْ عَاوذْ جّهْذْ.
11 ثَاحِيمَارْثْ نّكْ ثُوغَا ثْزدّغْ ذَايسْ.
س ثْشُونِي نّكْ ثسّْوجْذذْ ت إِ ڒْمسْكِينْ، أَيَا، أَربِّي! ▫
12 سِيذِي إِنُو إِوْشَا أَوَاڒْ.
ثِيمْغَارِينْ نِّي د-إِتَّاوْينْ ڒخْبَارْ أَصبْحَانْ تّْكوّْننْثْ إِجّْ ن ؤُبَارُّو أَمقّْرَانْ ن ثْرقَّاسِينْ.
13 إِجدْجِيذنْ ن ڒْعسْكَارَاثْ تّْرَاكّْوَاڒنْ، أَقَا تّْرَاكّْوَاڒنْ،
ؤُ ثنِّي إِقِّيمنْ ذِي ثَادَّارْثْ، ثْبطَّا ثَاكشَّاضْثْ. ▫
14 خنِّي أَذْ ثْپُوزّْڒمْ جَارْ ثْنَاينْ ن إِفْرَاينْ،
أَمْ وذْبِيرْ س وَافْرِيونْ تّْوَاڒحّْفنْ س نُّوقَارْثْ،
ؤُ أَرِّيشْ نّسْ س وُورغْ أَزِيزَا إِتِّيسِّيقنْ.
15 ڒَامِي أَمْزمَّارْ خْ كُوڒْشِي إِسَّاريّشْ إِجدْجِيذنْ ذِي ثمُّورْثْ،
إِشَّاثْ وذْفڒْ خْ صَالْمُونْ. ▫
16 أَذْرَارْ ن أَربِّي، أَذْرَارْ ن بَاشَانْ.
أَذْرَارْ ن بَاشَانْ ذ إِجّْ ن وذْرَارْ س ثْقِيشِّيثِينْ أَطَّاسْ. ▫
إِذُورَار ذ ثْغْزُورِين ن ئِِسْرَائِيل (ىِزهد. 68:16)
17 مَايمِّي ثْخزَّارمْ أَمُّو س وَاسَامْ،
كنِّيوْ أَ إِذُورَارْ س مَارَّا ثِيقِيشِّيثِينْ نْومْ،
غَارْ وذْرَارْ إِ إِمژْرِي إِ-ث أَربِّي ذ ثَازذِّيغْثْ إِ يِيخفْ نّسْ؟
وَاهْ، نِيشَانْ سِيذِي أَذْ ذِينْ إِزْذغْ إِ ڒبْذَا. ▪
18 إِكَارُّوثنْ ن أَربِّي أَقَا أَثنْ ذ عشْرَايَاثْ ن ڒُوڒُوفْ ذ عشْرَايَاثْ ن ڒُوڒُوفْ،
ؤُڒَا ذ أَڒفْ ؤُ عَاوذْ أَڒفْ.
سِيذِي إِنُو أَقَا-ث جَارْ أَسنْ، أَذْرَارْ ن سِينَا أَقَا إِتّْوَاڒحّفْ س ثْقدَّاسْثْ. ▪
19 شكْ ثُوڒْيذْ غَارْ سنّجْ، ثْنذْهذْ ذِي ثْمحْبَاسْثْ،
شكْ ثْمنْعذْ ثَارْزِيفِينْ زڭْ إِوْذَانْ، إِوَا عَاذْ زڭْ إِمْغوّْغنْ،
حِيمَا سِيذِي، أَربِّي، أَذْ إِزْذغْ ذِينِّي. ▪
20 أَذْ إِتّْوَابَاركْ سِيذِي إِنُو. أَسّْ خْ وَاسّْ يَاربُّو إِ نشِّينْ دّْقُوڒَاثْ.
أَربِّي نِّي ذ أَسنْجمْ نّغْ. سِيلَاهْ. ▫
21 أَربِّي نِّي ذ إِجّْ ن أَربِّي ن إِسنْجَامنْ إِ نشِّينْ،
أَقَا ذِينْ إِفكِّيثنْ زِي ڒْموْثْ غَارْ سِيذِي، سِيذِي إِنُو.
22 س ثِيذتّْ، أَربِّي، أَذْ إِڒْبزْ أَزدْجِيفْ ن ڒْعذْيَانْ نّسْ،
أَشقُّوفْ س ؤُشوَّافْ ن ونِّي إِقِّيمنْ إِتّنّضْ س إِمرْوُوسَا ن دّْنُوبْ نّسْ.
23 سِيذِي إِنُو إِنَّا: ”نشّْ أَذْ كنِّيوْ د-أَرّغْ زِي بَاشَانْ،
أَذْ كنِّيوْ د-أَرّغْ زِي ڒَادْجَاغْ ن ڒبْحَارْ، ▪
24 حِيمَا أَذْ ثْحَارّْشذْ س ؤُضَارْ نّكْ ذڭْ إِذَامّنْ،
ؤُشَا ؤُڒَا ذ إِڒسْ ن يِيطَانْ نّكْ أَذْ إِطّفْ ثَاسْغَارْثْ نّسْ زِي ڒْعذْيَانْ.“
25 نِيثْنِي ژْرِينْ إِبْرِيذنْ نّكْ مَامّشْ ثنْ ثُويُورذْ، أَ أَربِّي،
إِبْرِيذنْ ن أَربِّي إِنُو، أَجدْجِيذْ إِنُو إِڒحّْفنْ ذِي ثْقدَّاسْثْ.
26 إِمغْنَاجنْ ثُوغَا ڭُّورنْ غَارْ زَّاثْ، إِنِّي إِشَّاثنْ خْ إِفِيڒَانْ غَارْ ضفَّارْ،
ثِيعْزَارِييِّينْ ثِينِّي إِتِّيرَارنْ خْ إِبنْذِيڒنْ نْسنْثْ ذِي ڒْوسْثْ.
27 بَارْكمْ أَربِّي ذِي ثْمسْمُونِينْ، أَ سِيذِي،
زِي ڒْعُونْصَارْ ن إِسْرَائِيل.
28 أَقَا ذِينْ بِينْيَامِينْ أَمژْيَانْ، ونِّي خَاسنْ إِتّْصدْجَاضنْ،
خنِّي ڒْحُوكَّامْ ن يَاهُوذَا أَكْ-ذ ؤُبَارُّو ن إِعْشِيرنْ نْسنْ،
ؤُڒَا ذ ڒْحُوكَّامْ ن زَاپُولُونْ ذ ڒْحُوكَّامْ ن نَافْثَالِي.
29 أَربِّي نّكْ إِوصَّا مَاحنْذْ أَذْ ثتّْوَاسْجهْذذْ،
أَ، أَربِّي، سجْهذْ مِينْ ثڭِّيذْ ذِي طّْوعْ نّغْ،
30 زِي زَّاوشْثْ نّكْ ثَامقّْرَانْثْ، سنّجْ إِ ؤُرْشَالِيمْ.
إِجدْجِيذنْ أَذْ أَشْ إِوْينْ ثَارْزِيفِينْ. ▪
31 سِيڭّْوذْ ڒْوحْشْ نِّي جَارْ ؤُغَانِيمْ،
أَبَارُّو ن إِفُونَاسنْ إِجهْذنْ أَكْ-ذ إِينْذُوزنْ ن ڒڭْنُوسْ،
أَڒَامِي إِتّْوَاڒْبزْ، ؤُشَا أَذْ إِذْوڒْ نُّوقَارْثْ إِدّزْ.
نتَّا إِزدْجعْ ڒڭْنُوسْ نِّي ثُوغَا تّْمژْرنْ ذڭْ ؤُمنْغِي. ▫
32 أَذْ د-أَسنْ إِمْشنّْعنْ زِي مِيصْرَا،
كُوشْ أَذْ إِسّْوِيژّضْ إِفَاسّنْ نّسْ غَارْ أَربِّي س ثزْڒَا.
33 أَ ثِيڭلْذِيوِينْ ن ثمُّورْثْ غنّْجنْثْ إِ أَربِّي،
زهّْذنْثْ إِ سِيذِي إِنُو. سِيلَاهْ.
34 نتَّا ذ ونِّي إِندّْهنْ ذڭْ ؤُجنَّا خْ مَارَّا إِجنْوَانْ زڭْ وشْحَاڒْ ؤُيَا.
خْزَارْ، أَقَا نتَّا إِڭَّا إِجّْ ن ڒْحسّْ إِجهْذنْ س ثْمِيجَّا نّسْ.
35 وْشمْ جّهْذْ إِ أَربِّي!
لْعَاضَامَا نّسْ أَقَا-ت ثِيوَا إِ إِسْرَائِيل ؤُ جّهْذْ نّسْ أَقَا-ث ذڭْ إِسيْنُوثنْ.
36 أَ، أَربِّي، مَامّشْ ثسِّيڭّْوذذْ زِي ثِيزَاوِييِّينْ نّكْ إِقدّْسنْ،
أَ أَربِّي ن إِسْرَائِيل، شكْ ذ ونِّي إِتِّيشنْ جّهْذْ ذ ثْزمَّارْ إِ ڒْڭنْسْ.
أَذْ إِتّْوَابَاركْ أَربِّي.