62
1 إِ ؤُمقّْرَانْ ن إِمغْنَاجنْ. سَاذُو ؤُفُوسْ ن يَاذُوثُونْ. ن ذَاوُوذْ. 2 ڒعْمَارْ إِنُو يَارسَّا، إِتّْرَاجَا أَربِّي وَاهَا،
أَقَا زَّايسْ د-إِتَّاسْ ؤُسنْجمْ إِنُو.
3 أَقَا-ت ذ ثَاصْضَارْثْ إِنُو ذ ؤُسنْجمْ إِنُو،
لْپُورْجْ إِنُو يُوعْڒَانْ، وَارْ تّفْرِيغغْ أَطَّاسْ.
4 مشْحَاڒْ عَاذْ إِ غَا ثكّمْ ثْهجّْممْ خْ ورْيَازْ،
مَا أَقَا ثڒْهَامْ ثْغطّْڒمْ ث،
أَمْ إِجّْ ن ڒْحِيضْ إِوطَّا، أَمْ إِجّْ ن وغْبَارْ إِتّْوَاغْضڒْ.
5 نِيثْنِي تّمْشَاوَارنْ وَاهَا حِيمَا أَذْ ث-إِ-د غضْڒنْ زڭْ ومْشَانْ نّسْ يُوعْڒَانْ.
نِيثْنِي أَرطَّانْ س إِخَارِّيقنْ.
تّْبَارْكنْ س ؤُقمُّومْ نْسنْ،
مَاشَا ذڭْ وُوڒْ نْسنْ نعّْڒنْ. سِيلَاهْ. ▫
6 رَاجَا إِ أَربِّي وَاهَا، أَ ڒعْمَارْ إِنُو،
مِينْزِي زَّايسْ ڒَايَاسْ إِنُو.
7 أَقَا-ت ذ ثَاصْضَارْثْ إِنُو ذ ؤُسنْجمْ إِنُو،
لْپُورْجْ إِنُو يُوعْڒَانْ، وَارْ تّفْرِيغغْ شَا.
8 أَسنْجمْ إِنُو ذ ؤُعُودْجِي إِنُو أَقَا أَثنْ ذِي أَربِّي،
نتَّا ذ ثَاصْضَارْثْ إِنُو إِجهْذنْ، أَمْشَانْ إِنُو ن ثَاروْڒَا أَقَا-ث ذِي أَربِّي.
9 ثِيقّمْ ڒبْذَا ذَايسْ، أَ ڒْڭنْسْ!
زدْجْعمْ ؤُڒْ نْومْ زَّاثْ إِ وُوذمْ نّسْ.
أَربِّي ذ أَمْشَانْ نّغْ ن ثَاروْڒَا. سِيلَاهْ.
10 ثَارْوَا ن أَذَامْ أَقَا أَثنْ بَاطڒْ،
ثَارْوَا ن ورْيَازْ أَقَا ذَايْسنْ ڒْغشّْ.
أَذْ ڭعّْذنْ ذِي ڒْمِيزَانْ س ثْنَاينْ ن طَّاوْيَاثْ،
أَقَا أَثنْ جْمِيعْ فّْغنْ-د زِي ڒْبَاطڒْ.
11 وَارْ تّشْڒمْ خْ دّدْجْ،
وَارْ تُّوفّمْ أَكْ-ذ ثُوكَّارْضَا.
مَاڒَا أَڭْڒَا إِمقَّارْ،
وَارْ خَاسْ سّْرُوسَامْ ؤُڒْ نْومْ.
12 أَربِّي إِسِّيوڒْ إِشْثْ ن ثْوَاڒَا، نشّْ سْڒِيغْ ت ثْنَاينْ ن ثْوَاڒَاوِينْ،
أَقَا: ”جّهْذْ زِي أَربِّي“.
13 ثَامخْسِيوْثْ إِشوَّارنْ إِ شكْ، أَ سِيذِي إِنُو!
مِينْزِي شكْ أَذْ ثْخدْجْصذْ كُوڒْ إِجّْ عْلَاحْسَابْ مِينْ إِڭَّا. ▪