64
1 إِ ؤُمقّْرَانْ ن إِمغْنَاجنْ. أَزهّذْ ن ذَاوُوذْ. 2 سڒْ، أَ أَربِّي، إِ ثْمِيجَّا إِنُو خْمِي تّْشثْشِيغْ،
حْضَا ثُوذَارْثْ إِنُو زڭْ ؤُسِيڭّْوذْ ن ڒعْذُو.
3 سْذُورِّي أَيِي زِي ثْمعْمُوتْشْ ن إِعفَّاننْ،
زِي ڒْغَاشِي ن يِينِّي إِتّڭّنْ ڒْمُوعْصِييّثْ،
4 إِنِّي إِسّقْضَاعنْ إِڒسْ نْسنْ أَمشْنَاوْ سِّيفْ،
قَارّْصنْ أَوَاڒْ يَارزْڭنْ أَمْ فْڒِيثْشَا ن ڒْقوْسْ نْسنْ،
5 حِيمَا أَذْ وْثنْ س ڒْقوْسْ خْ ونِّي إِكمّْڒنْ زڭْ إِمُوشَانْ إِنُوفَّارنْ.
ذغْيَا أَذْ خَاسْ نيّْشنْ، إِوَا وَارْ ذِينْ مِينْزِي إِ غَا ڭّْوذنْ.
6 نِيثْنِي حزّْمنْ مَاحنْذْ أَذْ ڭّنْ مِينْ وَارْ إِحْڒِينْ،
سَّاوَاڒنْ س ثْنُوفّْرَا مَاحنْذْ أَذْ نذْينْ ڒفْخُوخْ،
قَّارنْ: ”وِي ثنْ إِ غَا إِژَارنْ!“
7 نِيثْنِي تّْخَارّْصنْ ذِي مَارَّا مِينْ إِدْجَانْ ذ أَعفَّانْ: ”أَقَا نوْجذْ، إِشْثْ ن ثْمعْمُوتْشْ ن ثحْرَايْمشْثْ!“
أَقَا مِينْ إِدْجَانْ ذَاخڒْ ذڭْ ورْيَازْ ؤُ ذڭْ وُوڒْ نّسْ أَقَا يُودْجغْ.
8 أَربِّي أَذْ ثنْ إِوّثْ س فْڒِيثْشَا ن ڒْقوْسْ،
ذغْيَا أَذْ بَاننْ جّْرَايحْ نْسنْ.
9 إِڒسْ نْسنْ أَذْ ثنْ يَارّْ أَذْ نْقَارْضنْ ذڭْ إِخفْ نْسنْ،
كُوڒْ إِجّْ، زڭْ إِنِّي ثنْ إِتّْوَاڒَانْ، أَذْ يَارْوڒْ.
10 خنِّي أَذْ ڭّْوذنْ مَارَّا إِوْذَانْ ؤُشَا أَذْ بَارّْحنْ ثِيمڭَّا ن أَربِّي،
ؤُشَا أَذْ خْزَارنْ مْلِيحْ ذِي مِينْ د إِتّڭّْ.
11 أَمْسڭّذْ أَذْ إِفَارْحْ س سِيذِي ؤُ أَذْ خَاسْ إِثْشڒْ،
مَارَّا إِنِّي ؤُمِي إِسڭّذْ وُوڒْ أَذْ فَارْحنْ.