‏1 إِ ؤُمقّْرَانْ ن إِمغْنَاجنْ. أَزهّذْ ن ذَاوُوذْ. إِزْڒِي.

‏2 زِي ڒْهُوذْنثْ إِسّْذَاحدْجْ إِ شكْ ؤُصبّحْ، أَيَا، أَربِّي، ذِي صِيهْيُونْ،

إِتّْخصَّا أَذْ إِتّْوَاكمّڒْ لْوَاعْذْ إِ شكْ.

‏3 شكْ ثسْڒِيذْ إِ ثْژَادْجِيثْ،

مَارَّا دَّاثْ أَذْ غَاركْ د-يَاسْ.

‏4 ڒْمُوعْصِييّثْ ثُوغَا ثجْهذْ خَافِي،

مَاشَا شكْ ثسّصڒْحذْ إِخطَّانْ نّغْ.

‏5 سّعْذْ ن ونِّي إِ ثْفَارّْزذْ شكْ ؤُ ثسّْقَارّْبذْ ث-إِ-د غَاركْ،

حِيمَا أَذْ إِزْذغْ ذِي ڒمْرَاحَاثْ نّكْ.

نشِّينْ أَذْ نجِّيونْ س ڒْخَارْ ن ثَادَّارْثْ نّكْ،

س ثْقدَّاسْثْ ن زَّاوشْثْ نّكْ ثَامقّْرَانْثْ.

‏6 شكْ أَذْ خَانغْ د-ثَارّذْ ذِي ثْسڭْذَا س ثْمڭَّا إِسَّاڭّْوَاذنْ،

أَ أَربِّي ن ؤُسنْجمْ نّغْ.

أَقَا شكْ ذ ڒَامَانْ ن مَارَّا إِنِّي إِدْجَانْ غَارْ ثْنڭُّورَا ن ثمُّورْثْ،

ن يِينِّي إِدْجَانْ خْ جّْوَايهْ يِيڭّْوجنْ خْ ؤُجمَّاضِينْ نْ ڒبْحَارْ.

‏7 شكْ ذ ونِّي إِسّْرُوسَانْ إِذُورَارْ س جّْهذْ نّسْ،

شكْ ثْبكّْسذْ س ڒمْغَارثْ.

‏8 شكْ ذ ونِّي إِ إِتَّارَّانْ ڒهْوڒْ ن ڒبْحُورْ يَارسَّا،

ڒهْوڒْ نْ ڒمْوَاجْ

ذ لْهَارَاجْ نْ شُّوعُوبْ.

‏9 إِنِّي إِزدّْغنْ غَارْ ثْنڭُّورَا ن ثمُّورْثْ

تّڭّْوذنْ زِي ڒعْڒَامَاثْ نّكْ،

أَقَا شكْ ثتَّارِّيذْ ڒفْجَارْ ن ثُوفُّوثْ ؤُڒَا ذ وطُّو ن ثْمذِّيثْ أَذْ سْڒِيوڒْونْ.

‏10 شكْ ثَارزّْفذْ ثَامُّورْثْ ؤُ ثتَّارِّيذْ إِغزْرَانْ أَذْ ت شُوقّنْ،

أَقَا شكْ ثتَّارِّيذْ ت-إِ-د س ڒْخِيرْ أَطَّاسْ.

إِغْزَارْ ن أَربِّي نِّي ت إِتّْشُوقّْ أَقَا إِتّْشُّورْ س وَامَانْ.

شكْ ثسّوْجَاذذْ إِمنْذِي نْسنْ،

مَاغَارْ إِ ؤُيَا إِ ثسّْوجْذذْ ثَامُّورْثْ.

‏11 شكْ ثتّسَاوذْ مْسقّمْ ڒَاثَارَاثْ ن وشْرَازْ،

ثسّْهكّْوِيذْ إِپُوذَا نّسْ.

ثسَّارْضَابذْ ثَامُّورْثْ س إِنشْنَاشنْ،

ثتّْبَارْكذْ أَغمُّويْ نّسْ.

‏12 شكْ ثتّڭّذْ تَّاجْ إِ ؤُسڭّْوَاسْ ن ڒْخَارْ نّكْ،

ڒَاثَارَاثْ ن إِصُورَافْ نّكْ تُّوذُومنْ س ثَاذُونْثْ.

‏13 أَقَا تُّوذُومنْ خْ دّْمَانِي ن ڒخْڒَا،

ثِيوْرِيرِينْ بكّْسنْثْ س ڒفْرَاحثْ.

‏14 دّْمَانِي ن ثَاروْسَا سُّونْ س وُودْجِي،

ؤُڒَا ذ ثِيغْزُورِينْ ذْڒِينْثْ س إِمنْذِي.

نِيثْنِي دُّوقُّوزنْ س ؤُسْڒِيوْڒوْ، وَاهْ، تّْغنَّاجنْ.