‏1 أَزهّذْ ن ذَاوُوذْ، أَڒَامِي ث ثُوغَا ذِي ڒخْڒَا ن يَاهُوذَا. ^▪  

‏2 أَ أَربِّي، شكْ ذ أَربِّي إِنُو! غَارْ ثُوفُّوثْ أَرزُّوغْ خَاكْ،

ڒعْمَارْ إِنُو إِتّْفَاذَا-د غَاركْ، أَيْسُومْ إِنُو إِتّْمژْرِي ذَايكْ،

ذڭْ إِشْثْ ن ثمُّورْثْ يُوژْغنْ إِتّْفَاذَانْ بْڒَا أَمَانْ. ^▫  

‏3 أَمُّو إِ ذَايكْ خزَّارغْ ذِي زَّاوشْثْ إِقدّْسنْ،

حِيمَا أَذْ ژَترغْ جّهْذْ نّكْ ذ ؤُعُودْجِي نّكْ.

‏4 مَاغَارْ ثَامخْسِيوْثْ نّكْ إِشوَّارنْ ثحْڒَا خْ ثُوذَارْثْ،

س ؤُينِّي أَذْ شكْ صبّْحنْ إِينْشِيشنْ إِنُو.

‏5 أَمُّو إِ ذ أَشْ غَا بَارْكغْ ذِي ثُوذَارْثْ إِنُو،

أَذْ سّْڭعّْذغْ إِفَاسّنْ إِنُو ذڭْ يِيسمْ نّكْ.

‏6 ڒعْمَارْ إِنُو أَذْ إِجِّيونْ أَمشْنَاوْ ثْيَاوَانْثْ زِي ثْرُوسِّي ذ ثَاذُونْثْ،

س إِينْشِيشنْ إِسْڒِيوْڒونْ أَذْ شكْ إِصبّحْ ؤُقمُّومْ إِنُو،

‏7 مَاڒَا تّْخَارّْصغْ ذَايكْ ذِي ثَاسُّوثْ،

تّْخمَّامغْ ذَايكْ غَارْ ؤُضُوفنْ ن وشْبَارْ ن دْجِيڒثْ.

‏8 مِينْزِي ثُوغَا شكْ ذ أَمْعَاونْ إِنُو،

ذِي ثِيڒِي ن وَافْرِيونْ نّكْ أَذْ سْڒِيوْڒوغْ.

‏9 ڒعْمَاڒْ إِنُو إِڒصّقْ ذَايكْ أَوَارْنِي أَشْ،

أَفُوسْ نّكْ أَفُوسِي إِتّطّفْ ذَايِي.

‏10 إِنِّي إِتّخْسنْ أَذْ أَردّْدْجنْ ڒعْمَارْ إِنُو،

أَذْ إِوْضنْ غَارْ إِمُوشَانْ يُودْجْغنْ قَاعْ سَاذُو ثمُّورْثْ.

‏11 نِيثْنِي أَذْ تّْوَاسلّْمنْ إِ ثْزمَّارْ ن سِّيفْ،

أَذْ ذوْڒنْ ذ ثَاكشَّاضْثْ إِ إِشعْبَاونْ.

‏12 مَاشَا أَجدْجِيذْ أَذْ إِفَارْحْ زِي أَربِّي.

كُوڒْ  إِجّْ زڭْ إِنِّي إِ غَارسْ إِ غَا إِتّْجَادْجَانْ أَذْ إِفيّشْ،

مِينْزِي أَقمُّومْ ن يِينِّي إِسَّاوَاڒنْ س إِخَارِّيقنْ أَذْ إِتّْوَابلّعْ.